സുരക്ഷിതം ലാര്‍ജ് ക്യാപുകളെന്ന് വിദഗ്ധര്‍; സെന്‍സെക്സും നിഫ്റ്റിയും പുതിയ ഉയരങ്ങളില്‍

ബെഞ്ച്മാർക്ക് സൂചികകളായ സെൻസെക്സും നിഫ്റ്റിയും ഇന്ന് വ്യാപാരത്തിന്‍റെ തുടക്കത്തില്‍ പുതിയ സര്‍വകാല ഉയരങ്ങള്‍ തൊട്ടു, ഐടി, ഉപഭോക്തൃ ഉല്‍പ്പന ഓഹരികളിലെ മുന്നേറ്റമാണ് റാലിയെ നയിക്കുന്നത്. സെൻസെക്സ് 500 പോയിന്‍റില്‍ അധികം ഉയര്‍ന്ന് 71,913.07 എന്ന സര്‍വകാല ഉയരം കുറിച്ചു. നിഫ്റ്റി 21,593 എന്ന പുതിയ ഉയരത്തിലെത്തി.

നിഫ്റ്റി ഐടി, നിഫ്റ്റി എഫ്എംസിജി സൂചികകൾ 1 ശതമാനം വീതം ഉയർന്നു, എല്ലാ മേഖലാ സൂചികകളും പോസിറ്റീവ് നോട്ടിലാണ് വ്യാപാരം നടത്തിയത്.

"അവധി ദിനങ്ങൾ അടുത്തെത്തിയിട്ടും വിപണി ഒരു അവധിക്കാല മൂഡിലല്ല. വിപണി കണ്‍സോളിഡേഷനിലാണ്, പക്ഷേ ഉയർന്ന തലങ്ങളിൽ. യുഎസ് വിപണികളും ഇതേ പ്രവണതയാണ് പ്രകടിപ്പിക്കുന്നത്. മിഡ്, സ്മോൾ ക്യാപ് വിഭാഗങ്ങളിലെ മൂല്യനിർണ്ണയം അമിതമാണ്. ഈ മൂല്യനിർണ്ണയത്തിൽ മിഡ്, സ്മോൾ ക്യാപ്പുകളെ പിന്തുടരുന്നത് അപകടകരമാണ്. സുരക്ഷ ലാര്‍ജ് ക്യാപുകളിലാണ്. ശുഭാപ്തിവിശ്വാസത്തിന്റെ ഈ സമയത്ത് നിക്ഷേപകർ സുരക്ഷിതത്വത്തിന് പ്രാധാന്യം നൽകണം.

യുഎസിൽ ബോണ്ട് ആദായം കുറയുന്നത് അർത്ഥമാക്കുന്നത് എഫ്ഐഐകൾ ഇന്ത്യൻ ഓഹരികൾ വാങ്ങുന്നത് തുടരും എന്നാണ്. പുതുവർഷം എഫ്‌ഐഐ വാങ്ങലിന്റെ ഒരു പുതിയ മുന്നേറ്റത്തിന് സാക്ഷ്യം വഹിക്കാൻ സാധ്യതയുണ്ട്. റാലിയിൽ അധികം പങ്കെടുത്തിട്ടില്ലാത്ത ആർഐഎൽ പോലുള്ള ലാർജ് ക്യാപ്പുകളില്‍ ഇനി ചലനം കണ്ടേക്കാം, " ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് ഡോ. വി കെ വിജയകുമാർ പറഞ്ഞു.

ഇന്ന് ഏഷ്യന്‍ വിപണികളില്‍ ഏറെയും നേട്ടത്തിലാണ് വ്യാപാരം നടത്തുന്നത്. ജപ്പാനിന്‍റെ നിക്കി, ദക്ഷിണ കൊറിയയിലെ കോസ്‍പി, ഹോംഗ്കോംഗിന്‍റെ ഹാങ്സെങ് എന്നിവ പച്ചയിലാണ്. അതേസമയം ചൈനയുടെ ഷാങ്ഹായ് ഇടിവ് പ്രകടമാക്കുന്നു.

ചൊവ്വാഴ്ചത്തെ വ്യാപാരത്തില്‍ ബിഎസ്ഇ സെൻസെക്സ് 122 പോയിന്റ് ഉയർന്ന് 71,437 ലും നിഫ്റ്റി 50 34 പോയിന്റ് ഉയർന്ന് 21,453 ലും എത്തി.