image

16 Nov 2026 9:41 AM IST

Trade

ചൈനയോട് തോറ്റുപോകുമോ? ഇന്ത്യയുടെ വ്യാപാര കമ്മി 150 ബില്യണ്‍ ഡോളറിലേക്ക്

MyFin Desk

ചൈനയോട് തോറ്റുപോകുമോ? ഇന്ത്യയുടെ  വ്യാപാര കമ്മി 150 ബില്യണ്‍ ഡോളറിലേക്ക്
X

Summary

ചൈനയുമായുള്ള വ്യാപാരത്തില്‍ ഇപ്പോള്‍ ഓരോ മാസവും ശരാശരി 12 ബില്യണ്‍ ഡോളര്‍ കമ്മിയാണ്. ഇതേ വേഗത്തില്‍ പോയാല്‍ ഈ വര്‍ഷം അവസാനം ഇന്ത്യയുടെ വ്യാപാര കമ്മി 150 ബില്യണ്‍ ഡോളര്‍ (13.2 ലക്ഷം കോടി രൂപ) കടക്കും


ചൈനയുമായുള്ള വ്യാപാരത്തില്‍ ഇന്ത്യയുടെ കമ്മി ഇതുവരെ കാണാത്ത വിധം കുതിച്ചുയരുന്നു! 2026-27 സാമ്പത്തിക വര്‍ഷത്തിലെ ആദ്യ ഏഴ് മാസങ്ങളില്‍ (ഏപ്രില്‍-ഒക്ടോബര്‍) മാത്രം കമ്മി 82.84 ബില്യണ്‍ ഡോളര്‍ (7.3 ലക്ഷം കോടി രൂപ) കടന്നു. കഴിഞ്ഞ വര്‍ഷം ഇതേ കാലത്ത് ഇത് 64 ബില്യണ്‍ ഡോളര്‍ ആയിരുന്നു. അതായത് ഒറ്റ വര്‍ഷം കൊണ്ട് 30% വര്‍ധന! കയറ്റുമതി 38% കൂടിയിട്ടും ഇറക്കുമതി 31% കുതിച്ചതോടെ കമ്മി തടയാന്‍ ആര്‍ക്കും കഴിഞ്ഞില്ല. ഇത് വെറും കണക്കല്ല, ഇന്ത്യയുടെ നിര്‍മ്മാണ മേഖലയുടെ ഭാവിയെ തന്നെ ബാധിക്കുന്ന മുന്നറിയിപ്പാണ്.

കണക്കുകള്‍ നോക്കാം - ഏപ്രില്‍-ഒക്ടോബറില്‍ ചൈനയില്‍ നിന്ന് ഇന്ത്യ ഇറക്കുമതി ചെയ്തത് 96.61 ബില്യണ്‍ ഡോളറിന്റെ സാധനങ്ങള്‍. തിരിച്ച് ചൈനയിലേക്ക് കയറ്റുമതി ചെയ്തത് വെറും 13.77 ബില്യണ്‍ ഡോളര്‍ മാത്രം. കമ്മി 82.84 ബില്യണ്‍ ഡോളര്‍. എന്താണ് നമ്മള്‍ ഇത്രയും വാങ്ങുന്നത്? കാര്‍ബണിക് രാസവസ്തുക്കള്‍, ഇലക്ട്രോണിക് ഘടകങ്ങള്‍, ടെലികോം ഉപകരണങ്ങള്‍, ലിഥിയം-അയണ്‍ ബാറ്ററി സെല്ലുകള്‍, ഇന്റഗ്രേറ്റഡ് സര്‍ക്യൂട്ടുകള്‍, ലാപ്‌ടോപ്പുകള്‍ - ഇന്ത്യന്‍ ഫാക്ടറികള്‍ ഓടുന്നത് തന്നെ ചൈനീസ് ഭാഗങ്ങള്‍ കൊണ്ടാണ്!

ഇതാണ് ഏറ്റവും വലിയ വിരോധാഭാസം - ഇന്ത്യയുടെ സ്മാര്‍ട്ട്‌ഫോണ്‍ കയറ്റുമതി കൂടുമ്പോള്‍, അതിന് വേണ്ട ചിപ്പും ഡിസ്‌പ്ലേയും ചൈനയില്‍ നിന്ന് ഇറക്കുമതി ചെയ്യണം. സമുദ്ര ഉല്‍പ്പന്നങ്ങള്‍ 15 മടങ്ങ്, കാര്‍ബണിക് രാസവസ്തുക്കള്‍ 121%, ടെലികോം ഉപകരണങ്ങള്‍ 96% എന്നിങ്ങനെ കയറ്റുമതിയില്‍ വന്‍ കുതിപ്പുണ്ടായിട്ടും കമ്മി കുറയുന്നില്ല. കാരണം? ധനമന്ത്രി നിര്‍മ്മല സീതാരാമന്‍ തന്നെ പറയുന്നു - ജനറിക് മരുന്നുകള്‍, കാര്‍ഷിക ഉല്‍പ്പന്നങ്ങള്‍, ബോവൈന്‍ മാംസം തുടങ്ങിയ ഇന്ത്യന്‍ ഉല്‍പ്പന്നങ്ങള്‍ക്ക് ചൈന വാതില്‍ അടച്ചിരിക്കുന്നു. നികുതിയേതര തടസ്സങ്ങളാണ് ഇന്ത്യയുടെ ഏറ്റവും വലിയ ശത്രു.

ഇനി എന്ത് സംഭവിക്കും? ഇപ്പോള്‍ ഓരോ മാസവും ശരാശരി 12 ബില്യണ്‍ ഡോളര്‍ കമ്മിയാണ്. ഇതേ വേഗത്തില്‍ പോയാല്‍ ഈ വര്‍ഷം അവസാനം കമ്മി 150 ബില്യണ്‍ ഡോളര്‍ (13.2 ലക്ഷം കോടി രൂപ) കടക്കും! കഴിഞ്ഞ വര്‍ഷം (2025-26) അത് 112.16 ബില്യണ്‍ ഡോളര്‍ ആയിരുന്നു. വ്യാപാരം കൂടുന്നത് നല്ലതാണ്, പക്ഷെ ഇറക്കുമതിയെ ആശ്രയിച്ച് മാത്രം വളരുന്ന വ്യാപാരം ഇന്ത്യയെ അപകടത്തിലാക്കും. ചൈനയെ ആശ്രയിക്കാതെ ഫാക്ടറികള്‍ ഓടിക്കാന്‍ കഴിയുന്ന നാളാണ് ഇന്ത്യയുടെ യഥാര്‍ത്ഥ സ്വാതന്ത്ര്യം.