ഇന്ത്യയുടെ ധനക്കമ്മി 7.14 ലക്ഷം കോടി രൂപ! കഴിഞ്ഞ വർഷത്തേക്കാൾ വർധന; ആറ് മാസത്തെ കണക്കുകൾ പുറത്തുവിട്ട് കേന്ദ്രം

നടപ്പ് സാമ്പത്തിക വർഷത്തിന്റെ ആദ്യ ആറു മാസത്തിനിടെ ഇന്ത്യയുടെ ധനക്കമ്മി 7.14 ലക്ഷം കോടി രൂപയിലെത്തി. 2026 ഏപ്രിൽ മുതൽ സെപ്റ്റംബർ വരെയുള്ള കണക്കുകളാണ് കേന്ദ്ര ധനമന്ത്രാലയത്തിന് കീഴിലുള്ള കൺട്രോളർ ജനറൽ ഓഫ് അക്കൗണ്ട്സ് (CGA) പുറത്തുവിട്ടത്. 2026–27 സാമ്പത്തിക വർഷത്തെ ബജറ്റിൽ കണക്കാക്കിയിട്ടുള്ള ആകെ ധനക്കമ്മി ലക്ഷ്യമായ 16.96 ലക്ഷം കോടി രൂപയുടെ 42.1 ശതമാനമാണിത്. കഴിഞ്ഞ സാമ്പത്തിക വർഷം ഇതേ കാലയളവിൽ ധനക്കമ്മി വാർഷിക ബജറ്റ് ലക്ഷ്യത്തിന്റെ 36.5 ശതമാനം മാത്രമായിരുന്നു. കഴിഞ്ഞ വർഷത്തെ അപേക്ഷിച്ച് ധനക്കമ്മി ലക്ഷ്യത്തിന്റെ വലിയൊരു വിഹിതം ആദ്യ ആറു മാസത്തിനുള്ളിൽ തന്നെ രേഖപ്പെടുത്തിയെന്നതാണ് പുതിയ കണക്കുകളിലെ ശ്രദ്ധേയമായ കാര്യം.

എന്താണ് ധനക്കമ്മി?

സർക്കാരിന്റെ ആകെ ചെലവും വായ്പയിലൂടെയുള്ള വരുമാനം ഒഴികെയുള്ള ആകെ വരവും തമ്മിലുള്ള വ്യത്യാസമാണ് ധനക്കമ്മി (Fiscal Deficit). സർക്കാരിന്റെ വരുമാനത്തേക്കാൾ ചെലവ് ഉയരുമ്പോൾ ഈ വിടവ് നികത്താൻ വായ്പയെടുക്കേണ്ടിവരും. അടിസ്ഥാന സൗകര്യ വികസനം, ക്ഷേമപദ്ധതികൾ, മറ്റ് ഭരണപരമായ ചെലവുകൾ എന്നിവയ്ക്കായി സർക്കാർ നടത്തുന്ന ചെലവുകൾ ധനക്കമ്മിയെ സ്വാധീനിക്കുന്ന പ്രധാന ഘടകങ്ങളാണ്.

ആറ് മാസത്തിനിടെ ചെലവ് 25.5 ലക്ഷം കോടി

2026 ഏപ്രിൽ മുതൽ സെപ്റ്റംബർ വരെയുള്ള കാലയളവിൽ കേന്ദ്ര സർക്കാരിന്റെ ആകെ ചെലവ് 25.5 ലക്ഷം കോടി രൂപയായി. വാർഷിക ബജറ്റ് എസ്റ്റിമേറ്റിന്റെ 47.7 ശതമാനമാണിത്. കഴിഞ്ഞ സാമ്പത്തിക വർഷം ഇതേ കാലയളവിൽ ആകെ ചെലവ് വാർഷിക ലക്ഷ്യത്തിന്റെ 45.5 ശതമാനമായിരുന്നു.

ആകെ ചെലവിൽ 18.95 ലക്ഷം കോടി രൂപ റവന്യൂ ചെലവാണ്. വാർഷിക ലക്ഷ്യത്തിന്റെ 45.9 ശതമാനമാണിത്. അതേസമയം, അടിസ്ഥാന സൗകര്യ വികസനം, റോഡുകൾ, മറ്റ് പൊതുമുതൽ ആസ്തികൾ എന്നിവയുടെ സൃഷ്ടിക്കായി വിനിയോഗിക്കുന്ന മൂലധനച്ചെലവ് (Capital Expenditure) 6.55 ലക്ഷം കോടി രൂപയിലെത്തി. വാർഷിക ലക്ഷ്യത്തിന്റെ 53.6 ശതമാനവും ഇതോടെ ചെലവഴിച്ചു. കഴിഞ്ഞ വർഷം ഇതേ കാലയളവിൽ മൂലധനച്ചെലവ് വാർഷിക ലക്ഷ്യത്തിന്റെ 51.8 ശതമാനമായിരുന്നു.

കേന്ദ്ര സർക്കാരിന്റെ വരുമാനം 18.35 ലക്ഷം കോടി

ചെലവുകൾക്കൊപ്പം സർക്കാരിന്റെ വരുമാനത്തിലും വർധന രേഖപ്പെടുത്തിയിട്ടുണ്ട്. ആദ്യ ആറു മാസത്തിനിടെ കേന്ദ്ര സർക്കാരിന് ലഭിച്ച ആകെ വരുമാനം 18.35 ലക്ഷം കോടി രൂപയാണ്. വാർഷിക ബജറ്റ് ലക്ഷ്യത്തിന്റെ 50.3 ശതമാനമാണിത്. കഴിഞ്ഞ വർഷം ഇതേ കാലയളവിൽ വരുമാനം 49.5 ശതമാനമായിരുന്നു.

ഇതിൽ അറ്റ നികുതി വരുമാനം (Net Tax Revenue) 12.76 ലക്ഷം കോടി രൂപയാണ്. വാർഷിക ലക്ഷ്യത്തിന്റെ 44.5 ശതമാനമാണിത്. നികുതിയിതര വരുമാനം 4.8 ലക്ഷം കോടി രൂപയിലെത്തി. വാർഷിക ലക്ഷ്യത്തിന്റെ 72.2 ശതമാനവും ഈ ഇനത്തിൽ ഇതിനകം ലഭിച്ചിട്ടുണ്ട്. സർക്കാർ സ്ഥാപനങ്ങളിൽ നിന്നുള്ള വരുമാനം, ലാഭവിഹിതം, മറ്റ് സ്രോതസ്സുകളിൽ നിന്നുള്ള വരുമാനം എന്നിവ നികുതിയിതര വരുമാനത്തിൽ ഉൾപ്പെടുന്നു.

റവന്യൂ കമ്മിയും പലിശച്ചെലവും

സർക്കാരിന്റെ റവന്യൂ കമ്മി (Revenue Deficit) സെപ്റ്റംബർ അവസാനത്തോടെ 1.38 ലക്ഷം കോടി രൂപയായി. വാർഷിക ബജറ്റ് ലക്ഷ്യത്തിന്റെ 23.4 ശതമാനമാണിത്. കഴിഞ്ഞ സാമ്പത്തിക വർഷം ഇതേ കാലയളവിൽ റവന്യൂ കമ്മി വാർഷിക ലക്ഷ്യത്തിന്റെ 5.2 ശതമാനമായിരുന്നു. അതേസമയം, സർക്കാർ എടുത്തിട്ടുള്ള വായ്പകളുടെ പലിശ തിരിച്ചടവിനായി ആദ്യ ആറു മാസത്തിനിടെ 6.46 ലക്ഷം കോടി രൂപ ചെലവഴിച്ചു. വാർഷിക ബജറ്റ് എസ്റ്റിമേറ്റിന്റെ 46 ശതമാനമാണിത്.

വർഷാവസാന കണക്കിൽ മാറ്റമുണ്ടാകാം

ആദ്യ ആറു മാസത്തെ കണക്കുകളിൽ ധനക്കമ്മി കഴിഞ്ഞ വർഷത്തെ അപേക്ഷിച്ച് ഉയർന്ന നിലയിലാണെങ്കിലും ഇത് വർഷാവസാനത്തെ അന്തിമ ധനക്കമ്മിയുടെ സൂചനയായി മാത്രം കാണാനാകില്ലെന്നാണ് കൺട്രോളർ ജനറൽ ഓഫ് അക്കൗണ്ട്സിന്റെ വിശദീകരണം. സർക്കാരിന്റെ വരുമാനവും ചെലവും രേഖപ്പെടുത്തുന്ന സമയത്തിലെ വ്യത്യാസങ്ങൾ ഓരോ മാസത്തെയും കണക്കുകളെ സ്വാധീനിക്കാം. അതിനാൽ ശേഷിക്കുന്ന സാമ്പത്തിക വർഷത്തിലെ വരുമാനവും ചെലവും കൂടി വിലയിരുത്തിയ ശേഷമേ 2026–27 സാമ്പത്തിക വർഷത്തെ അന്തിമ ധനക്കമ്മിയുടെ ചിത്രം വ്യക്തമാകൂ.