ഭക്ഷ്യവസ്തുക്കള്‍ക്കും തുണിത്തരങ്ങള്‍ക്കും വില കുറയും

ജിഎസ്ടി കൗണ്‍സില്‍, എല്ലാ ഭക്ഷ്യ, തുണിത്തര ഉല്‍പ്പന്നങ്ങളുടെയും നികുതി 5 ശതമാനത്തിലേക്ക് മാറ്റുന്നതിനുള്ള നിര്‍ദ്ദേശം ചര്‍ച്ച ചെയ്യുമെന്ന് റിപ്പോര്‍ട്ട്. അടുത്തമാസം ആദ്യമാണ് കൗണ്‍സില്‍ യോഗം.

സിമന്റ് ഉള്‍പ്പെടെയുള്ള നിരവധി ഇനങ്ങള്‍ക്കും സലൂണ്‍, ബ്യൂട്ടി പാര്‍ലറുകള്‍ പോലുള്ള പൊതു ഉപഭോഗ സേവനങ്ങള്‍ക്കും ജിഎസ്ടി കുറയ്ക്കുന്നതിനുള്ള പദ്ധതിയും കൗണ്‍സില്‍ ചര്‍ച്ച ചെയ്‌തേക്കും. നികുതി വ്യവസ്ഥ ലളിതമാക്കാനും എല്ലാ ആശങ്കകളും അവസാനിപ്പിക്കാനും സര്‍ക്കാര്‍ ലക്ഷ്യമിടുന്നു.

സിമന്റിന്റെ ജിഎസ്ടി 28 ശതമാനത്തില്‍ നിന്ന് 18 ശതമാനമായി കുറയ്ക്കാന്‍ നിര്‍ദ്ദേശിക്കപ്പെട്ടിട്ടുണ്ട്. നിര്‍മ്മാണ, അടിസ്ഥാന സൗകര്യ മേഖലകളുടെ ദീര്‍ഘകാല ആവശ്യമായിരുന്നു ഇത്.

സാധാരണയായി ഉപയോഗിക്കുന്ന ചില സേവനങ്ങളുടെ ജിഎസ്ടി നിരക്കുകള്‍ 18 ശതമാനത്തില്‍ നിന്ന് 5 ശതമാനത്തിലേക്ക് കുറയ്ക്കാന്‍ കഴിയുമോ എന്ന് പരിശോധിക്കാന്‍ സര്‍ക്കാര്‍ വിലയിരുത്തുന്നുണ്ട്.

ചെറുകിട സലൂണുകളെ ഈ നിരക്കില്‍ നിന്ന് ഒഴിവാക്കിയിട്ടുണ്ട്, എന്നാല്‍ ഇടത്തരം, ഉയര്‍ന്ന നിലവാരമുള്ള സലൂണുകള്‍ക്ക് 18 ശതമാനം ജിഎസ്ടി നേരിടേണ്ടിവരുന്നു, അത് അവര്‍ ഉപഭോക്താക്കളിലേക്ക് അത് കൈമാറുന്നു.

വ്യക്തികള്‍ വാങ്ങുന്ന ടേം അഷ്വറന്‍സ്, ആരോഗ്യ ഇന്‍ഷുറന്‍സ് പോളിസികള്‍ക്കുള്ള ജിഎസ്ടിയും കുറയും. സേവനത്തിന്റെ വ്യാപ്തി വര്‍ദ്ധിപ്പിക്കാന്‍ ശ്രമിക്കും. കൂടാതെ 4 മീറ്റര്‍ വരെ നീളമുള്ള ചെറിയ കാറുകള്‍ക്ക് 18 ശതമാനവും വലിയവയ്ക്ക് 40 ശതമാനവും ജിഎസ്ടി ഈടാക്കും.

ധനമന്ത്രി നിര്‍മ്മല സീതാരാമന്റെ നേതൃത്വത്തില്‍ 56-ാമത് ജിഎസ്ടി കൗണ്‍സില്‍ യോഗം സെപ്റ്റംബര്‍ 3, 4 തീയതികളില്‍ ന്യൂഡല്‍ഹിയില്‍ നടക്കും. രണ്ട് ദിവസവും രാവിലെ 11 മണിക്ക് സെഷനുകള്‍ ആരംഭിക്കും. കൗണ്‍സില്‍ യോഗത്തിന് മുന്നോടിയായി, സെപ്റ്റംബര്‍ 2 ന് ദേശീയ തലസ്ഥാനത്ത് ഒരു ഓഫീസര്‍മാരുടെ യോഗം നടക്കും.

വിശദമായ അജണ്ടയും വേദിയും ഇതുവരെ പ്രഖ്യാപിച്ചിട്ടില്ല. ദസറ-ദീപാവലി ഉത്സവ സീസണിന് മുമ്പ് ജിഎസ്ടി നിരക്ക് കുറയ്ക്കല്‍ നടപ്പിലാക്കാനാണ് കേന്ദ്രം ലക്ഷ്യമിടുന്നതെന്ന് സര്‍ക്കാര്‍ വൃത്തങ്ങള്‍ അറിയിച്ചു. ഈ വര്‍ഷം ഒക്ടോബര്‍ 21 നാണ് ദീപാവലി ആഘോഷിക്കുന്നത്. ഉത്സവകാല ഡിമാന്‍ഡ് കാലയളവിന് മുന്നോടിയായി ഉപഭോക്താക്കള്‍ക്കും ബിസിനസുകള്‍ക്കും ഈ നീക്കം ആശ്വാസം നല്‍കും.