സ്വര്‍ണവിലയില്‍ ഇടിവ്: രൂപയും തളര്‍ച്ചയില്‍ തന്നെ

സംസ്ഥാനത്ത് സ്വര്‍ണവിലയില്‍ ഇടിവ്. ഇന്ന് പവന് 120 രൂപ കുറഞ്ഞ് 37,440 രൂപയായി (22 കാരറ്റ്). ഗ്രാമിന് 15 രൂപയാണ് കുറഞ്ഞത്. 4,680 രൂപയാണ് ഗ്രാമിന് ഇന്നത്തെ വില. കഴിഞ്ഞ രണ്ട് ദിവസമായി സ്വര്‍ണവിലയില്‍ മാറ്റമുണ്ടായിരുന്നില്ല. 24 കാരറ്റ് സ്വര്‍ണത്തിന് പവന് 124.80 രൂപ കുറഞ്ഞ് 40,843.20 ആയി. ഗ്രാമിന് 15.60 രൂപ കുറഞ്ഞ് 5,105.40ല്‍ എത്തി. ഇന്ന് വെള്ളി വില ഗ്രാമിന് 50 പൈസ കുറഞ്ഞ് 62.50ല്‍ എത്തി. 8 ഗ്രാമിന് 4 രൂപ കുറഞ്ഞ് 500 രൂപയിലാണ് വ്യാപാരം നടക്കുന്നത്.

ദുര്‍ബ്ബലമായ ആഗോള വ്യാപാരത്തിനിടയില്‍ സെന്‍സെക്സ് 340.76 പോയിന്റ് ഇടിഞ്ഞു. നഷ്ടത്തില്‍ തുടങ്ങിയ ആദ്യഘട്ട വ്യാപാരത്തില്‍ സെന്‍സെക്സ് 54,054.47 ലെത്തി. എന്‍എസ്ഇ നിഫ്റ്റി 72.65 പോയിന്റ് താഴ്ന്ന് 16,143.35 ലെത്തി. രാവിലെ 10.55 ഓടെ നഷ്ടം കുറഞ്ഞു. സെന്‍സെക്സ് 175 പോയിന്റ് നഷ്ടത്തില്‍ 54,219.81 ലേക്കും, നിഫ്റ്റി 60 പോയിന്റ് താഴ്ന്ന് 16,155.80 ലേക്കും എത്തി. ബെന്റ് ക്രൂഡിന്റെ വില ബാരലിന് 105.1 ഡോളറായി.

ഇന്ന് വ്യാപാരം ആരംഭിച്ചപ്പോള്‍ ഡോളറിനെതിരെ രൂപയുടെ മൂല്യം 79.76ലേക്ക് എത്തി. ഇതുവരെയുള്ളതിലെ റെക്കോര്‍ഡ് തകര്‍ച്ചയാണ് രൂപയുടെ മൂല്യത്തിലുണ്ടായിരിക്കുന്നത്. ഇന്റര്‍ബാങ്ക് ഫോറക്‌സ് എക്‌സ്‌ചേഞ്ചില്‍ വ്യാപാരം ആരംഭിച്ചപ്പോള്‍ 79.61 എന്ന നിലയിലായിരുന്നു രൂപ.

കഴിഞ്ഞ ദിവസം വ്യാപാരം അവസാനിച്ചപ്പോള്‍ ഡോളറിനെതിരെ രൂപയുടെ മൂല്യം 22 പൈസ താഴ്ന്ന് 79.48ല്‍ എത്തി. വെള്ളിയാഴ്ച്ച രൂപയുടെ മൂല്യം 10 പൈസ ഇടിഞ്ഞ് 79.23ലാണ് വ്യാപാരം അവസാനിച്ചത്. ആഗോളതലത്തില്‍ ഡോളര്‍ ശക്തിപ്പെടുന്നതും വിദേശ നിക്ഷേപം പിന്‍വലിക്കപ്പെടുന്നതും രൂപയ്ക്ക് തിരിച്ചടിയാകുകയാണ്.