നെതന്യാഹു കൊല്ലപ്പെട്ടോ? സോഷ്യല്‍ മീഡിയയിലെ പ്രചരണവും ഇസ്രായേലിന്റെ വിശദീകരണവും

ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു കൊല്ലപ്പെട്ടോ? ആഗോള സാമ്പത്തിക വിപണികളെയും ഭൗമരാഷ്ട്രീയ സാഹചര്യങ്ങളെയും ഒരുപോലെ മുള്‍മുനയില്‍ നിര്‍ത്തിക്കൊണ്ട് സോഷ്യല്‍ മീഡിയയില്‍ പ്രചരിക്കുന്ന ഈ വാര്‍ത്തയുടെ സത്യാവസ്ഥയെന്താണ്? മിഡില്‍ ഈസ്റ്റിലെ സംഘര്‍ഷഭരിതമായ അന്തരീക്ഷത്തില്‍ നിന്ന് പുറത്തുവരുന്ന ഏറ്റവും പുതിയ വിവരങ്ങള്‍ പരിശോധിക്കാം.

കൊല്ലപ്പെട്ടുവെന്ന വാര്‍ത്തയ്ക്ക് പിന്നില്‍?

ഇറാന്‍ നടത്തിയ മിസൈല്‍ ആക്രമണത്തില്‍ നെതന്യാഹു കൊല്ലപ്പെട്ടു എന്ന തരത്തിലുള്ള അഭ്യൂഹങ്ങളാണ് കഴിഞ്ഞ കുറച്ചു മണിക്കൂറുകളായി കാട്ടുതീ പോലെ പടരുന്നത്. ഇറാനിയന്‍ സ്റ്റേറ്റ് മീഡിയയായ തസ്‌നീം ന്യൂസ് ഏജന്‍സിയാണ് ഈ വാര്‍ത്തകള്‍ക്ക് പിന്നിലെന്നതാണ് ശ്രദ്ധേയം. മൂന്ന് ദിവസത്തിലേറെയായി നെതന്യാഹുവിന്റേതായി വീഡിയോ ദൃശ്യങ്ങള്‍ ഒന്നും പുറത്തുവരാത്തതും, അദ്ദേഹത്തിന്റെ ഔദ്യോഗിക വസതിക്ക് ചുറ്റും സുരക്ഷ ശക്തമാക്കിയതും ഈ സംശയങ്ങള്‍ക്ക് ആക്കം കൂട്ടി.എന്നാല്‍ ഈ വാര്‍ത്തകള്‍ പൂര്‍ണ്ണമായും അടിസ്ഥാനരഹിതമാണെന്ന് ഇസ്രായേല്‍ ഔദ്യോഗികമായി അറിയിച്ചു കഴിഞ്ഞു. പ്രധാനമന്ത്രിയുടെ ഓഫീസ് ഇതിനെ ഫേക്ക് ന്യൂസ് എന്നാണ് വിശേഷിപ്പിച്ചത്.

നെതന്യാഹുവിന്റെ സന്ദര്‍ശനം

ബെയ്റ്റ് ഷെമേഷിലെ മിസൈല്‍ ആക്രമണം നടന്ന പ്രദേശം നെതന്യാഹു സന്ദര്‍ശിച്ചതായും റിപ്പോര്‍ട്ടുകളുണ്ട്. ഇറാനിയന്‍ മാധ്യമങ്ങള്‍ തങ്ങളുടെ സൈനിക നേട്ടങ്ങള്‍ പെരുപ്പിച്ചു കാട്ടാന്‍ നടത്തുന്ന പ്രചരണമാണിതെന്നാണ് ഇസ്രായേലിന്റെ വാദം.ഈയൊരു രാഷ്ട്രീയ അനിശ്ചിതത്വം ആഗോള വിപണിയില്‍ വലിയ ചലനങ്ങളാണ് ഉണ്ടാക്കുന്നത്. യുദ്ധഭീതി നിലനില്‍ക്കുന്നതിനാല്‍ ക്രൂഡ് ഓയില്‍ വിലയിലും സ്വര്‍ണ്ണ വിലയിലും വരും ദിവസങ്ങളില്‍ വലിയ ചാഞ്ചാട്ടങ്ങള്‍ പ്രതീക്ഷിക്കാം. നിക്ഷേപകര്‍ അതീവ ജാഗ്രത പാലിക്കേണ്ട സമയമാണിത്. മേഖലയിലെ സമാധാനം തകരുന്ന ഓരോ വാര്‍ത്തയും ഇന്ത്യന്‍ ഓഹരി വിപണിയെയും ബാധിച്ചേക്കാം.