Adani Group AI Investment : എഐ ഹബ് ആകാന്‍ ഇന്ത്യ, നിക്ഷേപവുമായി അദാനി

ആർട്ടിഫിഷ്യൽ ഇന്റലിജൻസ് രംഗത്ത് ഇന്ത്യയെ ആഗോള ശക്തിയാക്കാൻ ലക്ഷ്യമിട്ട് അദാനി ഗ്രൂപ്പ് വമ്പൻ നിക്ഷേപ പദ്ധതി പ്രഖ്യാപിച്ചു. രാജ്യത്തുടനീളം പുനരുപയോഗ ഊർജ്ജത്തിൽ പ്രവർത്തിക്കുന്ന എഐ അധിഷ്ഠിത ഡാറ്റാ സെന്ററുകൾ സ്ഥാപിക്കാൻ 2035ഓടെ 100 ബില്യൺ യുഎസ് ഡോളർ നിക്ഷേപിക്കാനാണ് പദ്ധതി. ഇന്ത്യയെ ലോകത്തിന്റെ എഐ ഹബ്ബാക്കി മാറ്റുകയാണ് ഗ്രൂപ്പിന്റെ ലക്ഷ്യം.

ഗൂഗിൾ, മൈക്രോസോഫ്റ്റ്, ഫ്ലിപ്കാർട്ട് പങ്കാളികൾ

പദ്ധതിയുടെ ഭാഗമായി ഗൂഗിൾ , മൈക്രോസോഫ്ട് , ഫ്ലിപ്കാർട് എന്നിവയുമായി അദാനി ഗ്രൂപ്പ് പങ്കാളിത്തത്തിൽ ഏർപ്പെട്ടു. വിശാഖപട്ടണത്ത് ഗൂഗിളുമായി ചേർന്ന് രാജ്യത്തെ ഏറ്റവും വലിയ എഐ ഡാറ്റാ സെന്റർ ക്യാമ്പസ് നിർമ്മിക്കും. ഹൈദരാബാദ്, പൂനെ എന്നിവിടങ്ങളിൽ മൈക്രോസോഫ്റ്റുമായി ചേർന്നുള്ള പദ്ധതികളും നടപ്പാക്കും.

നിക്ഷേപം 250 ബില്യൺ ഡോളറിലേക്ക്

100 ബില്യൺ ഡോളറിന് പുറമെ അടുത്ത പത്ത് വർഷത്തിനുള്ളിൽ സർവർ നിർമ്മാണം, ക്ലൗഡ് സേവനങ്ങൾ ഉൾപ്പെടെയുള്ള അനുബന്ധ മേഖലകളിൽ 150 ബില്യൺ ഡോളർ കൂടി നിക്ഷേപിക്കും. ഇതോടെ 2035ഓടെ ഇന്ത്യയിലെ എഐ ആവാസവ്യവസ്ഥയിലെ മൊത്തം നിക്ഷേപം 250 ബില്യൺ ഡോളറിലെത്തും.

പുനരുപയോഗ ഊർജ്ജത്തിൽ പ്രവർത്തനം

ഗുജറാത്തിലെ ഖാവ്ദയിലെ വമ്പൻ പുനരുപയോഗ ഊർജ്ജ പദ്ധതിയിൽ നിന്നായിരിക്കും ഡാറ്റാ സെന്ററുകൾക്ക് ആവശ്യമായ വൈദ്യുതി ലഭ്യമാക്കുക. സെർവറുകൾ, ട്രാൻസ്ഫോർമറുകൾ, കൂളിംഗ് സിസ്റ്റങ്ങൾ ഉൾപ്പെടെയുള്ള ഉപകരണങ്ങൾ ഇന്ത്യയിൽ തന്നെ നിർമ്മിച്ച് ഇറക്കുമതി ആശ്രയം കുറയ്ക്കാനാണ് പദ്ധതി.

ഇന്ത്യ എഐ നിർമ്മാതാക്കളായി മാറണം

ലോകം ഇന്റലിജൻസ് വിപ്ലവത്തിലേക്ക് കടക്കുകയാണെന്നും ഈ മാറ്റത്തിന് നേതൃത്വം നൽകാൻ ഇന്ത്യയ്ക്ക് കഴിവുണ്ടെന്നും ഗ്രൂപ്പ് ചെയർമാൻ Gautam Adani വ്യക്തമാക്കി. ഇന്ത്യ എഐയുടെ ഉപയോക്താവായി മാത്രം നിൽക്കാതെ നിർമ്മാതാവും കയറ്റുമതിക്കാരുമായി മാറണമെന്നാണ് പദ്ധതിയുടെ ലക്ഷ്യം.

യുവാക്കൾക്ക് എഐ പരിശീലനം

ഭാവി തൊഴിൽ വിപണിക്ക് അനുയോജ്യമായി യുവാക്കളെ സജ്ജരാക്കാൻ സർവകലാശാലകളുമായി ചേർന്ന് പ്രത്യേക എഞ്ചിനീയറിംഗ് പ്രോഗ്രാമുകളും എഐ ഗവേഷണ ലാബുകളും ആരംഭിക്കും. ഇന്ത്യൻ സ്റ്റാർട്ടപ്പുകൾക്കും ഗവേഷകർക്കും ആവശ്യമായ സൗകര്യങ്ങളും ഒരുക്കും.