പെട്രോളിന് 30 രൂപ കൂടുമോ?

പശ്ചിമേഷ്യയിൽ യുദ്ധം കടുക്കുന്നതോടെ ആഗോള എണ്ണവിപണിയിൽ വൻ പ്രത്യാഘാതങ്ങൾ പ്രവചിച്ച് സാമ്പത്തിക വിദഗ്ധർ. ബ്രെന്റ് ക്രൂഡ് ഓയിൽ വില ബാരലിന് 150 ഡോളർ വരെ ഉയർന്നേക്കാമെന്നാണ് പുതിയ മുന്നറിയിപ്പ്. ഇത് സംഭവിക്കുകയാണെങ്കിൽ ഇന്ത്യയിൽ പെട്രോൾ വില ലിറ്ററിന് 30 രൂപ വരെ വർദ്ധിക്കാൻ സാധ്യതയുണ്ടെന്ന് റിപ്പോർട്ടുകൾ ചൂണ്ടിക്കാട്ടുന്നു.

എണ്ണവിലയിലെ കുതിപ്പും ഹോർമുസ് പ്രതിസന്ധിയും

യുദ്ധം ആരംഭിച്ച ശേഷം എണ്ണവിലയിൽ ഇതുവരെ 53 ശതമാനത്തിന്റെ വർദ്ധനവാണുണ്ടായത്. തന്ത്രപ്രധാനമായ ഹോർമുസ് കടലിടുക്കിലെ ഗതാഗതം തടസ്സപ്പെട്ടാൽ പ്രതിദിനം 10 മുതൽ 14 ദശലക്ഷം ബാരൽ വരെ എണ്ണയുടെ കുറവുണ്ടാകുമെന്ന് ഡെവെരെ ഗ്രൂപ്പ് സിഇഒ നൈജൽ ഗ്രീൻ മുന്നറിയിപ്പ് നൽകുന്നു. ഈ വിടവ് നികത്തുക അസാധ്യമാണെന്നും അദ്ദേഹം വ്യക്തമാക്കുന്നു.

ഇന്ത്യയെ കാത്തിരിക്കുന്ന 'ഡ്യുവൽ ഷോക്ക്'

എലാര ക്യാപിറ്റലിന്റെ കണക്കനുസരിച്ച് ക്രൂഡ് ഓയിൽ വിലയിലെ ഓരോ വർദ്ധനവും ഇന്ത്യയ്ക്ക് വൻ ആഘാതമാകും:

125 ഡോളർ: പെട്രോൾ വിലയിൽ ലിറ്ററിന് 8 മുതൽ 14 രൂപ വരെ വർദ്ധനവ്.

150 ഡോളർ: ലിറ്ററിന് 26 മുതൽ 30 രൂപ വരെ അധിക ബാധ്യത.

സർക്കാർ ബാധ്യത: എണ്ണവിലയിലെ ഓരോ ഒരു ഡോളറിന്റെ വർദ്ധനവും പാചകവാതക സബ്സിഡി ഇനത്തിൽ സർക്കാരിന് 3,300 കോടി രൂപയുടെ അധിക ബാധ്യതയുണ്ടാക്കും.പണപ്പെരുപ്പം ഉയരുന്നതിനൊപ്പം സാമ്പത്തിക വളർച്ച മന്ദഗതിയിലാകുന്ന 'ഡ്യുവൽ ഷോക്ക്' അവസ്ഥയിലേക്കാണ് രാജ്യം നീങ്ങുന്നത്.

ഓഹരി വിപണിയിൽ തകർച്ചാ ഭീതി

യുദ്ധം നീണ്ടുപോയാൽ ഇന്ത്യൻ ഓഹരി വിപണിയിൽ 10 മുതൽ 15 ശതമാനം വരെ ഇടിവുണ്ടാകാൻ സാധ്യതയുണ്ടെന്ന് വാലന്റിസ് അഡൈ്വസേഴ്‌സിലെ ജ്യോതിവർദ്ധൻ ജയ്പുരിയ നിരീക്ഷിക്കുന്നു. മാക്വാരിയുടെ റിപ്പോർട്ട് പ്രകാരം ജൂൺ വരെ സംഘർഷം തുടരുകയാണെങ്കിൽ എണ്ണവില 200 ഡോളർ വരെ പോലും എത്തിയേക്കാം. ഇത് സെൻസെക്‌സിലും നിഫ്റ്റിയിലും വലിയ തകർച്ചയ്ക്ക് കാരണമാകും.

നിക്ഷേപകർ ജാഗ്രതൈ!

നിലവിൽ എണ്ണ വിപണിയെ നിയന്ത്രിക്കുന്നത് വെറും വിതരണവും ആവശ്യവും (Supply and Demand) മാത്രമല്ല, മറിച്ച് ആഗോള രാഷ്ട്രീയ നീക്കങ്ങളാണ്. തന്ത്രപ്രധാനമായ പാതകൾ തടയുന്നതും ആസ്തികൾ പിടിച്ചെടുക്കുന്നതും വിപണിയെ കലുഷിതമാക്കുന്നു. നിക്ഷേപകർ അതീവ ജാഗ്രത പാലിക്കേണ്ട സമയമാണിതെന്നും വിദഗ്ധർ ഓർമ്മിപ്പിക്കുന്നു.