സ്വകാര്യ മേഖലയില്‍ ബ്രേക്ക്; വളര്‍ച്ച മന്ദഗതിയില്‍, തൊഴിലവസരങ്ങളിലും ഇടിവ്

ഇന്ത്യന്‍ സ്വകാര്യ മേഖലയുടെ വളര്‍ച്ചയില്‍ ജൂണ്‍ മാസത്തില്‍ മന്ദത. എച്ച്എസ്ബിസി ഫ്ലാഷ് ഇന്ത്യ പിഎംഐ സൂചിക പ്രകാരം, മെയ് മാസത്തിലെ 59.3-ല്‍ നിന്ന് ജൂണില്‍ സൂചിക 57.4 ആയി താഴ്ന്നു. ഉല്‍പ്പാദന മേഖലയിലും സേവന മേഖലയിലും ഡിമാന്‍ഡ് കുറഞ്ഞതും പുതിയ ഓര്‍ഡറുകള്‍ നേടുന്നതിലെ ബുദ്ധിമുട്ടുകളും വളര്‍ച്ചയുടെ വേഗതയെ ബാധിച്ചിട്ടുണ്ട്. മാര്‍ച്ചിലെ ഏറ്റവും ഉയര്‍ന്ന നിലവാരത്തിന് ശേഷം കാണുന്ന ഏറ്റവും ദുര്‍ബലമായ നിരക്കാണിത്.

രാജ്യത്തെ തൊഴില്‍ വിപണിയിലും ഈ മാന്ദ്യം പ്രതിഫലിച്ചു. പുതിയ ബിസിനസ് ഓര്‍ഡറുകള്‍ കുറഞ്ഞതോടെ കഴിഞ്ഞ ആറ് മാസത്തിനിടയിലെ ഏറ്റവും മന്ദഗതിയിലുള്ള നിയമനങ്ങളാണ് ജൂണില്‍ രേഖപ്പെടുത്തിയത്. നിലവിലെ ആവശ്യങ്ങള്‍ക്ക് നിലവിലുള്ള ജീവനക്കാരുടെ എണ്ണം മതിയാകുമെന്ന് കമ്പനികള്‍ വിലയിരുത്തുന്നതാണ് നിയമനങ്ങളിലെ ഈ കുറവിന് പ്രധാന കാരണം. ഇന്ധനവിലയിലെ വര്‍ദ്ധനവ്, വാതക ക്ഷാമം, കടുത്ത വിപണി മത്സരം എന്നിവയും ബിസിനസ് പ്രവര്‍ത്തനങ്ങളെ പ്രതികൂലമായി ബാധിച്ചിട്ടുണ്ട്.

അതേസമയം, പണപ്പെരുപ്പ സമ്മര്‍ദ്ദങ്ങളില്‍ നേരിയ കുറവുണ്ടായെന്നത് ആശ്വാസകരമാണ്. അസംസ്‌കൃത വസ്തുക്കളുടെയും ഇന്ധനത്തിന്റെയും വില ഉയര്‍ന്നെങ്കിലും ഉൽപാദന ചെലവുകളിലെ വര്‍ദ്ധനവ് കഴിഞ്ഞ അഞ്ച് മാസത്തിനിടയിലെ ഏറ്റവും കുറഞ്ഞ നിരക്കിലാണ്. വിപണിയിലെ കടുത്ത മത്സരം കാരണം പല കമ്പനികളും തങ്ങളുടെ ഉല്‍പ്പന്നങ്ങള്‍ക്ക് അധിക വില ഈടാക്കാന്‍ വിമുഖത കാണിക്കുന്നതും പ്രകടമാണ്.

മുന്നറിയിപ്പുമായി വിദഗ്ധർ

വരുന്ന 12 മാസത്തെ ബിസിനസ് പ്രതീക്ഷകളും അല്‍പ്പം മങ്ങലേറ്റിട്ടുണ്ട്. നിര്‍മ്മാണ മേഖലയിലുള്ളവര്‍ക്കിടയില്‍ നാല് വര്‍ഷത്തിനിടയിലെ ഏറ്റവും കുറഞ്ഞ ശുഭാപ്തിവിശ്വാസമാണ് നിലനില്‍ക്കുന്നത്. എങ്കിലും, ആഗോളതലത്തില്‍ ഇന്ത്യന്‍ വിപണി ഇപ്പോഴും വളര്‍ച്ചാ പാതയിലാണെങ്കിലും, കയറ്റുമതിയിലെ സമ്മിശ്ര പ്രവണതകളും ഡിമാന്‍ഡിലെ കുറവും വരും മാസങ്ങളില്‍ കൂടുതല്‍ ശ്രദ്ധിക്കേണ്ടതുണ്ടെന്ന് സാമ്പത്തിക വിദഗ്ധര്‍ മുന്നറിയിപ്പ് നല്‍കുന്നു.