ബുള്ളറ്റ് ട്രെയിന്‍ പദ്ധതി; 40,000 കോടിയുടെ അധിക ബാധ്യത, പദ്ധതി മുടങ്ങുമോ?

മുംബൈ-അഹമ്മദാബാദ് ബുള്ളറ്റ് ട്രെയിന്‍ പദ്ധതി വന്‍ സാമ്പത്തിക പ്രതിസന്ധിയിലേക്ക്. ഗുജറാത്തിലെ ഭൂവുടമകള്‍ക്ക് നല്‍കുന്ന നഷ്ടപരിഹാരത്തുകയില്‍ ഉണ്ടായ വന്‍ വര്‍ധനവ് മൂലം പദ്ധതിയുടെ ചെലവില്‍ 40,000 കോടി രൂപയുടെ അധിക ബാധ്യത വരുമെന്ന് പ്രോജക്ട് അതോറിറ്റി ഗുജറാത്ത് ഹൈക്കോടതിയെ അറിയിച്ചു. നഷ്ടപരിഹാരത്തുകയിലെ ഈ ക്രമാതീതമായ വര്‍ധനവ് പദ്ധതിയുടെ നിലനില്‍പ്പിനെത്തന്നെ ബാധിച്ചേക്കാമെന്നും, ഇത് വഹിക്കാന്‍ കഴിഞ്ഞില്ലെങ്കില്‍ ബുള്ളറ്റ് ട്രെയിന്‍ യാഥാര്‍ത്ഥ്യമാകില്ലെന്നും അഡ്വക്കേറ്റ് ജനറല്‍ കമല്‍ ത്രിവേദി കോടതിയില്‍ മുന്നറിയിപ്പ് നല്‍കി.

സൂറത്ത്, ബറൂച്ച് ജില്ലകളിലെ ഭൂമി ഏറ്റെടുക്കലുമായി ബന്ധപ്പെട്ട് ലാന്‍ഡ് അക്വിസിഷന്‍, റീഹാബിലിറ്റേഷന്‍ ആന്‍ഡ് റീസെറ്റില്‍മെന്റ് അതോറിറ്റി പുറപ്പെടുവിച്ച ഉത്തരവുകളെ ചോദ്യം ചെയ്താണ് പ്രോജക്ട് അതോറിറ്റി ഹൈക്കോടതിയെ സമീപിച്ചത്. ഒരു കേസില്‍, ചതുരശ്ര മീറ്ററിന് 50 രൂപയായി നിശ്ചയിച്ചിരുന്ന നഷ്ടപരിഹാരം, ഭൂവുടമകളുടെ ആവശ്യപ്രകാരം റീസെറ്റില്‍മെന്റ് അതോറിറ്റി 660 രൂപയായി ഉയര്‍ത്തുകയായിരുന്നു. ഇതോടെ 85.86 ലക്ഷം രൂപ ചെലവ് വരേണ്ടിയിരുന്ന സ്ഥലത്തിന് 8.46 കോടി രൂപ നല്‍കേണ്ട അവസ്ഥയാണുണ്ടായത്.

ഇത്തരത്തില്‍ വര്‍ധിപ്പിച്ച നഷ്ടപരിഹാരത്തുകയ്ക്കെതിരെ ശക്തമായ വാദമാണ് അതോറിറ്റി ഉന്നയിക്കുന്നത്. സമീപപ്രദേശങ്ങളിലെ സമാനമായ ഭൂമികളുടെ വിപണി വില പരിഗണിക്കാതെ, വളരെ ദൂരെയുള്ള ഗ്രാമത്തിലെ ജാന്‍ട്രി മൂല്യത്തെ അടിസ്ഥാനമാക്കിയാണ് നഷ്ടപരിഹാരം കണക്കാക്കിയതെന്ന് അതോറിറ്റി ചൂണ്ടിക്കാട്ടുന്നു. ഇതിനുപുറമെ, ഗുജറാത്തിലുടനീളമുള്ള ഇത്തരം ഭൂമി ഏറ്റെടുക്കലുകളുമായി ബന്ധപ്പെട്ട് 85 അപ്പീലുകള്‍ കൂടി പരിഗണനയിലുണ്ട്. കേസില്‍ ഓഗസ്റ്റ് 5-ന് വീണ്ടും വാദം കേള്‍ക്കും.

അതിനിടെ, ഭൂമി ഏറ്റെടുക്കലിലെ തടസ്സങ്ങളും കോവിഡ് പ്രതിസന്ധിയും കാരണം ബുള്ളറ്റ് ട്രെയിന്‍ പദ്ധതിയുടെ സമയക്രമത്തിലും വലിയ മാറ്റം വന്നു. 2023-ല്‍ പൂര്‍ത്തിയാകേണ്ടിയിരുന്ന പദ്ധതി ഇപ്പോള്‍ ഘട്ടംഘട്ടമായാണ് നടപ്പിലാക്കുന്നത്. ഗുജറാത്തിലെ ആദ്യ ഭാഗം 2027-ലും, മുഴുവന്‍ ഇടനാഴിയും 2029-ഓടെ പ്രവര്‍ത്തനക്ഷമമാകുമെന്നുമാണ് നിലവിലെ പ്രതീക്ഷ. ഈ സാമ്പത്തിക തടസ്സം പദ്ധതിയുടെ ഭാവിയില്‍ എത്രത്തോളം നിര്‍ണായകമാകുമെന്നതാണ് ഇപ്പോള്‍ ഉറ്റുനോക്കപ്പെടുന്നത്.