പിഎന്‍ബി പോസിറ്റിവ് പേ സംവിധാനം തുടങ്ങി

പത്ത് ലക്ഷം രൂപയ്ക്ക് മുകളിലുള്ള ചെക്കുകള്‍ക്ക് പോസിറ്റീവ് പേ സംവിധാനം പഞ്ചാബ് നാഷണല്‍ ബാങ്ക് നടപ്പാക്കി തുടങ്ങി. ഏപ്രില്‍ നാലു മുതലാണ് ഈ സംവിധാനം നടപ്പാക്കിയത്. സുരക്ഷാ കാരണങ്ങള്‍ മുന്‍നിര്‍ത്തി് 2021 ജനുവരി 1 മുതല്‍ 50,000 രൂപയ്ക്ക് മുകളിലുള്ള ചെക്കുകള്‍ മാറാന്‍ 'പോസിറ്റീവ് പേ സിസ്റ്റം' കൊണ്ടുവരണമെന്ന് ആര്‍ബി ഐ ബാങ്കുകളോട് നിര്‍ദേശിച്ചിരുന്നു. ഉയര്‍ന്ന മൂല്യമുള്ള ചെക്കുകളിലെ തട്ടിപ്പുകള്‍ക്ക്് തടയിടാന്‍ ആര്‍ ബി ഐ കൊണ്ടു വന്ന സംവിധാനമാണ് 'പോസിറ്റിവ് പേ'.

ഇതനുസരിച്ച് ചെക്ക് പണമാക്കി മാറ്റാന്‍ ബാങ്കിലെത്തുമ്പോള്‍ ചെക്ക് കൈമാറിയ ആള്‍ മുമ്പേ നല്‍കിയിട്ടുള്ള വിവരങ്ങള്‍ ഒത്തു നോക്കിയാവും പണം കൈമാറുക. 50,000 രൂപയില്‍ കൂടുതല്‍ മൂല്യമുള്ള ചെക്കുകള്‍ക്കാണ് ബാങ്കുകള്‍ ഈ സംവിധാനം സുരക്ഷാ തട്ട് എന്ന നിലയില്‍ ഏര്‍പ്പെടുത്തിരിക്കുന്നത്. അതായത് തടസമേതുമില്ലാതെ പണകൈമാറ്റം പൂര്‍ത്തിയാക്കാന്‍ അര ലക്ഷത്തിന് മുകളിലുള്ള ചെക്കുകള്‍ നല്‍കുമ്പോള്‍ നിങ്ങള്‍ ബാങ്കില്‍ വിവരം അറിയിച്ചിരിക്കണം.

അല്ലെങ്കില്‍ ചെക്ക് മടങ്ങിയേക്കാം. പോസിറ്റീവ് പേ സംവിധാനത്തില്‍ ഉയര്‍ന്ന മൂല്യമുള്ള ചെക്ക് നല്‍കുമ്പോള്‍ അതിന്റെ വിശദാംശങ്ങള്‍ ബാങ്കിനെ നെറ്റ് ബാങ്കിംഗ് വഴിയോ മൊബൈല്‍ ബാങ്കിംഗ് വഴിയോ അറിയിച്ചിരിക്കണം. പേര്, ചെക്ക് നമ്പര്‍, തുക, തീയതി, അക്കൗണ്ട് നമ്പര്‍, എന്നിവയാണ് ബാങ്ക് ശാഖയില്‍ നല്‍കേണ്ടത്. നേരിട്ടും അറിയിക്കാം. ഈ വര്‍ഷം ജനുവരി 21 മുതലാണ് ഇത് പ്രാബല്യത്തില്‍ വന്നതെങ്കിലും ബാങ്കുകള്‍ ഇപ്പോഴാണ് ഇത് നടപ്പാക്കുന്നത്.