ആഗോള അനിശ്ചിതത്വങ്ങള്‍ ബജറ്റില്‍ പ്രതിഫലിച്ചതായി ധനമന്ത്രി

ഇന്ത്യയുടെ സമ്പദ്വ്യവസ്ഥ ശക്തമാണെന്ന് ധനമന്ത്രി നിര്‍മ്മല സീതാരാമന്‍. എന്നാല്‍ 2026-27 ലെ കേന്ദ്ര ബജറ്റ് തയ്യാറാക്കുമ്പോള്‍ ഭൗമരാഷ്ട്രീയ സംഘര്‍ഷങ്ങള്‍, വ്യാപാര തടസ്സങ്ങള്‍ തുടങ്ങിയ ആഗോള അനിശ്ചിതത്വങ്ങള്‍ പരിഗണിച്ചിരുന്നതായും കേന്ദ്ര ബജറ്റ് അവതരിപ്പിച്ച ശേഷം നടന്ന പത്രസമ്മേളനത്തില്‍ മന്ത്രി വ്യക്താക്കി.

ആഗോള അനിശ്ചിതത്വം പല ആഭ്യന്തര മേഖലകളെയും അഭിമുഖീകരിക്കുന്നുണ്ട്. എംഎസ്എംഇകള്‍, തുണിത്തരങ്ങള്‍, തുകല്‍, ഷൂ അപ്പറുകള്‍, ഗ്രാമീണ സമ്പദ് വ്യവസ്ഥ, കര്‍ഷകര്‍, വനിതാ സംരംഭകര്‍ എന്നിവര്‍ക്കായി ബജറ്റ് നിരവധി പദ്ധതികള്‍ നിര്‍ദ്ദേശിച്ചിട്ടുണ്ടെന്നും മന്ത്രി പറഞ്ഞു.

2027 സാമ്പത്തിക വര്‍ഷത്തിലെ ധനക്കമ്മി ലക്ഷ്യം 2026 സാമ്പത്തിക വര്‍ഷത്തേക്കാള്‍ നേരിയ തോതില്‍ മാത്രം കുറച്ചു. അത് കൈവരിക്കാന്‍ കഴിയുമെന്നാണ് കരുതുന്നത്. 2027 സാമ്പത്തിക വര്‍ഷത്തില്‍, ജിഡിപിയുടെ 4.3% ധനക്കമ്മിയാണ് കേന്ദ്രം ലക്ഷ്യമിടുന്നത്, ഇത് 2026 സാമ്പത്തിക വര്‍ഷത്തില്‍ കണക്കാക്കിയ 4.4% നേക്കാള്‍ അല്പം കുറവാണ്.

പുതിയ സാമ്പത്തിക രൂപരേഖയിലൂടെ, 2026-27 ബജറ്റ് എസ്റ്റിമേറ്റ് പ്രകാരം കേന്ദ്ര സര്‍ക്കാരിന്റെ കടവും ജിഡിപിയും തമ്മിലുള്ള അനുപാതം ജിഡിപിയുടെ 55.6% ആയി കുറയ്ക്കുമെന്നും ബജറ്റ് നിര്‍ദ്ദേശിച്ചിട്ടുണ്ട്.

എങ്കിലും, സാമ്പത്തിക ഏകീകരണ പദ്ധതിയെക്കുറിച്ച് നിരവധി വിശകലന വിദഗ്ധര്‍ ആശങ്കാകുലരാണ്. യുഎസ് താരിഫുകളുമായി ബന്ധപ്പെട്ട പരിഹരിക്കപ്പെടാത്ത പ്രശ്‌നങ്ങളാണിതിനുകാരണം. എന്നാല്‍ ദീര്‍ഘകാല വളര്‍ച്ച മുന്നില്‍ക്കണ്ടുകൊണ്ടുള്ള നടപടികളും പദ്ധതികളുമാണ് ബജറ്റില്‍ നിര്‍ദ്ദേശിച്ചിരിക്കുന്നതെന്നാണ് ഔദ്യോഗിക വൃത്തങ്ങള്‍ വിശദീകരിക്കുന്നത്.