നഷ്ടം കുറച്ച് സ്വിഗ്ഗി; വരുമാനത്തില്‍ 45 ശതമാനം വര്‍ധനവ്, ഇന്‍സ്റ്റാമാര്‍ട്ടിന് റെക്കോര്‍ഡ് വളര്‍ച്ച

ഫുഡ് ഡെലിവറി പ്ലാറ്റ്‌ഫോമായ സ്വിഗ്ഗി ലാഭത്തിലേക്കുള്ള ദൂരം അതിവേഗം കുറയ്ക്കുന്നു. 2026 സാമ്പത്തിക വര്‍ഷത്തിലെ നാലാം പാദഫലങ്ങള്‍ പുറത്തുവന്നപ്പോള്‍, കമ്പനിയുടെ നഷ്ടം മുന്‍വര്‍ഷത്തെ 1,081 കോടി രൂപയില്‍ നിന്ന് 800 കോടി രൂപയായി കുറഞ്ഞു. വരുമാനത്തില്‍ 45 ശതമാനത്തിന്റെ വന്‍ വര്‍ധനവ് രേഖപ്പെടുത്തി 6,383 കോടി രൂപയിലെത്തിയതും ഇത്തവണത്തെ പ്രത്യേകതയാണ്. പ്ലാറ്റ്ഫോം ഉപയോഗിക്കുന്ന ഉപയോക്താക്കളുടെ എണ്ണം 25.2 ദശലക്ഷമായി ഉയര്‍ന്നത് സ്വിഗ്ഗിയുടെ ജനപ്രീതി വര്‍ധിക്കുന്നതിന്റെ സൂചനയായി നിക്ഷേപകര്‍ കാണുന്നു.

സ്വിഗ്ഗിയുടെ കുതിപ്പിന് പ്രധാന കരുത്തായത് ക്വിക്ക് കൊമേഴ്സ് വിഭാഗമായ ഇന്‍സ്റ്റാമാര്‍ട്ട് ആണ്. ഇന്‍സ്റ്റാമാര്‍ട്ടിന്റെ മൊത്തം ഓര്‍ഡര്‍ മൂല്യം 68.8 ശതമാനം ഉയര്‍ന്ന് 7,881 കോടി രൂപയിലെത്തി. ഉല്‍പ്പന്നങ്ങള്‍ അതിവേഗം വീട്ടുപടിക്കല്‍ എത്തിക്കുന്ന ഈ വിഭാഗത്തില്‍ നിന്നുള്ള വരുമാനം വര്‍ധിച്ചത് കമ്പനിയുടെ മൊത്തത്തിലുള്ള സാമ്പത്തിക ഭദ്രതയ്ക്ക് മുതല്‍ക്കൂട്ടായി. നഷ്ടം കുറയുന്നതിനൊപ്പം യൂണിറ്റ് ഇക്കണോമിക്‌സ് മെച്ചപ്പെടുന്നത് ഇന്‍സ്റ്റാമാര്‍ട്ടിനെ ഉടന്‍ തന്നെ ലാഭകരമായ ഒരു ബിസിനസ്സ് മോഡലിലേക്ക് എത്തിക്കുമെന്നാണ് മാനേജ്മെന്റിന്റെ പ്രതീക്ഷ.

ഭക്ഷ്യവിതരണ രംഗത്തും കഴിഞ്ഞ 15 പാദങ്ങളിലെ ഏറ്റവും ഉയര്‍ന്ന വളര്‍ച്ചയാണ് കമ്പനി കൈവരിച്ചത്. ഈ വിഭാഗത്തിലെ മൊത്തം ഓര്‍ഡര്‍ മൂല്യം 22.6 ശതമാനം വര്‍ധിച്ചപ്പോള്‍, ക്രമീകരിച്ച എബിറ്റ്ഡ 1,000 കോടി രൂപ കടന്നു. വിപണിയിലെ തളര്‍ച്ചയെക്കുറിച്ചുള്ള ആശങ്കകളെ കാറ്റില്‍ പറത്തിക്കൊണ്ടാണ് സ്വിഗ്ഗിയുടെ ഈ മുന്നേറ്റം. കൂടാതെ, ഡൈനിംഗ് ഔട്ട് ഉള്‍പ്പെടുന്ന 'ഔട്ട് ഓഫ് ഹോം' വിഭാഗം അതിന്റെ ചരിത്രത്തിലെ ആദ്യ മുഴുവന്‍ വര്‍ഷ ലാഭം കൈവരിച്ചതും ഈ റിപ്പോര്‍ട്ടിലെ തിളക്കമാര്‍ന്ന നേട്ടമായി.

വരും വര്‍ഷങ്ങളില്‍ ഉപഭോക്താക്കളുടെ ആവശ്യങ്ങള്‍ മുന്‍കൂട്ടി കണ്ട് സേവനങ്ങള്‍ വിപുലീകരിക്കാനാണ് സ്വിഗ്ഗി ലക്ഷ്യമിടുന്നത്. 2027 സാമ്പത്തിക വര്‍ഷത്തിലേക്ക് പ്രവേശിക്കുമ്പോള്‍ ശക്തമായ ബാലന്‍സ് ഷീറ്റും ലാഭക്ഷമതയിലേക്കുള്ള കൃത്യമായ പാതയും തങ്ങള്‍ക്കുണ്ടെന്ന് ഗ്രൂപ്പ് സിഇഒ ശ്രീഹര്‍ഷ മജെറ്റി വ്യക്തമാക്കി. സ്വിഗ്ഗിയുടെ ഓരോ വിപണി ഇടപെടലുകളും കൂടുതല്‍ അച്ചടക്കത്തോടെയും ലാഭമുണ്ടാക്കുന്ന രീതിയിലുമാണ് മുന്നോട്ട് പോകുന്നതെന്ന് പുതിയ കണക്കുകള്‍ അടിവരയിടുന്നു.