തൊട്ടിലുകള്‍ ചുരുങ്ങി, നര വര്‍ധിക്കുന്നു; ചൈനയിലെ ജനന നിരക്കില്‍ കനത്ത ഇടിവ്

ചൈനയിലെ ജനസംഖ്യ അപകടകരമാം വിധം കുറയുന്നതായി റിപ്പോര്‍ട്ട്. ജനന നിരക്ക് 2025-ല്‍ 17 ശതമാനം കുറഞ്ഞതായാണ് ലഭ്യമാകുന്ന കണക്കുകള്‍ സൂചിപ്പിക്കുന്നത്. 1949 ല്‍ ജനനനിരക്ക് റെക്കോര്‍ഡുകള്‍ ആരംഭിച്ചതിനുശേഷം ഇത്രയും കുറവ് ഇതാദ്യമാണ്. കൂടാതെ ജനസംഖ്യ തുടര്‍ച്ചയായ നാലാം വര്‍ഷമാണ് കുറയുന്നത്. വരും ദശകങ്ങളില്‍ ഈ പ്രവണത രാജ്യത്തിന്റെ സമ്പദ് വ്യവസ്ഥയെയും സമൂഹത്തെയും പുനര്‍നിര്‍മ്മിക്കുമെന്ന് വിദഗ്ദ്ധര്‍ മുന്നറിയിപ്പ് നല്‍കുന്നു.

ജനസംഖ്യയിലെ ഇടിവ്

2025 ല്‍ ചൈനയുടെ ജനസംഖ്യ 1.404 ബില്യണായിരുന്നു, മുന്‍ വര്‍ഷത്തെ 1.407 ബില്യണില്‍ നിന്ന് കുറഞ്ഞു. കഴിഞ്ഞ വര്‍ഷം ചൈനയില്‍ 7.92 ദശലക്ഷം കുട്ടികളാണ് ജനിച്ചത്. എന്നാല്‍ 2024-ലെ ജനന നിരക്ക് 9.54 ദശലക്ഷമായിരുന്നു. പീപ്പിള്‍സ് റിപ്പബ്ലിക് ഓഫ് ചൈന സ്ഥാപിതമായതിനു ശേഷമുള്ള ഏറ്റവും കുറഞ്ഞ ജനന നിരക്കാണിത്.

ജനസംഖ്യ ഇടിവിന് പിന്നിലെ കാരണങ്ങള്‍

ദശകങ്ങളായി കുടുംബ വലുപ്പം പരിമിതപ്പെടുത്തിയിരുന്ന ഒറ്റക്കുട്ടി നയത്തിന്റെ ദീര്‍ഘകാല പ്രത്യാഘാതങ്ങള്‍ വിശകലന വിദഗ്ധര്‍ ചൂണ്ടിക്കാണിക്കുന്നു. നയത്തില്‍ ഇളവ് വരുത്തിയതിനുശേഷവും, ഉയര്‍ന്ന ജീവിതച്ചെലവ്, പരിമിതമായ ശിശുസംരക്ഷണ പിന്തുണ, കുടുംബ വലുപ്പത്തോടുള്ള മനോഭാവത്തിലെ മാറ്റം തുടങ്ങിയ സാംസ്‌കാരികവും സാമ്പത്തികവുമായ ഘടകങ്ങള്‍ കൂടുതല്‍ കുട്ടികളുണ്ടാകുന്നതില്‍ നിന്ന് കുടുംബങ്ങളെ നിരുത്സാഹപ്പെടുത്തി.

സര്‍ക്കാര്‍ പ്രോത്സാഹനം പരാജയപ്പെടുന്നു

വലിയ കുടുംബങ്ങളെ പ്രോത്സാഹിപ്പിക്കുന്നതിനായി അധികാരികള്‍ നടപടികള്‍ അവതരിപ്പിച്ചിട്ടുണ്ട്. അതില്‍ ക്യാഷ് സബ്സിഡികള്‍, നികുതി ഇളവുകള്‍, വിപുലീകരിച്ച ശിശുസംരക്ഷണ സേവനങ്ങള്‍ എന്നിവ ഉള്‍പ്പെടുന്നു. കോണ്ടം നികുതി ചുമത്തുക, മാച്ച് മേക്കര്‍മാരുടെ ലെവികള്‍ നീക്കം ചെയ്യുക തുടങ്ങിയ ചില അസാധാരണ നയങ്ങളും പരീക്ഷിച്ചുനോക്കിയിട്ടുണ്ട്. എങ്കിലും, ഈ ശ്രമങ്ങള്‍ക്ക് ഇതുവരെ മാറ്റങ്ങള്‍ ഉണ്ടാക്കാന്‍ സാധിച്ചിട്ടില്ല.

ജനസംഖ്യ കുറയുന്നത് ആഗോള ആഘാതം

ഒരുകാലത്ത് ലോകത്തിലെ ഏറ്റവും ജനസംഖ്യയുള്ള രാഷ്ട്രമായിരുന്ന ചൈനയെ 2023-ല്‍ ഇന്ത്യ മറികടന്നു. ചുരുങ്ങുന്ന ജനസംഖ്യ തൊഴിലാളി ക്ഷാമം, മന്ദഗതിയിലുള്ള സാമ്പത്തിക വളര്‍ച്ച, സാമൂഹിക ക്ഷേമ സംവിധാനങ്ങളില്‍ വര്‍ദ്ധിച്ച സമ്മര്‍ദ്ദം എന്നിവയെക്കുറിച്ചുള്ള ആശങ്കകള്‍ ഉയര്‍ത്തുന്നു. ജനസംഖ്യാപരമായ മാറ്റം ചൈനയ്ക്ക് മാത്രമല്ല, ആഗോള സമ്പദ് വ്യവസ്ഥയ്ക്കും ദൂരവ്യാപകമായ പ്രത്യാഘാതങ്ങള്‍ ഉണ്ടാക്കുമെന്ന് വിദഗ്ദ്ധര്‍ വിശ്വസിക്കുന്നു.

ഇതുകൂടാതെ വയസാകുന്നവരുടെ സംഖ്യ ചൈനയില്‍ ഉയരുകയും ചെയ്യുന്നു. 2024 ലെ കണക്കുകള്‍ പ്രകാരം ചൈനയില്‍ 60 വയസ് പിന്നിട്ടവരുടെ എണ്ണം 31 കോടിയിലധികമാണ്. 2035 ആകുമ്പോഴേക്കും ഇത് 40 കോടിയിലേക്ക് എത്തും.

ചൈനയിലെ പെന്‍ഷന്‍ പ്രതിസന്ധി

ചൈനയുടെ പെന്‍ഷന്‍ പ്രതിസന്ധി അതിവേഗം പ്രായമാകുന്ന ജനസംഖ്യ, ചുരുങ്ങുന്ന തൊഴില്‍ ശക്തി, കുറഞ്ഞ ജനന നിരക്ക് എന്നിവയില്‍ നിന്നാണ് ഉണ്ടാകുന്നത്. ഇത് അതിന്റെ പെന്‍ഷന്‍ സംവിധാനത്തില്‍ കടുത്ത സമ്മര്‍ദ്ദം സൃഷ്ടിക്കുന്നു. ചില ഫണ്ടുകള്‍ 2035 ആകുമ്പോഴേക്കും ഇല്ലാതാകുമെന്നും പ്രവചിക്കപ്പെടുന്നു. ചൈന വിരമിക്കല്‍ പ്രായം ക്രമാനുഗതമായി ഉയര്‍ത്തുകയും ചെയ്യുകയാണ്. ഇത് തലമുറകള്‍ തമ്മിലുള്ള അസമത്വം വര്‍ദ്ധിപ്പിക്കുന്നതിലേക്ക് നയിക്കും.

2029 ല്‍ ചൈനീസ് ജനസംഖ്യ അതിന്റെ ഉന്നതിയിലെത്തുമെന്നും 2030 മുതല്‍ കുറയാന്‍ തുടങ്ങുമെന്നും പീപ്പിള്‍സ് ഡെയ്ലി നേരത്തെ മുന്നറിയിപ്പ് നല്‍കിയിരുന്നു. ചൈനീസ് അക്കാദമി ഓഫ് സോഷ്യല്‍ സയന്‍സസിന്റെ 'ഗ്രീന്‍ ബുക്ക് ഓഫ് പോപ്പുലേഷന്‍ ആന്‍ഡ് ലേബര്‍' റിപ്പോര്‍ട്ട് പ്രകാരം 2029 ല്‍ ചൈനയുടെ ജനസംഖ്യ 1.44 ബില്യണ്‍ ആകുമെന്നും അടുത്ത വര്‍ഷം മുതല്‍ കുറയാന്‍ തുടങ്ങുമെന്നും പറയുന്നു. 2050 ല്‍ ചൈനയുടെ ജനസംഖ്യ 1.36 ബില്യണ്‍ ആയി കുറയുമെന്നും 2065 ല്‍ ഏകദേശം 1.25 ബില്യണ്‍ ആയി കുറയുമെന്നുമാണ് കരുതപ്പെടുന്നത്.