Login 
പഠിക്കാം & സമ്പാദിക്കാം 
Home
5 July 2026 11:59 AM IST
Summary
തുണിത്തരങ്ങള്, തുകല് ഉല്പ്പന്നങ്ങള്, പാദരക്ഷകള്, സമുദ്രോത്പന്നങ്ങള്, ആഭരണങ്ങള് തുടങ്ങിയ തൊഴില്ക്ഷമതയേറിയ മേഖലകള്ക്ക് പുതിയ വിപണി സാധ്യതകള് തുറന്നുകിട്ടും
ഇന്ത്യ-യുകെ സമഗ്ര സാമ്പത്തിക, വ്യാപാര കരാര് ജൂലൈ 15 മുതല് പ്രാബല്യത്തില് വരുന്നു. ഈ കരാറിന് കീഴില് സാധനങ്ങളുടെ ഉത്ഭവം നിര്ണ്ണയിക്കുന്നതിനുള്ള നിയമങ്ങള് ധനകാര്യ മന്ത്രാലയം ഔദ്യോഗികമായി വിജ്ഞാപനം ചെയ്തു. സെന്ട്രല് ബോര്ഡ് ഓഫ് ഇന്ഡയറക്ട് ടാക്സസ് ആന്ഡ് കസ്റ്റംസ് പുറപ്പെടുവിച്ച ഈ ചട്ടങ്ങള്, ഇരുരാജ്യങ്ങളും തമ്മിലുള്ള ഉല്പ്പന്ന കൈമാറ്റത്തില് സുതാര്യതയും കൃത്യതയും ഉറപ്പാക്കിക്കൊണ്ട് വ്യാപാര നടപടിക്രമങ്ങള്ക്ക് പുതിയ അടിത്തറയൊരുക്കുന്നു.
ഇന്ത്യയില് നിന്നുള്ള കയറ്റുമതിയുടെ 99 ശതമാനത്തിനും തീരുവ രഹിത പ്രവേശനം ഉറപ്പാക്കുന്ന ഈ കരാര്, രാജ്യത്തിന്റെ സാമ്പത്തിക വളര്ച്ചയ്ക്ക് വലിയ കുതിപ്പേകും. തുണിത്തരങ്ങള്, തുകല് ഉല്പ്പന്നങ്ങള്, പാദരക്ഷകള്, സമുദ്രോത്പന്നങ്ങള്, ആഭരണങ്ങള് തുടങ്ങിയ തൊഴില്ക്ഷമതയേറിയ മേഖലകള്ക്ക് പുതിയ വിപണി സാധ്യതകള് തുറന്നുകിട്ടും. എഞ്ചിനീയറിംഗ് ഉല്പ്പന്നങ്ങള്, ഓട്ടോ ഘടകങ്ങള്, രാസവസ്തുക്കള് തുടങ്ങിയ വളര്ന്നുവരുന്ന മേഖലകള്ക്കും കരാര് വലിയ നേട്ടമായിരിക്കും. 2025-26 സാമ്പത്തിക വര്ഷത്തില് 25.12 ബില്യണ് ഡോളറിലെത്തിയ ഉഭയകക്ഷി വ്യാപാരം ഈ കരാറോടെ പുതിയ ഉയരങ്ങളിലെത്തും.
കരാറിന്റെ വിശ്വാസ്യത ഉറപ്പുവരുത്താന് കര്ശനമായ വ്യവസ്ഥകളാണ് ഏര്പ്പെടുത്തിയിരിക്കുന്നത്. മൂന്നാം രാജ്യങ്ങളില് നിന്നുള്ള ഉല്പ്പന്നങ്ങള് തെറ്റായ വഴിയിലൂടെ താരിഫ് ആനുകൂല്യങ്ങള് നേടുന്നത് തടയാന് പ്രത്യേക സുരക്ഷാ മുന്കരുതലുകളുണ്ട്. ലളിതമായ റീപാക്കേജിംഗോ അസംബ്ലിയോ മാത്രം നടത്തുന്ന ഉല്പ്പന്നങ്ങള്ക്ക് ഉത്ഭവ പദവി ലഭിക്കില്ലെന്ന് നിയമത്തില് വ്യക്തമാക്കുന്നു. കൂടാതെ, ഉത്ഭവ സര്ട്ടിഫിക്കറ്റുകളുടെ സാധുത, രേഖകള് സൂക്ഷിക്കേണ്ട കാലയളവ്, ആനുകൂല്യങ്ങള് ക്ലെയിം ചെയ്യുന്നതിനുള്ള രീതികള് എന്നിവയെക്കുറിച്ചെല്ലാം കൃത്യമായ മാര്ഗ്ഗനിര്ദ്ദേശങ്ങള് നല്കിയിട്ടുണ്ട്.
ഇന്ത്യയും യുകെയും തമ്മിലുള്ള സംയോജിത വിതരണ ശൃംഖലയെ ശക്തിപ്പെടുത്തുന്നതാണ് ഈ പുതിയ ചട്ടക്കൂട്. ആഗോള വിപണിയില് ഇന്ത്യന് ഉല്പ്പന്നങ്ങളുടെ മത്സരക്ഷമത വര്ദ്ധിപ്പിക്കുന്നതിനൊപ്പം, ഇരുരാജ്യങ്ങളും തമ്മിലുള്ള സാമ്പത്തിക പങ്കാളിത്തം കൂടുതല് ആഴത്തിലാക്കാനും ഈ ചരിത്രപരമായ കരാര് വഴിതുറക്കും.