Nirmala Sitharaman Records : തുട‍ർച്ചയായി ഒൻപത് ബജറ്റുകൾ; പുതുചരിത്രത്തിനരികെ നിർമലാ സീതാരാമൻ

രാജ്യത്തെ ആദ്യ ഫുൾടൈം വനിതാ ധനമന്ത്രിയായ നി‍ർമലാ സീതാരാമൻ ഒരു പുതുറെക്കോഡിനരികെയാണ്. തുടർച്ചയായ ഒൻപത് ബജറ്റുകൾ അവതരിപ്പിക്കാൻ ഒരുങ്ങുകയാണ് ധനമന്ത്രി. തുടർച്ചയായ ആറ് ബജറ്റ് അവതരിപ്പിച്ച മൊറാർജി ദേശായിയുടെ മുൻ റെക്കോർഡ് നേരത്തെ തന്നെ നിർമലാ സീതാരാമൻ മറികടന്നിരുന്നു. നിർമലാ സീതാരാമൻ്റെ പേരിൽ മറ്റൊരു റെക്കോർഡുമുണ്ട്.

ധനമന്ത്രി എന്ന നിലയിൽ ഏറ്റവും ദൈർഘ്യമേറിയ ബജറ്റ് പ്രസംഗം. 2020 ഫെബ്രുവരി ഒന്നിന് അവതരിപ്പിച്ച ബജറ്റ് രണ്ട് മണിക്കൂറും 42 മിനിറ്റും നീണ്ടുനിന്നു. ഇതോടെ ഇന്ത്യയിലെ ഏറ്റവും ദൈർഘ്യമേറിയ ബജറ്റ് പ്രസംഗത്തിനുള്ള റെക്കോർഡ് സ്വന്തമാക്കുകയായിരുന്നു. ആദ്യ പേപ്പർ രഹിത ബജറ്റ് അവതരിപ്പിച്ചതും നിർമലാ സീതാരാമനാണ് . അച്ചടിച്ച രേഖകൾ അവതരിപ്പിക്കുന്നതിനു പകരം ഡിജിറ്റൽ ടാബ്‌ ഉപയോഗിച്ച് 2021 ഫെബ്രുവരി 1-നാണ് നിർമലാ സീതാരാമൻ ഇന്ത്യയിലെ ആദ്യ പേപ്പർ രഹിത ബജറ്റ് അവതരിപ്പിക്കുന്നത്.

ബജറ്റ് പെട്ടിക്ക് പകരം ബാഗ്

2019-ൽ, ബജറ്റ് അവതരണത്തിനായി കൊളോണിയൽ കാലഘട്ടത്തിലെ ബ്രീഫ്‌കേസ് കൊണ്ടുപോകുന്ന പാരമ്പര്യവും നിർമലാ സീതാരാമൻ ഉപേക്ഷിച്ചിരുന്നു. പകരം ബജറ്റ് രേഖകൾ കൊണ്ടുപോകാൻ പരമ്പരാഗത തുണി സഞ്ചി ഉപയോഗിച്ചതും ഏറെ ശ്രദ്ധേയമായിരുന്നു. 2019 മെയ് മാസത്തിൽ അധികാരത്തിലെത്തിയ നിർമലാസീതാരാമൻ ഫുൾടൈമായി ധനകാര്യ, കോർപ്പറേറ്റ്കാര്യ വകുപ്പുകൾ വഹിക്കുന്ന ആദ്യ വനിതയാണ്. കൊവിഡ്പോലുള്ള പ്രതിസന്ധി ഘട്ടങ്ങളിലും ഇന്ത്യൻ സമ്പദ്‍വ്യവസ്ഥയുടെ വളർച്ച ഉറപ്പാക്കുന്നതിനും വലിയ പരിക്കില്ലാതെ സമ്പദ്‍വ്യവസ്ഥയെ രക്ഷിക്കുന്നതിനും സ്വീകരിച്ച നടപടികൾ ശ്രദ്ധേയമായിരുന്നു.