ഇന്ത്യയുടെ അസംസ്‌കൃത എണ്ണ ഇറക്കുമതിച്ചെലവ് വര്‍ധിച്ചു. ആഗോള വിപണിയില്‍ ക്രൂഡ് ഓയില്‍ വില കുതിച്ചുയര്‍ന്നതാണ് കാരണം

ആഗോള വിപണിയില്‍ ക്രൂഡ് ഓയില്‍ വില കുതിച്ചുയര്‍ന്നതോടെ ഇന്ത്യയുടെ എണ്ണ ഇറക്കുമതി ചെലവ് ആറുമാസത്തിനിടെ 46 ശതമാനത്തിലധികം വര്‍ധിച്ചു. ഏപ്രില്‍ മുതല്‍ സെപ്റ്റംബര്‍ വരെയുള്ള കാലയളവില്‍ എണ്ണ ഇറക്കുമതിക്കായി ഇന്ത്യ ചെലവിട്ടത് 90.6 ബില്യണ്‍ ഡോളറാണ്. കഴിഞ്ഞ വര്‍ഷത്തെ അപേക്ഷിച്ച് ഇറക്കുമതി അളവില്‍ കാര്യമായ മാറ്റമില്ലാതിരുന്നിട്ടും ചെലവ് കുത്തനെ ഉയരുകയായിരുന്നു.

പെട്രോളിയം പ്ലാനിങ് ആന്‍ഡ് അനാലിസിസ് സെല്‍ പുറത്തുവിട്ട കണക്കുകള്‍ പ്രകാരം, ഈ കാലയളവില്‍ 12.27 കോടി ടണ്‍ ക്രൂഡ് ഓയിലാണ് ഇന്ത്യ ഇറക്കുമതി ചെയ്തത്. കഴിഞ്ഞ വര്‍ഷം ഇതേ കാലയളവില്‍ ഇത് 12.18 കോടി ടണ്ണായിരുന്നു. സെപ്റ്റംബറില്‍ മാത്രം ഇറക്കുമതി ബില്‍ 46.6 ശതമാനം ഉയര്‍ന്ന് 15.4 ബില്യണ്‍ ഡോളറിലെത്തി. ഇറക്കുമതി അളവ് 6.8 ശതമാനം വര്‍ധിച്ച് 2.17 കോടി ടണ്ണായി.

പശ്ചിമേഷ്യന്‍ സംഘര്‍ഷം

പശ്ചിമേഷ്യയിലെ സംഘര്‍ഷങ്ങളും എണ്ണ വിതരണത്തിലുണ്ടാകാവുന്ന തടസ്സങ്ങളുമാണ് വില ഉയരാനുള്ള പ്രധാന കാരണങ്ങള്‍. ഹോര്‍മുസ് കടലിടുക്കുമായി ബന്ധപ്പെട്ട അമേരിക്ക-ഇറാന്‍ സംഘര്‍ഷവും സൗദിയിലെ ഊര്‍ജ അടിസ്ഥാനസൗകര്യങ്ങള്‍ക്കെതിരായ ഹൂതി ആക്രമണങ്ങളും വിപണിയില്‍ ആശങ്ക വര്‍ധിപ്പിച്ചിട്ടുണ്ട്. ചെങ്കടലിലെ കപ്പല്‍ ഗതാഗതവുമായി ബന്ധപ്പെട്ട അപകടസാധ്യതകളും എണ്ണവിലയെ സ്വാധീനിക്കുന്നു.

ലോകത്തിലെ മൂന്നാമത്തെ വലിയ ക്രൂഡ് ഓയില്‍ ഇറക്കുമതി രാജ്യമായ ഇന്ത്യയ്ക്ക് ആവശ്യമായ എണ്ണയുടെ 85 ശതമാനത്തിലധികവും ഇറക്കുമതിയിലൂടെയാണ് ലഭിക്കുന്നത്. അതിനാല്‍ ആഗോള വിലയിലെ വര്‍ധന രാജ്യത്തിന്റെ സമ്പദ്വ്യവസ്ഥയ്ക്ക് വലിയ വെല്ലുവിളിയാണ്. എണ്ണയുടെ ലഭ്യതയേക്കാള്‍ ഉയര്‍ന്ന ഇറക്കുമതി വിലയാണ് ഇപ്പോള്‍ പ്രധാന ആശങ്ക. ഇത് വ്യാപാരക്കമ്മി വര്‍ധിപ്പിക്കാനും കറന്റ് അക്കൗണ്ട് ഡെഫിസിറ്റ് ഉയര്‍ത്താനും സമ്പദ്വ്യവസ്ഥയില്‍ സമ്മര്‍ദം സൃഷ്ടിക്കാനും ഇടയാക്കും.