നിക്ഷേപകരുടെ ട്രേഡിംഗ് അക്കൗണ്ടുകള്‍ക്ക് കര്‍ശന സുരക്ഷ നിര്‍ദേശിച്ച് സെബി

നിക്ഷേപകരുടെ ട്രേഡിംഗ് അക്കൗണ്ടുകള്‍ക്ക് കര്‍ശന സുരക്ഷ നിര്‍ദേശിച്ച് സെബി; അനധികൃത ഇടപാടുകള്‍ തടയാന്‍ സിം ബെന്‍ഡിംഗ് നടപ്പിലാക്കണമെന്നാണ് സെബി നിര്‍ദേശം.

യുപിഐ പേയ്‌മെന്റുകള്‍ക്ക് സമാനമാണ് ഈ സംവിധാനം. ലിങ്ക് ചെയ്ത മൊബൈല്‍ ഉപകരണവുമായും സിമ്മുമായും യുണീക് ക്ലയന്റ് കോഡ് (യുസിസി) പൊരുത്തപ്പെടുന്നതോടെ ഉപയോക്താവിന് അവരുടെ ട്രേഡിംഗ് അക്കൗണ്ടിലേക്ക് ലോഗിന്‍ ചെയ്യാന്‍ കഴിയുമെന്ന് ഉറപ്പാക്കും.

ഡെസ്‌ക്ടോപ്പുകളോ ലാപ്‌ടോപ്പുകളോ പോലുള്ള മറ്റ് ഉപകരണങ്ങളില്‍ ലോഗിന്‍ ചെയ്യാന്‍, സോഷ്യല്‍ മീഡിയ പ്ലാറ്റ്‌ഫോമുകള്‍ ഉപയോഗിക്കുന്ന ഒന്നിലധികം ലോഗിന്‍ രീതികള്‍ക്ക് സമാനമായി, ഒരു ക്യുആര്‍ കോഡ് അടിസ്ഥാനമാക്കിയുള്ള സംവിധാനമാണിത്.

പ്രാഥമിക സിം-ബൗണ്ട് ഉപകരണത്തില്‍ ഒരു ബയോമെട്രിക് പ്രാമാണീകരണവും ആവശ്യമാണ്. ഒരേ നമ്പര്‍ ഉപയോഗിക്കുന്ന കുടുംബാംഗങ്ങളുടെ ഒന്നിലധികം യുസിസികളിലേക്ക് ഒരു മൊബൈല്‍ ഉപകരണം ലിങ്ക് ചെയ്യാവുന്നതാണ്. കൂടാതെ, പ്രാഥമിക ഉപകരണം നഷ്ടപ്പെടുകയോ മാറുകയോ ചെയ്താല്‍ ഒരു ഫാള്‍ബാക്ക് സംവിധാനവും ട്രേഡിംഗ് അക്കൗണ്ട് താല്‍ക്കാലികമായി ലോക്ക്-ഇന്‍ ചെയ്യാനുള്ള സൗകര്യവും സജ്ജീകരിക്കും. നിക്ഷേപകര്‍ക്ക് തങ്ങളുടെ അക്കൗണ്ടിലേക്ക് ലോഗിന്‍ ചെയ്യുന്ന സമയത്തെയും സ്ഥലത്തെയും കുറിച്ചുള്ള വിവരങ്ങള്‍ ലഭിക്കാനും ഈ നിര്‍ദ്ദേശം സഹായിക്കുമെന്ന് സെബി അറിയിച്ചു.

നിര്‍ദ്ദേശങ്ങള്‍ ഘട്ടം ഘട്ടമായി നടപ്പിലാക്കും. യോഗ്യതയുള്ള പത്ത് സ്റ്റോക്ക് ബ്രോക്കര്‍മാര്‍ ആദ്യം ഇത് നടപ്പിലാക്കേണ്ടതുണ്ട്. തുടക്കത്തില്‍, നിക്ഷേപകര്‍ക്ക് നിര്‍ദ്ദിഷ്ട സുരക്ഷിത പ്രാമാണീകരണ സംവിധാനം തിരഞ്ഞെടുക്കുന്നതിന് ഇത് ഓപ്ഷണല്‍ ആക്കും. ട്രേഡിംഗ് അക്കൗണ്ടുകളിലെ അനധികൃത ആക്‌സസ് അല്ലെങ്കില്‍ പരിഷ്‌ക്കരണങ്ങള്‍, സിം തട്ടിപ്പ്, തെറ്റായ ഷെയര്‍ കൈമാറ്റങ്ങള്‍, മറ്റ് സുരക്ഷാ ആശങ്കകള്‍ എന്നിവയെ തുടര്‍ന്നാണ് ഈ നീക്കം.