ആദ്യ നേട്ടങ്ങള്‍ കൈവിട്ട് ഓഹരി വിപണി; തിളങ്ങി കണ്‍സ്യൂമര്‍ ഡ്യൂറബിള്‍സ് ഓഹരികള്‍

ഇന്ന് രാവിലെ മികച്ച നേട്ടത്തോടെ ആരംഭിച്ച ഇന്ത്യന്‍ ഓഹരി വിപണിക്ക് ഉച്ചയ്ക്ക് ശേഷമുള്ള സെഷനില്‍ ആ നേട്ടങ്ങള്‍ നിലനിര്‍ത്താനായില്ല. ഉയര്‍ന്ന നിലവാരങ്ങളിലെ ലാഭമെടുപ്പും ആഗോള വിപണിയിലെ മന്ദഗതിയുമാണ് നിക്ഷേപകരുടെ ആത്മവിശ്വാസം കുറയ്ക്കാനും വിപണി താഴേക്ക് വരാനും കാരണമായത്.

ഒരു ഘട്ടത്തില്‍ നിഫ്റ്റി സുപ്രധാനമായ 24,050 നിലവാരത്തിന് തൊട്ടടുത്താണ് വ്യാപാരം നടത്തിയത്. സെന്‍സെക്സ് അതിന്റെ ഇന്നത്തെ ഏറ്റവും ഉയര്‍ന്ന നിരക്കില്‍ നിന്ന് ഏകദേശം 400 പോയിന്റിലധികം താഴേക്ക് പോയി.

ഉച്ചയ്ക്ക് 2:00 മണിയോടെയുള്ള കണക്കുകള്‍ പ്രകാരം സെന്‍സെക്‌സ് വെറും 15 പോയിന്റുകളുടെ നേരിയ നേട്ടത്തോടെ 77,200 നിലവാരത്തില്‍ വ്യാപാരം തുടരുന്നു.നിഫ്റ്റി 50 ഏകദേശം 19 പോയിന്റുകള്‍ നഷ്ടപ്പെടുത്തി 24,060 നിലവാരത്തില്‍ വ്യാപാരം നടത്തുന്നു.

വിപണിയിലെ മുന്നേറ്റം നെഗറ്റീവ് ദിശയിലേക്ക് മാറിയപ്പോള്‍, എന്‍എസ്ഇ-യില്‍ ഓഹരി വില ഉയര്‍ന്ന കമ്പനികളേക്കാള്‍ കൂടുതല്‍ വിലയിടിഞ്ഞ കമ്പനികളായിരുന്നു. ഇത് വിപണിയിലാകെ അനുഭവപ്പെട്ട വില്‍പന സമ്മര്‍ദ്ദത്തെ വ്യക്തമാക്കുന്നു.

അപ്രതീക്ഷിത ഇടിവിന് പിന്നിലെ പ്രധാന കാരണങ്ങള്‍

ഉയര്‍ന്ന നിലവാരത്തിലെ പ്രോഫിറ്റ് ബുക്കിങ്: വിപണിയിലെ സമീപകാല മുന്നേറ്റത്തിന് ശേഷം വ്യാപാരികള്‍ ഉയര്‍ന്ന റെസിസ്റ്റന്‍സ് നിലവാരങ്ങളില്‍ വെച്ച് ലാഭം പിന്‍വലിക്കാന്‍ താല്പര്യം കാണിച്ചു. ഇത് മുന്‍നിര ഓഹരികളിലെ വില്‍പനയ്ക്ക് കാരണമായി.

ഐസിഐസിഐ ലൊംബാര്‍ഡിന്റെ തകര്‍ച്ച: ഈ പാദത്തിലെ മോശം സാമ്പത്തിക ഫലങ്ങള്‍ പുറത്തുവന്നതിന് പിന്നാലെ ഐസിഐസിഐ ലൊംബാര്‍ഡ് ഓഹരികള്‍ക്ക് വന്‍ തിരിച്ചടി നേരിട്ടു. പ്രമുഖ ബ്രോക്കറേജ് സ്ഥാപനങ്ങള്‍ റേറ്റിംഗ് കുറച്ചതോടെ കമ്പനിയുടെ ഓഹരി വില 10% ഓളം ഇടിഞ്ഞു. ഇത് വിപണിയെ താഴേക്ക് നയിച്ച പ്രധാന ഘടകങ്ങളിലൊന്നായി മാറി.

ആഗോള വിപണിയിലെ ആശങ്കകള്‍: യുഎസ് വിപണിയിലെ മുന്‍നിര സാങ്കേതികവിദ്യ, സെമികണ്ടക്ടര്‍ ഓഹരികളിലുണ്ടായ ഇടിവ് ഏഷ്യന്‍ വിപണികളെയും ബാധിച്ചു. കൂടാതെ ബാങ്ക് ഓഫ് കൊറിയ അപ്രതീക്ഷിതമായി പലിശനിരക്ക് ഉയര്‍ത്തിയതും നിക്ഷേപകരെ ആശങ്കയിലാക്കി.

വരും ദിവസങ്ങളില്‍ ശ്രദ്ധിക്കേണ്ട നിലവാരങ്ങള്‍

നിഫ്റ്റി 50 സൂചിക നിലവില്‍ 1-മണിക്കൂര്‍ ചാര്‍ട്ടില്‍ നെഗറ്റീവ് സൂചനകളോടെയാണ് വ്യാപാരം നടത്തുന്നത്. സമീപകാലത്തെ ഉയര്‍ന്ന നിലവാരമായ 24,500-ല്‍ നിന്ന് ശക്തമായ പ്രോഫിറ്റ് ബുക്കിങ് നേരിട്ടതിനുശേഷം വിപണിയില്‍ ഇടിവ് തുടരുന്നതായാണ് ഇത് കാണിക്കുന്നത്.

ഈ ഇടിവിന് ശേഷം നിഫ്റ്റി ഇപ്പോള്‍ ഒരു കണ്‍സോളിഡേഷന്‍ ഘട്ടത്തിലേക്ക് കടന്നിരിക്കുകയാണ്. നിലവില്‍ 24,020 മുതല്‍ 24,220 വരെയുള്ള വളരെ കുറഞ്ഞ പരിധിക്കുള്ളിലാണ് സൂചിക ചലിക്കുന്നത്.

പ്രധാന പ്രതിരോധം

നിഫ്റ്റിക്ക് 24,220 നിലവാരത്തിന് മുകളില്‍ തുടരാന്‍ സാധിക്കാത്തത് കൊണ്ട് തന്നെ 24,220 എന്നത് ശക്തമായ ഒരു പ്രതിരോധ മേഖലയായി മാറിയിരിക്കുന്നു. കൂടാതെ ലോവര്‍ ഹൈസ് രൂപപ്പെടുന്നത് വിപണിയില്‍ വാങ്ങല്‍ ശേഷി കുറവാണെന്നതിന്റെ സൂചനയാണ്.

പ്രധാന പിന്തുണകള്‍

നിഫ്റ്റിക്ക് നിലവിലുള്ള ഏറ്റവും അടുത്ത ശക്തമായ പിന്തുണ 24,020 & 24,000 ആണ്. വിപണി 24,000 എന്ന സപ്പോര്‍ട്ട് തകര്‍ത്ത് താഴേക്ക് വരികയാണെങ്കില്‍, ശക്തമായ വില്‍പന സമ്മര്‍ദ്ദം ഉണ്ടാകുകയും സൂചിക ഈ താഴത്തെ നിലവാരങ്ങളിലേക്ക് പതിക്കാന്‍ സാധ്യതയുമുണ്ട്.

തിരിച്ചുവരവിനുള്ള സാധ്യതകള്‍

ഒരുപക്ഷേ നിഫ്റ്റി മികച്ച വോളിയത്തോടെ 24,220 എന്ന പ്രതിരോധ നിലവാരത്തിന് മുകളില്‍ ക്ലോസ് ചെയ്യാന്‍ സാധിച്ചാല്‍ വിപണിയില്‍ നല്ലൊരു റിക്കവറി പ്രതീക്ഷിക്കാം. അങ്ങനെയാണെങ്കില്‍ സൂചിക മുന്നേറാന്‍ സാധ്യതയുള്ള നിലവാരങ്ങള്‍ 24,373,24,500,24,650

നിഫ്റ്റിയുടെ ട്രെന്‍ഡ് സൈഡ്വേസ് ആയി തുടരാനാണ് സാധ്യത. അതുകൊണ്ട് തന്നെ വ്യാപാരികള്‍ 24,020 - 24,220 എന്ന റേഞ്ച് വളരെ കൃത്യമായി നിരീക്ഷിക്കേണ്ടതുണ്ട്.

ഐടിയുടെ കുതിപ്പും മുന്‍നിര ഓഹരികളുടെ ഇടിവും

ഇന്നത്തെ വ്യാപാരത്തില്‍ വിപണിയിലുണ്ടായ മേഖല തിരിച്ചുള്ള മുന്നേറ്റങ്ങളും തിരിച്ചടികളും, ഒപ്പം വിപണിയെ സ്വാധീനിച്ച പ്രധാന ഓഹരികളും താഴെ പറയുന്നവയാണ്:

മേഖല തിരിച്ചുള്ള പ്രകടനം

ഐടി മേഖലയുടെ കുതിപ്പ് : മുന്‍പത്തെ രണ്ട് സെഷനുകളിലെ തുടര്‍ച്ചയായ ഇടിവിന് ശേഷം നിക്ഷേപകര്‍ കുറഞ്ഞ വിലയില്‍ ഐടി ഓഹരികള്‍ വാങ്ങിക്കൂട്ടിയതോടെ നിഫ്റ്റി ഐടി സൂചിക 2% ശതമാനത്തോളം ഉയര്‍ന്നു.

കണ്‍സ്യൂമര്‍ ഡ്യൂറബിള്‍സ് മുന്നേറ്റത്തില്‍: ഉപഭോക്തൃ ഉല്‍പ്പന്നങ്ങളുടെ ഓഹരികളും ഇന്ന് പോസിറ്റീവ് മേഖലയില്‍ ശക്തമായി വ്യാപാരം നടത്തി.

സമ്മര്‍ദ്ദത്തിലായ മേഖലകള്‍: റിയല്‍റ്റി, പൊതുമേഖലാ ബാങ്കുകള്‍ , മെറ്റല്‍, പ്രൈവറ്റ് ബാങ്കുകള്‍, ഫിനാന്‍ഷ്യല്‍ സര്‍വീസസ് എന്നീ മേഖലകള്‍ ഇടിവ് നേരിട്ടത് വിപണിയുടെ വലിയ മുന്നേറ്റത്തെ തടഞ്ഞുനിര്‍ത്തി.

കൂടുതല്‍ നഷ്ടം നേരിട്ട മുന്‍നിര ഓഹരികള്‍

നിഫ്റ്റി 50 സൂചികയില്‍ ഇന്ന് ഏറ്റവും കൂടുതല്‍ വില്‍പന സമ്മര്‍ദ്ദം നേരിട്ട ഓഹരികള്‍ എറ്റേണല്‍ ലിമിറ്റഡ്, എസ്ബിഐ ലൈഫ് ഇന്‍ഷുറന്‍സ്, ശ്രീറാം ഫിനാന്‍സ്, എച്ച്ഡിഎഫ്‌സി ബാങ്ക് , ബജാജ് ഫിന്‍സെര്‍വ് എന്നിവയാണ്.

അതേസമയം, വിപണിയിലെ വാങ്ങല്‍ താല്പര്യം പ്രധാനമായും ചില ഐടി ഓഹരികളില്‍ മാത്രമായി ഒതുങ്ങിനിന്നു.വിപണിയിലെ ഈ ചാഞ്ചാട്ടങ്ങള്‍ക്കിടയിലും മുന്നോട്ടുള്ള കുതിപ്പിന് വിദേശ ധനകാര്യ സ്ഥാപനങ്ങളുടെ നിക്ഷേപം വളരെ നിര്‍ണ്ണായകമാണെന്ന് നിരീക്ഷകര്‍ കരുതുന്നു. സമീപകാലത്തെ ചില ഇന്‍ഫ്‌ലോകള്‍ വിപണിക്ക് താല്‍ക്കാലിക പിന്തുണ നല്‍കിയെങ്കിലും, ആഗോള രാഷ്ട്രീയ സംഘര്‍ഷങ്ങളും സാമ്പത്തിക ആശങ്കകളും നിലനില്‍ക്കുന്നതിനാല്‍ വിദേശ നിക്ഷേപകരുടെ സ്ഥിരതയാര്‍ന്ന പങ്കാളിത്തം ഇനിയും ഉറപ്പായിട്ടില്ല.