ചിത്ര രാമകൃഷ്ണന്റെ മുന്കൂ ർ ജാമ്യാപേക്ഷ തള്ളി

ഡെല്‍ഹി : എന്‍എസ്ഇ മുന്‍ സിഇഒ ചിത്ര രാമകൃഷ്ണന്റെ മുന്‍കൂര്‍ ജാമ്യാപേക്ഷ ഡെല്‍ഹി സിബിഐ കോടതി തള്ളി. ഇതോടെ എന്‍എസ്ഇ കോ ലൊക്കേഷന്‍ കേസ് അന്വേഷിക്കുന്ന സിബിഐ സംഘം ചിത്രയെ ഉടന്‍ അറസ്റ്റ് ചെയ്‌തേക്കും. എന്‍എസ്ഇ മുന്‍ ഗ്രൂപ്പ് ഓപ്പറേറ്റിംഗ് ഓഫിസര്‍ ആനന്ദ് സുബ്രഹ്‌മണ്യത്തെ കേസില്‍ നേരത്തെ അറസ്റ്റ് ചെയ്തിരുന്നു. ആനന്ദിന്റെ അറസ്റ്റ് നടന്നയുടന്‍ തന്നെ ചിത്ര മുന്‍കൂര്‍ ജാമ്യം ലഭിക്കുന്നതിനുള്ള നടപടികള്‍ ആരംഭിച്ചിരുന്നു.

എക്‌സ്‌ചേഞ്ചിന്റെ അടുത്ത് തന്നെ ബ്രോക്കര്‍മാര്‍ക്ക് അവരുടെ സിസ്റ്റം (സെര്‍വര്‍) സ്ഥാപിക്കുന്നതിനുള്ള സൗകര്യം നല്‍കുന്നതാണ് കോ ലൊക്കേഷന്‍ സമ്പ്രദായം. ഇതില്‍ ക്രമക്കേട് നടത്തിയിയെന്ന് തെളിഞ്ഞതിന് പിന്നാലെയാണ് ചിത്രയ്‌ക്കെതിരെ സെബി 2018ല്‍ കേസെടുത്തത്. അല്‍ഗോറിതമിക്ക് ട്രേഡിംഗ് വേഗത്തിലാക്കാന്‍ ചില ഉയര്‍ന്ന ഫ്രീക്വന്‍സി ട്രേഡേഴ്‌സിന് അന്യായമായി പ്രവേശനം നല്‍കി എന്നാണ് കേസ്.

ഈ വര്‍ഷം ഫെബ്രുവരി 11നാണ് ചിത്ര രാമകൃഷ്ണനെതിരായ അന്വേഷണ റിപ്പോര്‍ട്ട് സെബി പുറത്ത് വിട്ടത്. എന്‍എസ്ഇയുടെ തലപ്പത്തിരിക്കേ ഔദ്യോഗികമായ കാര്യങ്ങളില്‍ ചിത്ര തീരുമാനമെടുത്തിരുന്നത് ഒരു അഞ്ജാത യോഗിയുടെ നിര്‍ദ്ദേശപ്രകാരമായിരുന്നുവെന്നും, ആനന്ദ് സുബ്രഹ്‌മണ്യന്‍ തന്നെയായിരുന്നു ഈ അജ്ഞാത യോഗിയെന്നും റിപ്പോര്‍ട്ട് വ്യക്തമാക്കിയിരുന്നു. ഈവൈ (ഏണസ്റ്റ് ആന്‍ഡ് യംങ്) നടത്തിയ ഫോറന്‍സിക്ക് പരിശോധനയിലാണ് അജ്ഞാത യോഗി ആനന്ദ് സുബ്രഹ്‌മണ്യന്‍ തന്നെയാണെന്ന് തെളിഞ്ഞത്.