എവറസ്റ്റ് കൊടുമുടിയില്‍ ഇറങ്ങിയ ഏക ഹെലികോപ്റ്റര്‍; ഇനി ഇന്ത്യയില്‍ നിര്‍മ്മിക്കും

കര്‍ണാടകയിലെ വെമഗല്‍ ഇന്ത്യന്‍ വ്യോമയാന ചരിത്രത്തിലെ ഒരു നിര്‍ണായക നാഴികക്കല്ലായി മാറി. ടാറ്റ അഡ്വാന്‍സ്ഡ് സിസ്റ്റംസ് ലിമിറ്റഡും എയര്‍ബസും ചേര്‍ന്ന് നിര്‍മ്മിക്കുന്ന എച്ച് 125 ഹെലികോപ്റ്ററുകളുടെ ആദ്യ അസംബ്ലി ലൈന്‍ പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്റ് ഇമ്മാനുവല്‍ മാക്രോണും വെര്‍ച്വലായി ഉദ്ഘാടനം ചെയ്തു. ഈ സംരംഭം, രാജ്യത്തെ ആഗോള ഹെലികോപ്റ്റര്‍ നിര്‍മ്മാണ രംഗത്ത് നിർണായകമാകും.

എവറസ്റ്റില്‍ ഇറങ്ങുന്ന ഹെലികോപ്റ്റര്‍ ഇനി 'മേക്ക് ഇന്‍ ഇന്ത്യ'

ലോകത്തിലെ ഏറ്റവും വിശ്വസനീയമായ സിംഗിള്‍-എഞ്ചിന്‍ ഹെലികോപ്റ്ററുകളില്‍ ഒന്നായ എച്ച് 125, എവറസ്റ്റിന്റെ കൊടുമുടിയില്‍ ഇറങ്ങിയ ഏക ഹെലികോപ്റ്ററെന്ന റെക്കോര്‍ഡും സ്വന്തമാക്കിയിട്ടുണ്ട്. ഉയര്‍ന്ന ചൂടിലും അത്യന്തം ഉയരങ്ങളിലും പ്രവര്‍ത്തിക്കാന്‍ കഴിയുന്ന ഈ മോഡല്‍, ലഡാക്ക്, അരുണാചല്‍ അതിര്‍ത്തികളിലെ ഇന്ത്യന്‍ സൈനിക പ്രവര്‍ത്തനങ്ങള്‍ക്ക് വലിയ പിന്തുണ നല്‍കും. എവറസ്റ്റിന്റെ ഉയരങ്ങളിലേക്ക് പറക്കാന്‍ കഴിയുന്ന ഹെലികോപ്റ്ററും ഇനി ഇന്ത്യയില്‍ നിര്‍മ്മിക്കും എന്ന് പ്രധാന മന്ത്രി നരേന്ദ്ര മോദി ചൂണ്ടിക്കാട്ടി.

1,000 കോടി രൂപയുടെ നിക്ഷേപം, നൂറുകണക്കിന് തൊഴിലവസരങ്ങള്‍

എച്ച് 125 പ്രോഗ്രാമില്‍ 1,000 കോടി രൂപയ്ക്ക് മുകളിലുള്ള നിക്ഷേപം പ്രതീക്ഷിക്കപ്പെടുന്നു. ഇത് നേരിട്ടും പരോക്ഷമായും ഇന്ത്യയിലെ യുവതലമുറയ്ക്ക് തൊഴില്‍ അവസരങ്ങള്‍ സൃഷ്ടിക്കുമെന്ന് പ്രതിരോധമന്ത്രി രാജ്‌നാഥ് സിംഗ് വ്യക്തമാക്കി. ടാറ്റയുടെ വെമഗല്‍ പ്ലാന്റില്‍ തന്നെ അസംബ്ലി മുതല്‍ ഫ്‌ലൈറ്റ് ടെസ്റ്റിംഗ് വരെയുള്ള മുഴുവന്‍ പ്രക്രിയയും നടക്കും. ദക്ഷിണേഷ്യന്‍ വിപണിയിലേക്കുള്ള കയറ്റുമതിയും ലക്ഷ്യമിടുന്ന ഈ സംരംഭം, ഇന്ത്യയുടെ പ്രതിരോധവ്യോമയാന സ്വയംപര്യാപ്തതയ്ക്ക് വലിയ ചുവടുവെപ്പാണ്.

2027-ല്‍ ആദ്യ ഇന്ത്യന്‍ നിര്‍മ്മിത എച്ച് 125 പറന്നുയരും

ടാറ്റ-എയര്‍ബസ് സംയുക്ത സംരംഭത്തില്‍ നിന്ന് 2027-ല്‍ ആദ്യ ഇന്ത്യന്‍ നിര്‍മ്മിത എച്ച് 125 പുറത്തിറങ്ങും. സിവില്‍, പാരാ-പബ്ലിക്, രക്ഷാപ്രവര്‍ത്തനം, എയര്‍ ആംബുലന്‍സ്, നിയമപാലനം തുടങ്ങി നിരവധി മേഖലകളില്‍ ഉപയോഗിക്കാവുന്നതാണ് ഈ ഹെലികോപ്റ്റര്‍. ഇത് ഇന്ത്യയുടെ വ്യോമസുരക്ഷാ ശേഷിയും വ്യവസായ ശേഷിയും ഒരുപോലെ ഉയര്‍ത്തും.