ഓഹരി വിപണി ഇന്ന് നേട്ടത്തില്‍ അവസാനിച്ചു

ഇന്ത്യന്‍ ഓഹരി വിപണി ഇന്ന് നേട്ടത്തില്‍ അവസാനിച്ചു. സെന്‍സെക്സ് 266 പോയിന്റ് അഥവാ 0.32% ഉയര്‍ന്ന് 83,580.40 ലും നിഫ്റ്റി 51 പോയിന്റ് ഉയര്‍ന്ന് 25,693.70 ലും ക്ലോസ് ചെയ്തു.

ആഗോള വിപണിയിലെ അനിശ്ചിതത്വങ്ങളും വിവിധ സെക്ടറുകളില്‍ നടക്കുന്ന മാറ്റങ്ങളും കാരണം നിക്ഷേപകര്‍ അതീവ ജാഗ്രതയോടെ ഓഹരികള്‍ തിരഞ്ഞെടുക്കുന്ന രീതിയാണ് ഇന്ന് പ്രകടമായത്. കഴിഞ്ഞ ദിവസങ്ങളിലുണ്ടായ തിരുത്തലുകള്‍ക്ക് ശേഷം വിപണി തല്‍ക്കാലം ഒരു നിശ്ചിത പരിധിക്കുള്ളില്‍ നിലയുറപ്പിക്കാനാണ് ശ്രമിക്കുന്നത്. വരും ദിവസങ്ങളിലെ ആഗോള സൂചനകളും വിദേശ നിക്ഷേപകരുടെ നിലപാടുകളും വിപണിയുടെ അടുത്ത നീക്കത്തിന് നിര്‍ണ്ണായകമാകും.

നിഫ്റ്റി നിലവില്‍ ഒരു തിരുത്തല്‍ ഘട്ടത്തിലൂടെയാണ് കടന്നുപോകുന്നത്. 26,300-26,350 എന്ന പ്രതിരോധ മേഖല മറികടക്കാന്‍ സാധിക്കാത്തതിനെത്തുടര്‍ന്ന് വിപണിയില്‍ ഉണ്ടായ ഇടിവ് നിഫ്റ്റിയെ 25,900 എന്ന സപ്പോര്‍ട്ടിന് താഴേക്ക് എത്തിച്ചു. എന്നാല്‍, 24,900-25,000 എന്ന ഡിമാന്‍ഡ് സോണില്‍ നിന്ന് ശക്തമായ ഒരു തിരിച്ചുവരവ് നടത്താന്‍ വിപണിക്ക് സാധിച്ചു.

25,900-ന് മുകളില്‍ സ്ഥിരത കൈവരിക്കുന്നത് വരെ വിപണിയുടെ ഘടന നെഗറ്റീവ് ആയി തുടരാനാണ് സാധ്യത. വരും ദിവസങ്ങളില്‍ വിപണി 25,480-25,350 നിലവാരത്തിലേക്ക് പതുക്കെ താഴാനോ അല്ലെങ്കില്‍ ഒരു നിശ്ചിത പരിധിക്കുള്ളില്‍ തുടരാനോ ഇടയുണ്ട്. വിപണിയില്‍ വീണ്ടും ശക്തമായ മുന്നേറ്റം ഉണ്ടാകണമെങ്കില്‍ 25,900-26,000 കടമ്പ കടക്കേണ്ടതുണ്ട്. മറുവശത്ത്, 25,350-ന് താഴേക്ക് പോകുകയാണെങ്കില്‍ വിപണി വീണ്ടും 25,000 നിലവാരത്തിലേക്ക് താഴാന്‍ സാധ്യതയുണ്ട്.

ആര്‍ബിഐ പോളിസി പ്രഖ്യാപനം

ആര്‍ബിഐ തീരുമാനം: വിപണി പ്രതീക്ഷിച്ചത് പോലെ തന്നെ റിപ്പോ നിരക്ക് 5.25 ശതമാനത്തില്‍ മാറ്റമില്ലാതെ നിലനിര്‍ത്താന്‍ റിസര്‍വ് ബാങ്ക് തീരുമാനിച്ചു. പണപ്പെരുപ്പം നിയന്ത്രണവിധേയമായതും സാമ്പത്തിക വളര്‍ച്ച സുസ്ഥിരമായി തുടരുന്നതും കണക്കിലെടുത്താണ് ഗവര്‍ണര്‍ സഞ്ജയ് മല്‍ഹോത്രയുടെ നേതൃത്വത്തിലുള്ള സമിതി ഈ തീരുമാനമെടുത്തത്.

'ന്യൂട്രല്‍' നിലപാട് തുടരുന്നതിലൂടെ ഭാവിയില്‍ സാഹചര്യങ്ങള്‍ക്കനുസരിച്ച് മാറ്റങ്ങള്‍ വരുത്താനുള്ള പഴുതും ആര്‍ബിഐ നിലനിര്‍ത്തിയിട്ടുണ്ട്.

മേഖല തിരിച്ചുള്ള പ്രകടനം: ഇന്ന് എഫ്.എം.സി.ജി മേഖലയാണ് വിപണിയെ നയിച്ചത്. ഈ ഇന്‍ഡക്‌സ് 2.3% നേട്ടമുണ്ടാക്കി. സ്വകാര്യ ബാങ്കുകള്‍, റിയല്‍റ്റി, കണ്‍സ്യൂമര്‍ ഡ്യൂറബിള്‍സ് ഓഹരികളും നേട്ടത്തില്‍ വ്യാപാരം അവസാനിപ്പിച്ചു. എന്നാല്‍ ഐടി മേഖലയിലെ തളര്‍ച്ച ഇന്നും തുടര്‍ന്നു; ഐടി ഇന്‍ഡക്‌സ് 1.5% ഇടിഞ്ഞു. ഫാര്‍മ സെക്ടറും ഇന്ന് നേരിയ നഷ്ടത്തിലാണ് ക്ലോസ് ചെയ്തത്.

ശ്രദ്ധേയമായ ഓഹരികള്‍: എഫ്.എം.സി.ജി ഭീമനായ ഐടിസി ആണ് ഇന്നത്തെ താരം. ഓഹരി വില 5 ശതമാനത്തിലധികം ഉയര്‍ന്ന് 326 രൂപ നിലവാരത്തിലെത്തി. കോട്ടക് മഹീന്ദ്ര ബാങ്ക്, ഹിന്ദുസ്ഥാന്‍ യൂണിലീവര്‍, ഭാരതി എയര്‍ടെല്‍, ബജാജ് ഫിനാന്‍സ് എന്നിവയും നേട്ടമുണ്ടാക്കിയ പ്രധാന ഓഹരികളാണ്. അതേസമയം ടിസിഎസ്, ടെക് മഹീന്ദ്ര, അദാനി പോര്‍ട്‌സ് എന്നിവ വിപണിയിലെ പ്രധാന നഷ്ടക്കാരായി.