യുദ്ധഭീതിയില്‍ വിറച്ച് ഓഹരി വിപണി: നിക്ഷേപകര്‍ക്ക് കോടികളുടെ നഷ്ടം

അമേരിക്കയും ഇറാനും തമ്മിലുള്ള സംഘര്‍ഷം ആഗോളതലത്തില്‍ വന്‍ പ്രതിസന്ധിയുണ്ടാക്കിയതോടെ ഇന്ത്യന്‍ ഓഹരി വിപണിയില്‍ കനത്ത തകര്‍ച്ച. മാര്‍ച്ച് 4-ന് വ്യാപാരം അവസാനിക്കുമ്പോള്‍ സെന്‍സെക്‌സ് 1,122 പോയിന്റ് ഇടിഞ്ഞ് 79,116-ലും നിഫ്റ്റി 385 പോയിന്റ് താഴ്ന്ന് 24,480-ലുമെത്തി. കഴിഞ്ഞ മൂന്ന് ദിവസത്തിനിടെ മാത്രം വിപണിയില്‍ 4 ശതമാനത്തിന്റെ ഇടിവാണുണ്ടായത്. മിഡില്‍ ഈസ്റ്റിലെ അനിശ്ചിതാവസ്ഥ ക്രൂഡ് ഓയില്‍ വില വര്‍ദ്ധിപ്പിക്കുമെന്ന ആശങ്ക നിക്ഷേപകരെ പിന്‍വലിയാന്‍ പ്രേരിപ്പിച്ചു.

ഇന്ത്യന്‍ രൂപയുടെ മൂല്യത്തിലും ചരിത്രപരമായ ഇടിവാണ് രേഖപ്പെടുത്തിയത്. ഡോളറിനെതിരെ രൂപയുടെ മൂല്യം ആദ്യമായി 92 കടന്ന് പുതിയ റെക്കോര്‍ഡ് താഴ്ചയിലെത്തി. ഒരു ഘട്ടത്തില്‍ 92.30 വരെ താഴ്ന്ന രൂപ, വ്യാപാരത്തിനൊടുവില്‍ 92.14 എന്ന നിലയിലാണ് ക്ലോസ് ചെയ്തത്. ആഗോള വിപണിയില്‍ ഡോളര്‍ കരുത്താര്‍ജ്ജിച്ചതും യുദ്ധസാഹചര്യത്തില്‍ വിദേശ നിക്ഷേപകര്‍ കൂട്ടത്തോടെ ഓഹരികള്‍ വിറ്റഴിക്കുന്നതുമാണ് രൂപയ്ക്ക് തിരിച്ചടിയായത്.

വലിയ ഓഹരികളെക്കാള്‍ മിഡ്ക്യാപ്, സ്‌മോള്‍ക്യാപ് സൂചികകളെയാണ് തകര്‍ച്ച കൂടുതല്‍ ബാധിച്ചത്. ടാറ്റ സ്റ്റീല്‍, ടാറ്റ മോട്ടോഴ്‌സ്, എസ്ബിഐ ലൈഫ് തുടങ്ങിയ പ്രമുഖ കമ്പനികള്‍ നിഫ്റ്റിയില്‍ വലിയ നഷ്ടം നേരിട്ടു. വിപണിയിലെ ഈ തരംഗത്തില്‍ 700-ലധികം ഓഹരികളാണ് 52 ആഴ്ചയിലെ ഏറ്റവും താഴ്ന്ന നിലയിലേക്ക് പതിച്ചത്. സിമന്റ്, നിര്‍മ്മാണം, വ്യോമയാനം തുടങ്ങിയ മേഖലകളിലെ മുന്‍നിര ഓഹരികളെല്ലാം കനത്ത സമ്മര്‍ദ്ദത്തിലാണ്.

അതേസമയം, പ്രതിസന്ധിക്കിടയിലും ഐടി മേഖലയിലെ ഇന്‍ഫോസിസ്, ടെക് മഹീന്ദ്ര തുടങ്ങിയ ഓഹരികള്‍ നേട്ടമുണ്ടാക്കിയത് വിപണിക്ക് നേരിയ ആശ്വാസമായി. ഭാരതി എയര്‍ടെല്‍, കോള്‍ ഇന്ത്യ എന്നിവയും തകര്‍ച്ചയെ പ്രതിരോധിച്ചു നിന്നു. എങ്കിലും, യുദ്ധസാഹചര്യത്തില്‍ മാറ്റമുണ്ടാകുന്നത് വരെ വിപണിയില്‍ ഇനിയും അനിശ്ചിതത്വം തുടരാനാണ് സാധ്യതയെന്ന് സാമ്പത്തിക വിദഗ്ധര്‍ വിലയിരുത്തുന്നു.