Flash PMI:ഇന്ത്യൻ സമ്പദ്‌വ്യവസ്ഥയ്ക്ക് കരുത്തുപകർന്ന് ഉൽപ്പാദന മേഖലയിൽ വൻ മുന്നേറ്റം

ഇന്ത്യയുടെ നിർമ്മാണ-സേവന മേഖലകൾ വൻ മുന്നേറ്റത്തിന്റെ പാതയിലാണെന്ന് വ്യക്തമാക്കുന്നതാണ് പുതിയ കണക്കുകൾ. ജനുവരിയിൽ 58.4 ആയിരുന്ന എച്ച്.എസ്.ബി.സി ഫ്ലാഷ് കോമ്പോസിറ്റ് പി.എം.ഐ സൂചിക ഫെബ്രുവരിയിൽ 59.3 ആയി വർദ്ധിച്ചു. സൂചിക 50-ന് മുകളിൽ നിൽക്കുന്നത് വളർച്ചയെയാണ് സൂചിപ്പിക്കുന്നത്.

ഉൽപ്പന്നങ്ങൾക്കുള്ള ആവശ്യകത വർദ്ധിച്ചതും പുതിയ ഓർഡറുകളുടെ ഒഴുക്കുമാണ് ഈ വളർച്ചയ്ക്ക് ആധാരമായത്. നവംബറിന് ശേഷമുള്ള ഏറ്റവും വേഗത്തിലുള്ള വളർച്ചയാണിത്. പ്രാദേശിക ടൂറിസം മേഖലയിലുണ്ടായ ഉണർവും മികച്ച മാർക്കറ്റിംഗ് തന്ത്രങ്ങളും വിദേശ വിപണിയിലെ ഡിമാൻഡും ഇന്ത്യൻ കമ്പനികൾക്ക് നേട്ടമായി.

മാനുഫാക്ചറിങ് രംഗത്ത് മുന്നേറ്റം

മേഖലകൾ തിരിച്ച് പരിശോധിക്കുമ്പോൾ, മാനുഫാക്ചറിംഗ് സൂചിക 55.4-ൽ നിന്ന് 57.5 ആയി ഉയർന്നു. സേവന മേഖലയിലെ സൂചിക 58.4 ആയി മാറ്റമില്ലാതെ തുടരുന്നു. കയറ്റുമതിയിൽ സേവന മേഖല മികച്ച പ്രകടനം കാഴ്ചവെക്കുമ്പോഴും, പുതിയ ബിസിനസ് ഓർഡറുകളുടെ കാര്യത്തിൽ മാനുഫാക്ചറിംഗ് മേഖലയാണ് മുന്നിൽ നിൽക്കുന്നത്.

എന്നാൽ വളർച്ചയോടൊപ്പം വിലക്കയറ്റ ഭീഷണിയും വിപണിയിൽ നിഴലിക്കുന്നുണ്ട്. അസംസ്‌കൃത വസ്തുക്കളുടെ വില കഴിഞ്ഞ 15 മാസത്തിനിടയിലെ ഏറ്റവും ഉയർന്ന നിരക്കിലെത്തി. പ്രത്യേകിച്ചും സേവന മേഖലയിൽ ചിലവ് വൻതോതിൽ വർദ്ധിക്കുന്നത് ആശങ്കയുണ്ടാക്കുന്നു. ഉപഭോക്തൃ വില സൂചികയിൽ കഴിഞ്ഞ മാസം 2.75 ശതമാനം വർദ്ധനവ് രേഖപ്പെടുത്തിയിട്ടുണ്ട്. ഈ സാഹചര്യത്തിൽ, പലിശ നിരക്കുകൾ (Repo Rate) 5.25 ശതമാനത്തിൽ തന്നെ നിലനിർത്താൻ റിസർവ് ബാങ്ക് തീരുമാനിച്ചേക്കും എന്നാണ് സൂചന.