ഹോര്‍മുസ് അടച്ച് ഇറാന്‍; ആഗോള വിപണിയില്‍ ആശങ്ക, എണ്ണവില കുതിച്ചുയരുന്നു

ലോകത്തെ ഏറ്റവും പ്രധാനപ്പെട്ട എണ്ണക്കപ്പല്‍ പാതയായ ഹോര്‍മുസ് കടലിടുക്ക് ഇറാന്‍ പൂര്‍ണ്ണമായും അടച്ചുപൂട്ടിയതോടെ രാജ്യാന്തര വിപണിയില്‍ വന്‍ പ്രതിസന്ധി. യുഎസ് പ്രസിഡന്റ് ഡൊണാള്‍ഡ് ട്രംപ് ടെഹ്റാനുമായി രണ്ടാഴ്ചത്തെ വെടിനിര്‍ത്തല്‍ പ്രഖ്യാപിച്ച് 24 മണിക്കൂര്‍ തികയും മുന്‍പേയാണ് ഇറാന്റെ ഈ നിര്‍ണ്ണായക നീക്കം. ലെബനനിലെ ഹിസ്ബുള്ള കേന്ദ്രങ്ങളില്‍ ഇസ്രയേല്‍ നടത്തിയ അതിശക്തമായ വ്യോമാക്രമണത്തിന് പിന്നാലെയാണ് ഇറാന്‍ കടലിടുക്ക് അടച്ചത്. ലോകത്തെ പ്രതിദിന എണ്ണ, എല്‍.എന്‍.ജി വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന ഈ ജലപാത അടഞ്ഞതോടെ ആഗോള സമ്പദ് വ്യവസ്ഥ വലിയൊരു ആഘാതത്തെയാണ് നേരിടുന്നത്.

ലെബനനില്‍ ഇസ്രയേല്‍ നടത്തിയ വെടിനിര്‍ത്തല്‍ ലംഘനങ്ങളാണ് ഇറാനെ പ്രകോപിപ്പിച്ചത്. ബെയ്റൂട്ടിലും പരിസരപ്രദേശങ്ങളിലും 100-ലധികം കേന്ദ്രങ്ങളില്‍ ഇസ്രയേല്‍ നടത്തിയ ആക്രമണത്തില്‍ 250-ലേറെ പേര്‍ കൊല്ലപ്പെട്ടു. ഹിസ്ബുള്ളയെ വെടിനിര്‍ത്തല്‍ കരാറിന്റെ ഭാഗമായി ഇസ്രയേല്‍ അംഗീകരിക്കുന്നില്ലെങ്കിലും, ലെബനന് നേരെയുള്ള ആക്രമണം അവസാനിപ്പിക്കാതെ വിട്ടുവീഴ്ചയ്ക്കില്ലെന്ന ഉറച്ച നിലപാടിലാണ് ടെഹ്റാന്‍. 'എല്ലാ മുന്നണികളിലും വെടിനിര്‍ത്തല്‍ വേണം, അല്ലെങ്കില്‍ ഒരിടത്തും ഉണ്ടാവില്ല' എന്ന ഇറാന്റെ കര്‍ശനമായ മുന്നറിയിപ്പ് പശ്ചിമേഷ്യയെ വീണ്ടും യുദ്ധഭീതിയുടെ നിഴലിലാക്കിയിരിക്കുകയാണ്.

ഹോര്‍മുസ് കടലിടുക്ക് അടച്ചതോടെ അന്താരാഷ്ട്ര വിപണിയില്‍ ക്രൂഡ് ഓയില്‍ വില കുതിച്ചുയരുകയാണ്. ബെന്റ് ക്രൂഡ് ബാരലിന് 97 ഡോളര്‍ കടന്നത് വരും ദിവസങ്ങളില്‍ ഇന്ധനവിലയിലും പണപ്പെരുപ്പത്തിലും വലിയ പ്രതിഫലനമുണ്ടാക്കും. കടലിടുക്ക് ഉടന്‍ തുറക്കണമെന്ന് വൈറ്റ് ഹൗസ് ആവശ്യപ്പെട്ടെങ്കിലും, തങ്ങളുടെ സുരക്ഷാ താത്പര്യങ്ങള്‍ സംരക്ഷിക്കപ്പെടുമെന്ന് ഉറപ്പാക്കാതെ പിന്നോട്ടില്ലെന്ന നിലപാടിലാണ് ഇറാന്‍ വിദേശകാര്യ മന്ത്രാലയം. ഏപ്രില്‍ 11-ന് ഇസ്ലാമാബാദില്‍ നടക്കാനിരിക്കുന്ന സമാധാന ചര്‍ച്ചകള്‍ക്ക് മുന്നോടിയായി നിയന്ത്രണങ്ങളില്‍ ഇളവ് വരുത്തിയേക്കുമെന്ന് സൂചനയുണ്ടെങ്കിലും നിലവിലെ സാഹചര്യം അതീവ സങ്കീര്‍ണ്ണമാണ്.

അതേസമയം, ഹിസ്ബുള്ള കേന്ദ്രങ്ങളില്‍ ഇസ്രയേല്‍ ആക്രമണം തുടരുന്നത് സ്ഥിതിഗതികള്‍ കൂടുതല്‍ വഷളാക്കുന്നു. ഹിസ്ബുള്ള കരാറിന്റെ ഭാഗമല്ലെന്നും അവര്‍ക്കെതിരെയുള്ള നടപടികള്‍ തുടരുമെന്നുമാണ് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവിന്റെ പക്ഷം. ഈ ബലപരീക്ഷണം ലോക വിപണിയെ എങ്ങനെയൊക്കെ ബാധിക്കുമെന്ന ആശങ്കയിലാണ് സാമ്പത്തിക വിദഗ്ധരും ലോകരാഷ്ട്രങ്ങളും.