ജര്‍മ്മനിക്കാവശ്യം ഇന്ത്യന്‍ നേഴ്‌സുമാര്‍; എന്താണ് കാരണം, അവസരങ്ങള്‍ അനവധി

ജര്‍മ്മനി മെഡിക്കല്‍ നഴ്സുമാരുടെ കടുത്ത ക്ഷാമം നേരിടുന്നു. ഇത് നികത്തുന്നതിനായി ഏറ്റവും കൂടുതല്‍ ആവശ്യപ്പെടുന്ന ഗ്രൂപ്പുകളില്‍ ഒന്നായി ഇന്ത്യന്‍ പ്രൊഫഷണലുകള്‍ ഉയര്‍ന്നുവരികയാണ്. രാജ്യത്തെ പ്രായമാകുന്ന ജനസംഖ്യ ജര്‍മ്മനിക്ക് ഇന്ന് വെല്ലുവിളിയാണ്. പരിശീലനം ലഭിച്ചതും ഇംഗ്ലീഷ് സംസാരിക്കുന്നതുമായ നഴ്സുമാരെയാണ് അവിടെ ആവശ്യം. ഇതിന് അനുയോജ്യമായത് ഇന്ത്യയാണ്. അതിനാല്‍ റിക്രൂട്ട്മെന്റുകള്‍ ഇന്ത്യയിലേക്ക് കൂടുതലായി തിരിയുകയാണ്.

ജര്‍മ്മനിയിലെ ഈ അവസരം കേരളത്തിനും ഉയര്‍ന്ന സാധ്യതയാണ് നല്‍കുന്നത്. സംസ്ഥാനത്തുനിന്നും ഇതിനകം തന്നെ വളരെയധികം പേര്‍ ജോലി ചെയ്യുന്ന രാജ്യ രാജ്യമാണ് ഇന്ന് ജര്‍മ്മനി.

ജര്‍മ്മനിയിലെ ആരോഗ്യ സംരക്ഷണ പ്രതിസന്ധി

ജര്‍മ്മനിയില്‍ 30,000 മുതല്‍ 40,000 വരെ നഴ്സുമാരുടെ കുറവുണ്ട്. ജനങ്ങള്‍ പ്രായമാകുന്തോറും ഈ സ്ഥിതി കൂടുതല്‍ വഷളാകുന്നു. സമീപ വര്‍ഷങ്ങളില്‍ ആരോഗ്യ മേഖലയിലെ തൊഴില്‍ വളര്‍ച്ചയ്ക്ക് പ്രധാനമായും കാരണമായത് വിദേശികളുടെ വരവാണെന്ന് നിക്കി ഏഷ്യ റിപ്പോര്‍ട്ട് പറയുന്നു.

പരമ്പരാഗതമായി, പോളണ്ട്, ബോസ്‌നിയ, ഹെര്‍സഗോവിന, തുര്‍ക്കി, റൊമാനിയ തുടങ്ങിയ കിഴക്കന്‍ യൂറോപ്യന്‍ രാജ്യങ്ങളില്‍ നിന്നാണ് നിരവധി നഴ്സുമാര്‍ കുടിയേറുന്നത്. എങ്കിലും, റിക്രൂട്ട്മെന്റ് രീതികള്‍ മാറിക്കൊണ്ടിരിക്കുന്നു.

ജീവിത നിലവാരം ഉയരുന്നതും വേതന വ്യത്യാസങ്ങള്‍ കുറയുന്നതും കാരണം പോളണ്ടില്‍ നിന്നും തെക്കുകിഴക്കന്‍ യൂറോപ്പില്‍ നിന്നുമുള്ള കുടിയേറ്റ പ്രവാഹം കുറയുകയാണ്. ഇപ്പോള്‍ ഇന്ത്യയും ഇന്തോനേഷ്യയും പോലുള്ള രാജ്യങ്ങള്‍ നഴ്സുമാരുടെയും ആരോഗ്യ പരിപാലന പ്രൊഫഷണലുകളുടെയും പ്രധാന സ്രോതസ്സ് വിപണികളായി മാറുന്നു.

ജര്‍മ്മന്‍ നഴ്സുമാര്‍ക്ക് പ്രതിമാസം 4,000 യൂറോ ലഭിക്കും. ഈ തുക നികുതികളും സാമൂഹിക ഇന്‍ഷുറന്‍സ് സംഭാവനകളും കുറയ്ക്കുന്നതിന് മുമ്പുള്ളതാണ്. ഇത് നിരവധി ഏഷ്യന്‍ രാജ്യങ്ങളിലെ ശമ്പളത്തേക്കാള്‍ വളരെ കൂടുതലാണ്. മറ്റ് രാജ്യങ്ങളില്‍ നിന്നുള്ള നഴ്സുമാരെ നിയമിക്കുമ്പോള്‍, ജര്‍മ്മനിയിലെ ആശുപത്രികള്‍ അന്താരാഷ്ട്ര റിക്രൂട്ട്മെന്റുമായി ബന്ധപ്പെട്ട ചെലവുകള്‍ വഹിക്കാനും ബാധ്യസ്ഥരാണ്.ഇത് അന്താരാഷ്ട്ര പ്രതിഭകളെ അവിടേക്ക് ആകര്‍ഷിക്കുന്നു.

എന്തുകൊണ്ടാണ് ഇന്ത്യന്‍ നഴ്സുമാര്‍ക്ക് ജര്‍മ്മനിയില്‍ ഉയര്‍ന്ന ഡിമാന്‍ഡ്?

ജര്‍മ്മനിയിലെ വിദേശ നഴ്സിംഗ് സ്റ്റാഫുകളില്‍ ഇന്ത്യ അഞ്ചാം സ്ഥാനത്തേക്ക് ഉയര്‍ന്നു, ഏകദേശം 16,600 ഇന്ത്യന്‍ നഴ്സുമാര്‍ പരിചരണ സൗകര്യങ്ങളില്‍ ജോലി ചെയ്യുന്നുണ്ടെന്ന് നിക്കി ഏഷ്യ റിപ്പോര്‍ട്ട് പറയുന്നു.

ഇംഗ്ലീഷ് സംസാരിക്കുന്ന, ബിരുദധാരികളായ നഴ്സുമാരുടെ വലിയൊരു നിരയാണ് ഇന്ത്യയിലെ പ്രധാന നേട്ടമായി റിക്രൂട്ട്മെന്റ് ഏജന്‍സികള്‍ ഉയര്‍ത്തിക്കാട്ടുന്നത്. റിക്രൂട്ട്മെന്റ് സ്ഥാപനമായ ടെര്‍ണിന്റെ അഭിപ്രായത്തില്‍, ഇന്ത്യയില്‍ നിന്നുള്ള സാധാരണ അപേക്ഷകര്‍ 24 നും 27 നും ഇടയില്‍ പ്രായമുള്ളവരും ജോലിയുടെ ആദ്യ വര്‍ഷങ്ങളിലുമാണ്.

ജര്‍മ്മനിയില്‍ എത്ര ഇന്ത്യക്കാര്‍ താമസിക്കുന്നു?

ജര്‍മ്മനിയിലേക്കുള്ള ഇന്ത്യന്‍ കുടിയേറ്റത്തിലെ വ്യാപകമായ വര്‍ദ്ധനവിന്റെ ഭാഗമാണ് ഇന്ത്യന്‍ നഴ്സുമാരുടെ എണ്ണത്തിലെ വര്‍ധനവ്. ജര്‍മ്മനിയുടെ ഫെഡറല്‍ സ്റ്റാറ്റിസ്റ്റിക്കല്‍ ഓഫീസിന്റെ (ഡെസ്റ്റാറ്റിസ്) കണക്കുകള്‍ പ്രകാരം, 2024 ഡിസംബര്‍ വരെ ജര്‍മ്മനിയില്‍ താമസിക്കുന്ന ഇന്ത്യന്‍ പൗരന്മാരുടെ എണ്ണം 277,455 ആയിരുന്നു.

വിദേശകാര്യ മന്ത്രാലയത്തിന്റെ കണക്കനുസരിച്ച് 260,864-ലധികം ഇന്ത്യക്കാര്‍ ജര്‍മ്മനിയില്‍ താമസിക്കുന്നു. ഇത് യൂറോപ്പ് ഭൂഖണ്ഡത്തിലെ ഏറ്റവും വലിയ ഇന്ത്യന്‍ സമൂഹങ്ങളിലൊന്നായി മാറുന്നു.