ഇന്ത്യ-യുഎസ് കരാര്‍ വഴിമുട്ടി? ചര്‍ച്ച നീട്ടിയത് എന്തിന്?

ഇന്ത്യയും അമേരിക്കയും തമ്മില്‍ ഒപ്പിടാനിരുന്ന നിര്‍ണ്ണായകമായ ഇടക്കാല വ്യാപാര കരാര്‍ അനിശ്ചിതത്വത്തില്‍. ഫെബ്രുവരി 23-ന് വാഷിംഗ്ടണില്‍ ആരംഭിക്കേണ്ടിയിരുന്ന ചീഫ് നെഗോഷ്യേറ്റര്‍മാരുടെ മൂന്ന് ദിവസത്തെ ചര്‍ച്ചകള്‍ അവസാന നിമിഷം മാറ്റിവെച്ചു. യുഎസ് സുപ്രീം കോടതിയുടെ പുതിയ വിധിയും അതിന് പിന്നാലെ ഡോണാള്‍ഡ് ട്രംപ് പ്രഖ്യാപിച്ച കടുത്ത ഇറക്കുമതി തീരുവയുമാണ് ചര്‍ച്ചകള്‍ക്ക് തിരിച്ചടിയായത്.

തിരിച്ചടിയായത് ട്രംപിന്റെ നീക്കം

ട്രംപ് ഭരണകൂടത്തിന്റെ മുന്‍കാലത്തെ വ്യാപകമായ താരിഫ് നയങ്ങള്‍ക്കെതിരെ യുഎസ് സുപ്രീം കോടതി വിധി പുറപ്പെടുവിച്ചിരുന്നു. ഇതിനോടുള്ള കടുത്ത പ്രതികരണമെന്നോണം, ഫെബ്രുവരി 24 മുതല്‍ ഇന്ത്യയുള്‍പ്പെടെയുള്ള എല്ലാ രാജ്യങ്ങളില്‍ നിന്നുമുള്ള ഇറക്കുമതിക്ക് 10 ശതമാനം നികുതി ഏര്‍പ്പെടുത്താന്‍ ട്രംപ് ഉത്തരവിട്ടു. 150 ദിവസത്തേക്ക് പ്രഖ്യാപിച്ച ഈ തീരുവ, തൊട്ടടുത്ത ദിവസം തന്നെ 15 ശതമാനമായി വര്‍ദ്ധിപ്പിക്കുമെന്നും അദ്ദേഹം വ്യക്തമാക്കി. പുതിയ സാഹചര്യങ്ങള്‍ വിലയിരുത്താന്‍ ഇരുരാജ്യങ്ങള്‍ക്കും കൂടുതല്‍ സമയം വേണമെന്നതിനാലാണ് ചര്‍ച്ചകള്‍ മാറ്റിവെച്ചതെന്ന് പി.ടി.ഐ റിപ്പോര്‍ട്ട് ചെയ്തു. പുതുക്കിയ തീയതി പിന്നീട് തീരുമാനിക്കും.വ്യാപാര യുദ്ധത്തിന്റെ ഈ പുതിയ അധ്യായം ഇന്ത്യന്‍ വിപണിയെയും രൂപയുടെ മൂല്യത്തെയും എങ്ങനെ ബാധിക്കുമെന്നത് വരും ദിവസങ്ങളില്‍ നിര്‍ണ്ണായകമാകും. പരസ്പര സമ്മതപ്രകാരമുള്ള പുതിയൊരു തീയതിയിലേക്ക് ചര്‍ച്ചകള്‍ മാറ്റിയെങ്കിലും, ട്രംപിന്റെ 'അമേരിക്ക ഫസ്റ്റ്' നയങ്ങള്‍ ഇന്ത്യന്‍ സാമ്പത്തിക നയതന്ത്രത്തിന് വലിയൊരു പരീക്ഷണമായിരിക്കും.