കേന്ദ്രത്തിന്റെ ധനക്കമ്മി 4.7 ശതമാനത്തിലേക്കോ? അധിക ബാധ്യത 1.2 ലക്ഷം കോടി; ചെലവ് ചുരുക്കല്‍ നടപടിക്ക് കേന്ദ്രം

കേന്ദ്ര സർക്കാരിന്റെ സാമ്പത്തിക കണക്കുകൂട്ടലുകൾക്ക് തിരിച്ചടിയായി ധനക്കമ്മി ഉയരാൻ സാധ്യത. 2026-27 സാമ്പത്തിക വർഷത്തിൽ ബജറ്റിൽ ലക്ഷ്യമിട്ടതിനെക്കാൾ 1.2 ലക്ഷം കോടി രൂപയുടെ അധിക ധനക്കമ്മി ഉണ്ടായേക്കുമെന്നാണ് എസ്ബിഐ റിസർച്ചിന്റെ റിപ്പോർട്ട്. ഇതോടെ ജിഡിപിയുടെ 4.3 ശതമാനമായി നിശ്ചയിച്ചിരുന്ന ധനക്കമ്മി ലക്ഷ്യം 4.7 ശതമാനത്തിലേക്ക് ഉയരാൻ സാധ്യതയുണ്ടെന്നും റിപ്പോർട്ട് ചൂണ്ടിക്കാട്ടുന്നു. സബ്സിഡി ചെലവുകളിലെ വർധനയും നികുതി വരുമാനത്തിലെ കുറവുമാണ് പ്രധാനമായും സർക്കാരിന്റെ സാമ്പത്തിക സ്ഥിതിക്ക് സമ്മർദമാകുന്നത്.

ധനക്കമ്മി ഉയരാൻ പ്രധാന കാരണങ്ങൾ

ഇന്ധന എക്സൈസ് തീരുവയിൽ വരുത്തിയ കുറവ് മൂലം 1.1 ലക്ഷം കോടി രൂപയുടെ വരുമാന നഷ്ടമാണ് സര്‍ക്കാര്‍ പ്രതീക്ഷിക്കുന്നത്. ഇതിന് പുറമെ വളം സബ്സിഡിക്കായി 90,000 കോടി രൂപയുടെ അധിക ചെലവും പെട്രോളിയം, എൽപിജി സബ്സിഡികൾക്കായി 48,000 കോടി രൂപയോളവും വേണ്ടിവരുമെന്നാണ് എസ്ബിഐ റിസർച്ചിന്റെ വിലയിരുത്തൽ.

ഇതെല്ലാം കൂടി സർക്കാരിന്റെ ധനകാര്യ കണക്കുകളിൽ വലിയ സമ്മർദം സൃഷ്ടിക്കുന്നുണ്ട്. അതേസമയം, ധനക്കമ്മി കണക്കാക്കാൻ ഉപയോഗിക്കുന്ന ജിഡിപിയുടെ അടിസ്ഥാന വർഷത്തിലും മാറ്റമുണ്ട്. 2022-23 അടിസ്ഥാനമാക്കിയുള്ള പുതിയ ജിഡിപി കണക്കാണ് എസ്ബിഐ റിസർച്ച് വിലയിരുത്തിയത്. എന്നാൽ ബജറ്റ് എസ്റ്റിമേറ്റ് തയ്യാറാക്കിയത് 2011-12 അടിസ്ഥാനമാക്കിയായിരുന്നു. ഈ മാറ്റവും ധനക്കമ്മി കണക്കുകളെ സ്വാധീനിക്കുന്ന ഘടകമാണ്.

ചെലവ് ചുരുക്കേണ്ടി വരുമോ?

അധിക ധനക്കമ്മി നിയന്ത്രിക്കാൻ സർക്കാർ ചെലവുകൾ വെട്ടിക്കുറയ്ക്കേണ്ടി വരുമെന്നാണ് റിപ്പോർട്ടിലെ പ്രധാന വിലയിരുത്തൽ. അധികമായി കടമെടുക്കാതെ തന്നെ സാമ്പത്തിക ബാധ്യത കൈകാര്യം ചെയ്യാൻ സർക്കാരിന് സാധിക്കുമെന്നാണ് എസ്ബിഐ റിസർച്ച് പ്രതീക്ഷിക്കുന്നത്. ഇതിനായി കൈവശമുള്ള പണശേഖരം പ്രയോജനപ്പെടുത്തുന്നതിനൊപ്പം വിവിധ ചെലവുകൾ നിയന്ത്രിക്കേണ്ടിവരും.

കഴിഞ്ഞ മൂന്ന് വർഷത്തിനിടെ ശരാശരി 45,000 കോടി രൂപയുടെ ചെലവ് കുറയ്ക്കാൻ സർക്കാരിന് സാധിച്ചിട്ടുണ്ടെന്നും റിപ്പോർട്ട് ചൂണ്ടിക്കാട്ടുന്നു. ബജറ്റിൽ നിശ്ചയിച്ച ധനക്കമ്മി ലക്ഷ്യത്തിനുള്ളിൽ തുടരണമെങ്കിൽ ചെലവ് നിയന്ത്രണം മാത്രമായിരിക്കും പ്രധാന വഴിയെന്നും റിപ്പോർട്ട് വ്യക്തമാക്കുന്നു.

സർക്കാരിന്റെ പണശേഖരത്തിൽ വർധന

അതേസമയം, സർക്കാരിന്റെ പണശേഖരത്തിൽ കാര്യമായ വർധനയുണ്ടായിട്ടുണ്ട്. കോർ ലിക്വിഡിറ്റി ക്രമീകരണങ്ങൾക്കുശേഷമുള്ള സർക്കാരിന്റെ ക്യാഷ് ബാലൻസ് 2026 ഒക്ടോബർ അവസാനത്തോടെ ഏകദേശം 8.5 ലക്ഷം കോടി രൂപയിലെത്തിയെന്നാണ് കണക്ക്. കഴിഞ്ഞ വർഷം ഇതേ സമയത്ത് ഇത് 2.2 ലക്ഷം കോടി രൂപ മാത്രമായിരുന്നു.

എന്നാൽ 2027 മാർച്ച് അവസാനത്തോടെ ഈ പണശേഖരം 2.5 ലക്ഷം കോടി രൂപയായി കുറയുമെന്നാണ് എസ്ബിഐ റിസർച്ചിന്റെ പ്രവചനം.

കടമെടുപ്പിലും കുറവ്

സർക്കാരിന്റെ കടമെടുപ്പ് പദ്ധതിയിലും മാറ്റമുണ്ടായിട്ടുണ്ട്. ബോണ്ട് സ്വിച്ചുകൾ, ബൈബാക്കുകൾ എന്നിവയിലൂടെ 1.23 ലക്ഷം കോടി രൂപയുടെ കടമെടുപ്പ് ഇതിനകം കുറച്ചിട്ടുണ്ട്. ഇതോടെ നിലവിലെ കടമെടുപ്പ് കണക്ക് 17.2 ലക്ഷം കോടി രൂപയിൽനിന്ന് 15.97 ലക്ഷം കോടി രൂപയായി കുറഞ്ഞു.

ആദ്യ പകുതിയിലെ ധനക്കമ്മിയും ആശങ്കയിൽ

2026-27 സാമ്പത്തിക വർഷത്തിന്റെ ആദ്യ ആറുമാസത്തെ കണക്കുകളും സാമ്പത്തിക സമ്മർദം വ്യക്തമാക്കുന്നുണ്ട്. ഏപ്രിൽ മുതൽ സെപ്റ്റംബർ വരെയുള്ള കാലയളവിൽ ധനക്കമ്മി മുൻവർഷത്തെ അപേക്ഷിച്ച് 24.7 ശതമാനം വർധിച്ച് 7.14 ലക്ഷം കോടി രൂപയിലെത്തി. ഇതേ കാലയളവിൽ സർക്കാരിന്റെ മൊത്തം ചെലവ് 10.7 ശതമാനം വർധിച്ചപ്പോൾ വരുമാന വരവിലെ വളർച്ച 3.6 ശതമാനത്തിൽ ഒതുങ്ങി.

ജിഎസ്ടി വരുമാനത്തിൽ പ്രതീക്ഷ

അധിക ബാധ്യതയുടെ ആഘാതം കുറയ്ക്കാൻ ജിഎസ്ടി വരുമാനത്തിലെ ശക്തമായ വളർച്ചയും സർക്കാർ ഓഹരി വിറ്റഴിക്കലിലൂടെ ലഭിക്കുന്ന കൂടുതൽ വരുമാനവും സഹായിക്കുമെന്നാണ് എസ്ബിഐ റിസർച്ചിന്റെ പ്രതീക്ഷ. അതേസമയം, മൂലധനച്ചെലവിൽ നേരിയ കുറവ് വരുത്താനും സാധ്യതയുണ്ട്. എന്നാൽ വരുമാന വർധന മാത്രം മതിയാകില്ലെന്നും ചെലവുകൾ യുക്തിസഹമായി നിയന്ത്രിക്കേണ്ടത് അനിവാര്യമാണെന്നും റിപ്പോർട്ട് മുന്നറിയിപ്പ് നൽകുന്നു. ബജറ്റിലെ ധനക്കമ്മി ലക്ഷ്യം നിലനിർത്താൻ കേന്ദ്രസർക്കാർ വരും മാസങ്ങളിൽ സ്വീകരിക്കുന്ന സാമ്പത്തിക നടപടികൾ നിർണായകമാകും.