Sensex താഴേക്കോ? പുതിയ വാരം വിപണിയെ ബാധിക്കുന്ന 5 ഘടകങ്ങൾ!

കഴിഞ്ഞ വെള്ളിയാഴ്ച സെന്‍സെക്‌സ് 1,048 പോയിന്റും നിഫ്റ്റി 336 പോയിന്റും ഇടിഞ്ഞതോടെ നിക്ഷേപകര്‍ ആശങ്കയിലാണ്. എന്നാല്‍ വരാനിരിക്കുന്ന വാരം വിപണിയുടെ ഗതി മാറ്റാന്‍ പോകുന്ന അഞ്ച് പ്രധാന ഘടകങ്ങള്‍ ഏതൊക്കെയാണെന്ന് നോക്കാം.

യുഎസ് ഫെഡ് മിനിറ്റ്സ്

ഈ ആഴ്ചയിലെ ഏറ്റവും പ്രധാനപ്പെട്ട ആഗോള ഘടകം ഫെബ്രുവരി 18 ബുധനാഴ്ച പുറത്തിറങ്ങുന്ന യുഎസ് ഫെഡറല്‍ റിസര്‍വ് യോഗത്തിന്റെ മിനിറ്റ്സ് ആണ്. പലിശ നിരക്കുകളില്‍ ഇനി എന്ത് മാറ്റമുണ്ടാകുമെന്ന കൃത്യമായ സൂചന ഇതില്‍ നിന്നും ലഭിക്കും.യുഎസ് ജിഡിപി കണക്കുകള്‍ കൂടി വരാനിരിക്കുന്നതിനാല്‍, ആഗോള പലിശ നിരക്കിലെ മാറ്റങ്ങള്‍ ഇന്ത്യന്‍ വിപണിയെ നേരിട്ട് ബാധിക്കുമെന്ന് എന്റിച്ച് മണി സിഇഒ പൊന്‍മുടി ആര്‍. നിരീക്ഷിക്കുന്നു.

ആര്‍ബിഐ മിനിറ്റ്സ്

ഫെബ്രുവരി 20 വെള്ളിയാഴ്ച നമ്മുടെ റിസര്‍വ് ബാങ്കും തങ്ങളുടെ നയരൂപീകരണ യോഗത്തിന്റെ വിശദാംശങ്ങള്‍ പുറത്തുവിടും. പണപ്പെരുപ്പം, ലിക്വിഡിറ്റി എന്നിവയില്‍ ആര്‍ബിഐ അംഗങ്ങളുടെ നിലപാട് എന്താണെന്ന് ഇതിലൂടെ വ്യക്തമാകും. ഇന്ത്യയിലെ പലിശ നിരക്ക് കുറയുമോ അതോ നിലവിലെ 5.25% തന്നെ തുടരുമോ എന്നത് ഇതിലൂടെ വ്യക്തമാവും.

സെന്‍സെക്‌സ് 60,000-ത്തിലേക്ക്? വിപണിയിൽ വൻ തകർച്ച വരുന്നു; മുന്നറിയിപ്പ്!

ഐടി സെക്ടറിലെ ആന്ത്രോപിക് പ്രഹരം

കഴിഞ്ഞ വാരം ഐടി ഇന്‍ഡക്‌സ് 8 ശതമാനത്തോളം ഇടിഞ്ഞത് വിപണിയെ പിടിച്ചുലച്ചിരുന്നു. Anthropic പോലുള്ള കമ്പനികളുടെ പുതിയ എഐ ടൂളുകള്‍ പരമ്പരാഗത ഐടി സേവനങ്ങളെ ബാധിക്കുമെന്ന ഭീതിയാണ് ഇതിന് പിന്നില്‍.എഐ തരംഗം ഐടി മേഖലയില്‍ വരുത്തുന്ന മാറ്റങ്ങള്‍ നിക്ഷേപകര്‍ സൂക്ഷ്മമായി നിരീക്ഷിക്കണം. എന്നാല്‍ ബാങ്കിംഗ്, ഓട്ടോ സെക്ടറുകളിലേക്ക് നിക്ഷേപം മാറാന്‍ സാധ്യതയുണ്ടെന്ന് ജിയോജിത് ഫിനാന്‍ഷ്യല്‍ സര്‍വീസസിലെ വിനോദ് നായര്‍ അഭിപ്രായപ്പെടുന്നു.

സ്വര്‍ണ്ണവും വെള്ളിയും

ആഗോള വിപണിയില്‍ സ്വര്‍ണ്ണവില ഔണ്‍സിന് 5,031 ഡോളറിലേക്കും വെള്ളി 77.16 ഡോളറിലേക്കും ഉയര്‍ന്നത് നിക്ഷേപകര്‍ ശ്രദ്ധിക്കേണ്ട കാര്യമാണ്. രൂപയുടെ മൂല്യത്തില്‍ ഉണ്ടായ ഇടിവും സ്വര്‍ണ്ണവിലയിലെ വര്‍ധനവും വിപണി സെന്റിമെന്റിനെ സ്വാധീനിക്കും.

വിദേശ നിക്ഷേപകരുടെ നീക്കം

ഫെബ്രുവരിയില്‍ ഇതുവരെ വിദേശ നിക്ഷേപകര്‍ 1,374 കോടി രൂപയുടെ ഓഹരികള്‍ വിറ്റഴിച്ചു കഴിഞ്ഞു. കഴിഞ്ഞ വെള്ളിയാഴ്ച മാത്രം 7,395 കോടി രൂപയുടെ വലിയൊരു വില്‍പനയാണ് നടന്നത്.ഐടി മേഖലയിലെ അനിശ്ചിതത്വം മാറിയാല്‍ വിദേശ നിക്ഷേപകര്‍ വീണ്ടും ഇന്ത്യയിലേക്ക് തിരിച്ചെത്തിയേക്കാം,' എന്നാണ് ജിയോജിത് ചീഫ് സ്ട്രാറ്റജിസ്റ്റ് വി.കെ. വിജയകുമാര്‍ വ്യക്തമാക്കുന്നത്.

ടെക്‌നിക്കല്‍ ലെവലുകള്‍

നിഫ്റ്റി 50, 25,300 - 25,400 നിലവാരം നിലനിര്‍ത്തുന്നത് നിര്‍ണ്ണായകമാണ്. ഇത് തകര്‍ന്നാല്‍ വിപണി 25,000 വരെ താഴാന്‍ സാധ്യതയുണ്ട്.സെന്‍സെക്‌സിന് 82,500 നിലവാരത്തില്‍ ശക്തമായ പിന്തുണയുണ്ട്. മുന്നേറ്റത്തിന് 83,500 കടക്കേണ്ടതുണ്ട്.

ബാങ്ക് നിഫ്റ്റി: 60,000 എന്ന സൈക്കോളജിക്കല്‍ ലെവല്‍ കാത്തുസൂക്ഷിക്കുന്നത് ആശ്വാസകരമാണ്. ഈ ആഴ്ച ഓഹരി വിപണിയില്‍ വലിയ ചാഞ്ചാട്ടങ്ങള്‍ പ്രതീക്ഷിക്കാം. അതിനാല്‍ സുരക്ഷിതമായ നിക്ഷേപങ്ങള്‍ക്കായി കൃത്യമായ സ്റ്റോപ്പ്-ലോസ് പാലിക്കാന്‍ ശ്രദ്ധിക്കുക.