'പൊന്നിന്ന് മിന്നി': പവന് 280 രൂപ വര്‍ധന

കൊച്ചി: സംസ്ഥാനത്ത് സ്വര്‍ണവിലയില്‍ വര്‍ധന. ഇന്ന് പവന് 280 രൂപ വര്‍ധിച്ച് 37,440 രൂപയില്‍ എത്തി (22 കാരറ്റ്). ഗ്രാമിന് 35 രൂപ വര്‍ധിച്ച് 4,680 രൂപയായി. കഴിഞ്ഞ ദിവസം പവന് 104 രൂപ കുറഞ്ഞ് 37,160 രൂപയില്‍ എത്തിയിരുന്നു. ഇന്ന് 24 കാരറ്റ് സ്വര്‍ണം പവന് 304 രൂപ വര്‍ധിച്ച് 40,848 രൂപയായി. ഗ്രാമിന് 38 രൂപ വര്‍ധിച്ച് 5,106 രൂപയായിട്ടുണ്ട്.

ഇക്കഴിഞ്ഞ ശനിയാഴ്ച്ചയും തിങ്കളാഴ്ച്ചയും സ്വര്‍ണവിലയില്‍ മാറ്റമുണ്ടായിരുന്നില്ല. സംസ്ഥാനത്ത് വെള്ളി ഗ്രാമിന് 61.20 രൂപയാണ് വില. എട്ട് ഗ്രാമിന് 489.60 രൂപയാണ്. ഇന്ന് ഡോളറിനെതിരെ രൂപയുടെ മൂല്യം 79.95 എന്ന നിലയില്‍ തുടരുന്നു (ഇന്ന് ഉച്ചയ്ക്ക് 12:31 പ്രകാരം). വ്യാപാരം ആരംഭിച്ചപ്പോള്‍ രൂപയുടെ മൂല്യം 80.13 എന്ന നിലയിലായിരുന്നു.

ആഗോള വിപണിയിലെ നേട്ടത്തിന്റെ പിന്തുടര്‍ച്ചയില്‍ ഉറച്ച തുടക്കത്തോടെ വിപണി ആദ്യഘട്ട വ്യാപാരം ആരംഭിച്ചു. രാവിലെ 10.54 ന് സെന്‍സെക്സ് 731.08 പോയിന്റ് ഉയര്‍ന്ന് 56,547.35 ലും, നിഫ്റ്റി 200.30 പോയിന്റ് ഉയര്‍ന്ന് 16,842.10 ലുമാണ് വ്യാപാരം നടക്കുന്നത്.

ബജാജ് ഫിനാന്‍സ്, ബജാജ് ഫിന്‍സെര്‍വ്, ഇന്‍ഡസ്ഇന്‍ഡ് ബാങ്ക്, ടാറ്റ സ്റ്റീല്‍, ഇന്‍ഫോസിസ്, വിപ്രോ, ടെക് മഹീന്ദ്ര, കൊട്ടക് മഹീന്ദ്ര ബാങ്ക് എന്നിവയാണ് ആദ്യഘട്ട വ്യാപാരത്തില്‍ നേട്ടമുണ്ടാക്കിയ ഓഹരികള്‍. ഡോ റെഡ്ഡീസ്, സണ്‍ഫാര്‍മ, ഭാര്‍തി എയര്‍ടെല്‍, അള്‍ട്രടെക് സിമെന്റ് എന്നീ ഓഹരികളാണ് വ്യാപാരത്തുടക്കത്തില്‍ നഷ്ടം നേരിട്ടത്.