ഭാരത്‌പേ സഹസ്ഥാപകൻ അഷ്‌നീർ ഗ്രോവർ രാജിവച്ചു

ഡെല്‍ഹി : ഭാരത്‌പേ സഹസ്ഥാപകൻ അഷ്‌നീർ ഗ്രോവർ കമ്പനിയിൽ നിന്നും അതിന്റെ ബോർഡിൽ നിന്നും രാജിവച്ചു. ഭാരത്‌പേയുടെ മാനേജിംഗ് ഡയറക്‌ടറായിരുന്ന ഗ്രോവർ, ഫിൻടെക് ബോർഡിന് അയച്ച ഇമെയിലിൽ, വർഷത്തിന്റെ തുടക്കം മുതൽ തന്നെ 'അപമാനിക്കപ്പെട്ടു' എന്ന് പറഞ്ഞു. കൊട്ടക് മഹീന്ദ്ര ബാങ്ക് ജീവനക്കാരനെ അധിക്ഷേപിച്ചതിന്റെ ഓഡിയോ ക്ലിപ്പ് ഓൺലൈനിൽ പ്രചരിച്ചതിനെത്തുടർന്ന് നടന്ന രണ്ട് മാസത്തോളം നീണ്ട നാടകീയ നീക്കങ്ങൾക്ക് ശേഷമാണ് രാജി.

സിംഗപ്പൂർ ഇന്റർനാഷണൽ ആർബിട്രേഷൻ സെന്റർ (എസ്‌ഐഎസി) കഴിഞ്ഞയാഴ്ച, കമ്പനിക്കുള്ളിൽ നടന്നുകൊണ്ടിരിക്കുന്ന 'ഗവേണൻസ് അവലോകന'ത്തിനെതിരെ ഗ്രോവറിന്റെ അടിയന്തര അപേക്ഷ നിരസിച്ചതിന്റെ പശ്ചാത്തലത്തിലാണ് ഗ്രോവറിന്റെ രാജി.

സാമ്പത്തിക ക്രമക്കേട് സംബന്ധിച്ച ആരോപണത്തെ തുടര്‍ന്ന് ഫിന്‍ടെക് കമ്പനിയായ ഭാരത് പേയുടെ സഹ സ്ഥാപകനും മാനേജിംഗ് ഡയറക്ടറുമായ അഷ്നീര്‍ ഗ്രോവറുടെ ഭാര്യ മാധുരി ജയിന്‍ ഗ്രോവറെ കമ്പനി തലപ്പത്ത് നിന്നും പുറത്താക്കിയിരുന്നു. കമ്പനിയുടെ എംപ്ലോയി സ്റ്റോക്ക് ഓണര്‍ഷിപ്പ് പ്ലാന്‍ (ഇഎസ്ഒപി) സംബന്ധിച്ച ചുമതലകളില്‍ നിന്നും മാധുരിയെ ഒഴിവാക്കുകയും ചെയ്തു.

സൗന്ദര്യ ചികിത്സ നടത്തുന്നതിനും ഇലക്ട്രോണിക്ക് സാധനങ്ങള്‍ വാങ്ങുന്നതിനും യുഎസ്, ദുബായ് എന്നീ രാജ്യങ്ങളിലേക്ക് യാത്ര ചെയ്യുന്നതിനും കമ്പനിയുടെ ഫണ്ട് ഉപയോഗിച്ചു എന്നാണ് മാധുരിക്ക് എതിരെയുള്ള ആരോപണം.

മാത്രമല്ല കമ്പനി അക്കൗണ്ടുകളില്‍ നിന്നും പേഴ്സണല്‍ സ്റ്റാഫിന് പണം നല്‍കിയെന്നും അത് മറയ്ക്കാന്‍ പരിചയക്കാരില്‍ നിന്നും വ്യാജ ഇന്‍വോയിസ് സംഘടിപ്പിച്ച് ഹാജരാക്കിയെന്നും മാധുരിക്കെതിരെ ആരോപണമുണ്ട്.