ഇന്ത്യ-ജപ്പാന്‍ വാര്‍ഷിക ഉച്ചകോടി; പ്രധാനമന്ത്രി ടോക്കിയോയില്‍

രണ്ട് ദിവസത്തെ സന്ദര്‍ശനത്തിനായി പ്രധാനമന്ത്രി നരേന്ദ്ര മോദി ടോക്കിയോയിലെത്തി. ഡൊണാള്‍ഡ് ട്രംപിന്റെ വ്യാപാര, താരിഫ് നയങ്ങളെത്തുടര്‍ന്ന് ഇന്ത്യ-യുഎസ് ബന്ധത്തില്‍ വിള്ളല്‍ വീണ സാഹചര്യത്തിലാണ് പ്രധാനമന്ത്രി മോദിയുടെ ജപ്പാന്‍ സന്ദര്‍ശനം.

സന്ദര്‍ശന വേളയില്‍, പ്രധാനമന്ത്രി മോദി 15-ാമത് ഇന്ത്യ-ജപ്പാന്‍ വാര്‍ഷിക ഉച്ചകോടിയില്‍ പങ്കെടുക്കും.

ഏഴു വര്‍ഷത്തിന് ശേഷമാണ് മോദി ജപ്പാനിലെത്തുന്നത്. പ്രധാനമന്ത്രി ഇഷിബയുമായുള്ള മോദിയുടെ ആദ്യ ഉച്ചകോടിയാണിത്. 2018 ലെ ഇന്ത്യ - ജപ്പാന്‍ ഉച്ചകോടിയിലാണ് മുമ്പ് മോദി പങ്കെടുത്തത്. ജാപ്പനീസ് പ്രധാനമന്ത്രി ഷിഗെരു ഇഷിബയുമായി പ്രധാനമന്ത്രി ഉഭയകക്ഷി ചര്‍ച്ചകള്‍ നടത്തുന്നുമുണ്ട്.

'പ്രധാനമന്ത്രി നരേന്ദ്ര മോദി ജപ്പാനിലെ ടോക്കിയോയില്‍ എത്തി. ഇന്ത്യ-ജപ്പാന്‍ പങ്കാളിത്തം മെച്ചപ്പെടുത്തുന്നതിനായി വൈകുന്നേരം പ്രധാനമന്ത്രി ഷിഗെരു ഇഷിബയുമായി വിപുലമായ ചര്‍ച്ചകള്‍ നടത്തും,' വിദേശകാര്യ മന്ത്രാലയം എക്സിലെ ഒരു പോസ്റ്റില്‍ പറഞ്ഞു.

ഇരു രാജ്യങ്ങളും തമ്മിലുള്ള നാഗരിക ബന്ധങ്ങളും സാംസ്‌കാരിക ബന്ധങ്ങളും ശക്തിപ്പെടുത്തുന്നതിനുള്ള അവസരമായിരിക്കും തന്റെ ജപ്പാന്‍ സന്ദര്‍ശനമെന്ന് യാത്രയയപ്പ് പ്രസ്താവനയില്‍ പ്രധാനമന്ത്രി മോദി പറഞ്ഞിരുന്നു.

പ്രധാനമന്ത്രിയുടെ സന്ദര്‍ശനത്തിന്റെ ആദ്യ ദിവസം നടക്കുന്ന ചര്‍ച്ചകളില്‍, ഇന്ത്യയിലെ നിക്ഷേപ ലക്ഷ്യം ഇരട്ടിയാക്കുമെന്ന് ജപ്പാന്‍ പ്രഖ്യാപിക്കുമെന്ന് കരുതുന്നു. കൂടാതെ വ്യാപാരം, നിക്ഷേപം, പ്രതിരോധം, ശാസ്ത്ര സാങ്കേതിക വിദ്യ എന്നിവയുള്‍പ്പെടെ വിവിധ മേഖലകളില്‍ സഹകരണം വിപുലീകരിക്കുന്നതിനുള്ള കരാറുകളില്‍ ഇരുപക്ഷവും എത്തിച്ചേരുമെന്നും പ്രതീക്ഷിക്കുന്നു. കൂടാതെ ടോക്കിയോയില്‍ ജാപ്പനീസ് വ്യവസായികളെയും രാഷ്ട്രീയ നേതാക്കളെയും പ്രധാനമന്ത്രി മോദി കാണുന്നുമുണ്ട്.

'കഴിഞ്ഞ 11 വര്‍ഷമായി സ്ഥിരവും ഗണ്യമായതുമായ പുരോഗതി കൈവരിച്ച തന്ത്രപരമായ പങ്കാളിത്തത്തിന്റെ അടുത്ത ഘട്ടം രൂപപ്പെടുത്തുന്നതില്‍ ഇരുരാജ്യങ്ങളും ശ്രദ്ധ കേന്ദ്രീകരിക്കും,' മോദി പറഞ്ഞു.

യാത്രയുടെ രണ്ടാം ദിവസം, പ്രധാനമന്ത്രി മോദിയും ഇഷിബയും സെന്‍ഡായ് നഗരത്തില്‍ ഒരു സെമികണ്ടക്ടര്‍ സൗകര്യം സന്ദര്‍ശിക്കാന്‍ സാധ്യതയുണ്ട്.

'നമ്മുടെ സഹകരണത്തിന് പുതിയ ചിറകുകള്‍ നല്‍കാനും, നമ്മുടെ സാമ്പത്തിക, നിക്ഷേപ ബന്ധങ്ങളുടെ വ്യാപ്തിയും അഭിലാഷവും വികസിപ്പിക്കാനും ഇരു രാജ്യങ്ങളും ശ്രമിക്കും',പ്രധാനമന്ത്രി പ്രസ്താവനയില്‍ പറഞ്ഞു.

ഓഗസ്റ്റ് 31 നും സെപ്റ്റംബര്‍ 1 നും ടിയാന്‍ജിനില്‍ നടക്കുന്ന ഷാങ്ഹായ് സഹകരണ സംഘടനയുടെ (എസ്സിഒ) വാര്‍ഷിക ഉച്ചകോടിയില്‍ പങ്കെടുക്കുന്നതിനായി പ്രധാനമന്ത്രി പിന്നീട് ചൈനയിലേക്ക് പോകും.