Login 
പഠിക്കാം & സമ്പാദിക്കാം 
Home
6 March 2026 10:50 AM IST
പശ്ചിമേഷ്യയിലെ യുദ്ധസാഹചര്യവും ക്രൂഡ് ഓയിൽ വില വർദ്ധനയും രൂപയുടെ മൂല്യത്തെ ബാധിക്കുന്നു.
Summary
ഡോളറിനെതിരെ രൂപയ്ക്ക് റെക്കോർഡ് തകർച്ച; പശ്ചിമേഷ്യൻ സംഘർഷവും ഇന്ത്യ-യുഎസ് വ്യാപാര കരാറിലെ അനിശ്ചിതത്വവും വെല്ലുവിളിയാകുന്നു.
85ല് നിന്ന് 90-ലേക്ക് വീഴാന് രൂപയ്ക്ക് എടുത്തത് വെറും 231 ദിവസങ്ങള്! ഇപ്പോള് ലക്ഷ്യം 94. ആഗോള വിപണിയിലെ യുദ്ധഭീഷണിയും ഇന്ത്യ-യുഎസ് വ്യാപാര കരാറിലെ അനിശ്ചിതത്വവും നമ്മുടെ രൂപയെ റെക്കോര്ഡ് തകര്ച്ചയിലേക്ക് തള്ളിവിടുകയാണോ? പശ്ചിമേഷ്യയിലെ സംഘര്ഷങ്ങള് വെറുമൊരു യുദ്ധവാര്ത്തയല്ല, അത് നിങ്ങളുടെ പോക്കറ്റിനെയും ബാധിക്കും. ഹോര്മുസ് കടലിടുക്കിലെ തടസ്സങ്ങള് നീണ്ടുനിന്നാല് ആഗോള എണ്ണവില കുതിച്ചുയരുമെന്ന് ഗോള്ഡ്മാന് സാക്സിലെ ചീഫ് ഇന്ത്യ ഇക്കണോമിസ്റ്റ് ശാന്തനു സെന്ഗുപ്ത മുന്നറിയിപ്പ് നല്കുന്നു. ഇത് ഇന്ത്യയുടെ കറന്റ് അക്കൗണ്ട് ഡെഫിസിറ്റ് 20 മുതല് 30 ബേസിസ് പോയിന്റ് വരെ വര്ദ്ധിപ്പിക്കാന് കാരണമാകും. എണ്ണവില ഉയര്ന്നാല് അത് രൂപയുടെ മൂല്യത്തെ നേരിട്ട് ബാധിക്കുമെന്നതില് തര്ക്കമില്ല.
94ലേക്കോ?
വരും മാസങ്ങളില് അമേരിക്കന് ഡോളറിനെതിരെ ഇന്ത്യന് രൂപയുടെ മൂല്യം 93 മുതല് 94 വരെ എന്ന നിലയിലേക്ക് കൂപ്പുകുത്താന് സാധ്യതയുണ്ടെന്നും ഗോള്ഡ്മാന് സാക്സ് വ്യക്തമാക്കുന്നു. എണ്ണവില ഉയര്ന്നുതന്നെ നിന്നാല് രൂപയുടെ മൂല്യം ഇതിലും താഴേക്ക് പോകാനുള്ള സാധ്യത തള്ളിക്കളയാനാവില്ല. റിസര്വ് ബാങ്കിന്റെ കൃത്യമായ ഇടപെടലുകളും ഇന്ത്യയുടെ പക്കലുള്ള വന്തോതിലുള്ള വിദേശനാണ്യ ശേഖരവും രൂപയുടെ വലിയ തകര്ച്ച തടയാന് സഹായിക്കും. അതേസമയം, യുബിഎസ് രൂപയുടെ മൂല്യത്തില് നേരത്തെ തന്നെ മുന്നറിയിപ്പ് നല്കിയിട്ടുണ്ട്. ഏഷ്യ എഫ്എക്സ് സ്ട്രാറ്റജി തലവന് രോഹിത് അറോറയുടെ നിരീക്ഷണമനുസരിച്ച്, 2026-ല് രൂപയുടെ മൂല്യം 4 ശതമാനം കൂടി ഇടിഞ്ഞ് ഡോളറിനെതിരെ 94 എന്ന നിലവാരത്തിലേക്ക് എത്തിയേക്കാം. ഗോള്ഡ്മാന് സാക്സും രൂപയുടെ മൂല്യം 93-94 പരിധിയില് തുടരാനാണ് സാധ്യത കല്പ്പിക്കുന്നത്. ഇന്ത്യ-യുഎസ് വ്യാപാര കരാര് വൈകുന്നതും, കുറഞ്ഞ നോമിനല് ജിഡിപി കാരണം രാജ്യത്തുനിന്ന് മൂലധനം പുറത്തേക്ക് പോകുന്നതും രൂപയെ കൂടുതല് സമ്മര്ദ്ദത്തിലാക്കുന്നു.
പേടിക്കേണ്ട സാഹചര്യമുണ്ടോ?
ബിഎന്പി പാരിബാസിലെ ചന്ദ്രേഷ് ജെയിന് പറയുന്നത് ഇന്ത്യയുടെ മാക്രോ ഇക്കണോമിക് സാഹചര്യം മുന്പത്തെക്കാള് ശക്തമാണെന്നാണ്. രൂപയുടെ മൂല്യം അമിതമായി ഇടിയാതിരിക്കാന് റിസര്വ് ബാങ്ക് ഓഫ് ഇന്ത്യയുടെ ഇടപെടലുകളും നമ്മുടെ ശക്തമായ വിദേശനാണ്യ ശേഖരവും ഒരു കവചമായി പ്രവര്ത്തിക്കും. എങ്കിലും ആര്ബിഐയുടെ പരിമിതമായ ഇടപെടലുകള് നിലവില് വിപണിയില് ചെറിയ തോതില് ആശങ്കയുണ്ടാക്കുന്നുണ്ട്.ചുരുക്കത്തില്, ആഗോള രാഷ്ട്രീയ സാഹചര്യങ്ങളും എണ്ണവിലയും വരും മാസങ്ങളില് ഇന്ത്യന് രൂപയുടെ ഗതി നിര്ണ്ണയിക്കും. രൂപയുടെ ഈ ഇടിവ് നിങ്ങളുടെ നിക്ഷേപങ്ങളെയും ഇറക്കുമതി ചെലവുകളെയും എങ്ങനെ ബാധിക്കുമെന്ന് കൃത്യമായി മനസ്സിലാക്കി വേണം മുന്നോട്ട് പോകാന്.