Indian Railway-ട്രാക്കിലെ പുതിയ ഘട്ടം, 2025ലെ ഇന്ത്യൻ റെയിൽവേ പരിഷ്കാരങ്ങൾ

2025ൽ ഇന്ത്യൻ റെയിൽവേ യാത്രക്കാർക്ക് വലിയ ആശ്വാസമാകുന്ന നിരവധി മാറ്റങ്ങളാണ് നടപ്പിലാക്കിയത്. രാജ്യത്തുടനീളം 122 പുതിയ ട്രെയിനുകൾ ട്രാക്കിലെത്തിച്ചതിനൊപ്പം, നിലവിലുള്ള സർവീസുകൾ ദീർഘിപ്പിക്കുകയും, ഫ്രീക്വൻസി വർധിപ്പിക്കുകയും, നിരവധി ട്രെയിനുകളെ സൂപ്പർഫാസ്റ്റായി മാറ്റുകയും ചെയ്തു. വിവിധ റെയിൽവേ സോണുകളിലായി സർവീസുകൾ വേഗത്തിലാക്കിയതിലൂടെ ട്രെയിൻ യാത്രകളിലെ തിരക്ക് കുറയ്ക്കാനും യാത്ര കൂടുതൽ സുഖകരമാക്കാനും സാധിച്ചുവെന്നാണ് വിലയിരുത്തൽ.

സെൻട്രൽ, ഈസ്റ്റ് കോസ്റ്റ് മേഖലകളിൽ മാറ്റങ്ങൾ

സെൻട്രൽ റെയിൽവേ മേഖലയിൽ നാല് പുതിയ ട്രെയിനുകൾ അവതരിപ്പിച്ചു. ആറു ട്രെയിനുകളുടെ സർവീസ് ദീർഘിപ്പിച്ചപ്പോൾ 30 ട്രെയിനുകളുടെ വേഗത വർധിപ്പിച്ചു. ഈസ്റ്റ് കോസ്റ്റ് റെയിൽവേയിൽ നാല് പുതിയ ട്രെയിനുകൾ അവതരിപ്പിക്കുകയും നാല് ട്രെയിനുകൾ നീട്ടുകയും മൂന്ന് ട്രെയിനുകൾ വേഗത്തിലാക്കുകയും ചെയ്തു.

ഈസ്റ്റേൺ മേഖലയിലെ വിപുലീകരണം

ഈസ്റ്റ് സെൻട്രൽ റെയിൽവേയിൽ 20 പുതിയ ട്രെയിനുകൾ ആരംഭിച്ചു. 20 ട്രെയിനുകൾ ദീർഘിപ്പിക്കുകയും 12 ട്രെയിനുകൾ സൂപ്പർഫാസ്റ്റായി മാറ്റുകയും ചെയ്തു. ഈസ്റ്റേൺ റെയിൽവേയിൽ ആറു പുതിയ ട്രെയിനുകൾ അവതരിപ്പിച്ചു. നാല് ട്രെയിനുകൾ നീട്ടിയതോടൊപ്പം 32 ട്രെയിനുകളുടെ വേഗതയും വർധിപ്പിച്ചു.

നോർത്ത് സെൻട്രൽ മുതൽ നോർത്ത് ഈസ്റ്റേൺ വരെ

നോർത്ത് സെൻട്രൽ റെയിൽവേയിൽ രണ്ട് പുതിയ ട്രെയിനുകൾ ആരംഭിച്ചു. നാല് ട്രെയിനുകൾ നീട്ടി. രണ്ട് ട്രെയിനുകളുടെ ഫ്രീക്വൻസിയും ഒരു ട്രെയിനിന്റെ വേഗതയും വർധിപ്പിച്ചു. നോർത്ത് ഈസ്റ്റേൺ റെയിൽവേയിൽ എട്ട് പുതിയ ട്രെയിനുകൾ കൂട്ടിച്ചേർത്തു. നാല് ട്രെയിനുകൾ നീട്ടുകയും രണ്ട് ട്രെയിനുകളുടെ ഫ്രീക്വൻസി വർധിപ്പിക്കുകയും 12 ട്രെയിനുകളുടെ വേഗത കൂട്ടുകയും ചെയ്തു.

ഫ്രോണ്ടിയർ, നോർതേൺ മേഖലകളിലെ വേഗത വർധന

നോർത്ത് ഈസ്റ്റേൺ ഫ്രോണ്ടിയർ റെയിൽവേയിൽ 10 പുതിയ ട്രെയിനുകൾ ട്രാക്കിലെത്തി. 36 ട്രെയിനുകളുടെ വേഗത വർധിപ്പിച്ചു. നോർതേൺ റെയിൽവേയിൽ 20 പുതിയ ട്രെയിനുകൾ ആരംഭിക്കുകയും 10 ട്രെയിനുകൾ ദീർഘിപ്പിക്കുകയും 24 ട്രെയിനുകൾ വേഗത്തിലാക്കുകയും ചെയ്തു.

നോർത്ത് വെസ്റ്റേൺ റെയിൽവേയിൽ റെക്കോർഡ് വേഗ വർധന

നോർത്ത് വെസ്റ്റേൺ റെയിൽവേയിൽ 12 പുതിയ ട്രെയിനുകൾ ആരംഭിച്ചു. ആറു ട്രെയിനുകൾ നീട്ടി. രണ്ട് ട്രെയിനുകളുടെ ഫ്രീക്വൻസി വർധിപ്പിച്ചു. അതോടൊപ്പം 89 ട്രെയിനുകളുടെ വേഗത വർധിപ്പിച്ചതാണ് ഈ മേഖലയിലെ പ്രധാന നേട്ടം. രാജ്യവ്യാപകമായി നടപ്പിലാക്കിയ ഈ മാറ്റങ്ങൾ യാത്രക്കാരുടെ തിരക്ക് ലഘൂകരിക്കാനും സമയ ലാഭം ഉറപ്പാക്കാനും ഇന്ത്യൻ റെയിൽവേയുടെ സേവന നിലവാരം ഉയർത്താനും സഹായിച്ചതായാണ് വിലയിരുത്തൽ.