രാജ്യത്തെ 100, 500 നോട്ടുകളില്‍ മാറ്റം, അറിയേണ്ടതെല്ലാം

രാജ്യത്തെ 100, 500 നോട്ടുകളില്‍ സുരക്ഷാ നവീകരണവുമായി ആർബിഐ. ഇത് നോട്ട് അസാധുവാക്കല്‍ നടപടിയല്ല; നിലവിലുള്ള എല്ലാ നോട്ടുകളും തുടര്‍ന്നും പ്രചാരത്തിലുണ്ടാകും. കാഴ്ച പരിമിതിയുള്ളവര്‍ക്ക് തിരിച്ചറിയാന്‍ സഹായിക്കുന്ന പ്രത്യേക സംവിധാനവും പുതിയ പതിപ്പുകളില്‍ ഉള്‍പ്പെടുത്തിയിട്ടുണ്ട്.

പുതിയ നോട്ടുകളില്‍ മെച്ചപ്പെട്ട പേപ്പര്‍ ഗുണനിലവാരം, വിപുലമായ വാട്ടര്‍മാര്‍ക്കിംഗ്, നവീകരിച്ച സുരക്ഷാ ത്രെഡുകള്‍ എന്നിവ ഉള്‍പ്പെടുന്നു. ദീര്‍ഘകാലം ഉപയോഗിക്കുന്നതിനാല്‍ പഴയ നോട്ടുകളില്‍ സുരക്ഷാ സവിശേഷതകള്‍ മങ്ങുന്നതും വ്യക്തത കുറയുന്നതും പതിവാണ്. ഇത്തരം പ്രശ്‌നങ്ങള്‍ പരിഹരിക്കാനാണ് ആര്‍ബിഐയുടെ ആനുകാലിക അപ്‌ഡേറ്റുകള്‍ ലക്ഷ്യമിടുന്നത്. സാധാരണയായി അഞ്ചുമുതല്‍ ഏഴുവര്‍ഷത്തിനിടയില്‍ സുരക്ഷാ ഫീച്ചറുകളില്‍ മാറ്റം വരുത്താറുണ്ട്.

ഡിജിറ്റല്‍ പേയ്‌മെന്റുകള്‍ വളരുന്ന സാഹചര്യത്തിലും, പച്ചക്കറി മാര്‍ക്കറ്റുകളില്‍ നിന്ന് ആശുപത്രി പേയ്‌മെന്റുകള്‍, ഇന്ധന പമ്പുകള്‍, ഗതാഗതം, ചെറുകിട വ്യാപാരങ്ങള്‍ വരെ 100, 500 നോട്ടുകള്‍ ദിനംപ്രതി വ്യാപകമായി ഉപയോഗിക്കപ്പെടുന്നു. അതിനാല്‍ സുരക്ഷാ നവീകരണം അനിവാര്യമാണ്. പുതിയ പതിപ്പുകള്‍ വരും മാസങ്ങളില്‍ ക്രമേണ വിപണിയില്‍ എത്തുമെന്നാണ് കരുതുന്നത്.