ഏഴ്‌ ദിവസത്തെ കുതിപ്പിന് ബ്രേക്ക്; ചുവപ്പ് കത്തി ഓഹരി വിപണി

ഏഴുദിവസത്തെ നേട്ടത്തിന് ശേഷം ഓഹരി വിപണി ഇന്ന് നഷ്ടത്തിൽ വ്യാപാരം അവസാനിപ്പിച്ചു. സെൻസെക്സ് 315 പോയിന്റ് അഥവാ 0.39 ശതമാനം താഴ്ന്ന് 79,801.43 ലും നിഫ്റ്റി 82 പോയിന്റ് അഥവാ 0.34 ശതമാനം നഷ്ടത്തിൽ 24,246.70 ലും അവസാനിച്ചു.

സെൻസെക്സ് ഓഹരികൾ ( Top Gainers, Losers )

സെൻസെക്സ് ഓഹരികളിൽ ഇൻഡസ്ഇൻഡ് ബാങ്ക്, അൾട്രാടെക് സിമന്റ്, ടാറ്റ മോട്ടോഴ്‌സ്, ടെക് മഹീന്ദ്ര, ടൈറ്റൻ, ഏഷ്യൻ പെയിന്റ്സ് എന്നിവ നേട്ടമുണ്ടാക്കിയപ്പോൾ ഭാരതി എയർടെൽ, ഐസിഐസിഐ ബാങ്ക്, എറ്റേണൽ, മഹീന്ദ്ര & മഹീന്ദ്ര, എച്ച്‌സി‌എൽ ടെക്‌നോളജീസ്, എച്ച്‌ഡി‌എഫ്‌സി ബാങ്ക്, കൊട്ടക് മഹീന്ദ്ര ബാങ്ക്, ടാറ്റ കൺസൾട്ടൻസി സർവീസസ്, ബജാജ് ഫിനാൻസ് എന്നിവ നഷ്ടത്തിൽ വ്യാപാരം അവസാനിച്ചു.

സെക്ടറൽ സൂചിക

സെക്ടറൽ സൂചികകളിൽ ഫാർമ, മെറ്റൽ , മീഡിയ എന്നി മേഖലകൾ മാത്രമാണ് ഇന്ന് നേട്ടത്തിലെത്തിയത്. ഫാർമ സൂചിക 1.08 ശതമാനവും മെറ്റൽ 0.18 ശതമാനവും മീഡിയ 0.14 ശതമാനവും ഉയർന്നു. അതേസമയം എഫ്‌എം‌സി‌ജി സൂചിക 1.06 ശതമാനവും റിയൽറ്റി 1.41 ശതമാനം വീതം ഇടിഞ്ഞു,

ബിഎസ്ഇ മിഡ്‌ക്യാപ്പ് സൂചിക 0.16 ശതമാനവും സ്‌മോൾക്യാപ്പ് സൂചിക 0.04 ശതമാനവും ഇടിഞ്ഞു. ഇന്ത്യ വിക്സ് 1.781 ശതമാനം ഉയർന്ന് 16.25 ൽ എത്തി.

ആഗോള വിപണികൾ

ഏഷ്യൻ വിപണികളിൽ, ദക്ഷിണ കൊറിയയുടെ കോസ്പി സൂചികയും ഹോങ്കോങ്ങിന്റെ ഹാംഗ് സെങ്ങും താഴ്ന്നപ്പോൾ ടോക്കിയോയിലെ നിക്കി 225 ഉം ഷാങ്ഹായ് എസ്എസ്ഇ കോമ്പോസിറ്റും പോസിറ്റീവ് ആയി അവസാനിച്ചു. യൂറോപ്യൻ വിപണികൾ താഴ്ന്ന നിലയിലായിരുന്നു.

ബുധനാഴ്ച യുഎസ് വിപണികൾ കുത്തനെ ഉയർന്നു. നാസ്ഡാക്ക് കോമ്പോസിറ്റ് 2.50 ശതമാനവും എസ് & പി 500 1.67 ശതമാനവും ഡൗ ജോൺസ് വ്യാവസായിക ശരാശരി 1.07 ശതമാനവും ഉയർന്നു.

ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ വില 0.03 ശതമാനം കുറഞ്ഞ് ബാരലിന് 66.10 യുഎസ് ഡോളറിലെത്തി. ഡോളറിനെതിരെ രൂപയുടെ മൂല്യം 16 പൈസ ഉയർന്ന് 85.29 എന്ന നിലയിലാണ് വ്യാപാരം അവസാനിപ്പിച്ചത്.