വ്യാപാര കരാര്‍: കുറഞ്ഞ തീരുവയില്‍ ആപ്പിളും പരുത്തിയും ഇറക്കുമതി ചെയ്യും

ഡൊണാള്‍ഡ് ട്രംപ് ഭരണകൂടവുമായുള്ള വ്യാപാര കരാറിന്റെ ഭാഗമായി ഇന്ത്യ അമേരിക്കയില്‍ നിന്ന് കുറഞ്ഞ തീരുവയില്‍ ആപ്പിളും പരുത്തിയും ഇറക്കുമതി ചെയ്യും. യുഎസ് കയറ്റുമതിക്കാര്‍ക്കായി കൃഷി, ക്ഷീര, ഹോര്‍ട്ടികള്‍ച്ചര്‍ വിഭാഗങ്ങള്‍ തുറക്കില്ലെന്ന് പറഞ്ഞ കേന്ദ്ര വാണിജ്യ വ്യവസായ മന്ത്രി പീയൂഷ് ഗോയല്‍, എന്നാല്‍ ആപ്പിളും പരുത്തിയും ഇറക്കുമതി ചെയ്യുമെന്ന് കൂട്ടിച്ചേര്‍ത്തു. ഇത് പരിധി നിശ്ചയിച്ച് മിനിമം ഇറക്കുമതി വില അടിസ്ഥാനമാക്കിയുള്ള സംവിധാനത്തിലായിരിക്കും നടപ്പാക്കുക.

കോണ്‍ഗ്രസ് നേതൃത്വത്തിലുള്ള യുപിഎ സര്‍ക്കാരിന്റെ ഭരണകാലം മുതല്‍ ഇന്ത്യ രണ്ട് ഉല്‍പ്പന്നങ്ങളും വലിയ അളവില്‍ ഇറക്കുമതി ചെയ്യുന്നുണ്ടെന്നും ഇപ്പോള്‍ ഡിമാന്‍ഡ് കൂടുതല്‍ വര്‍ദ്ധിച്ചുവരുന്നുണ്ടെന്നും ഗോയല്‍ പറഞ്ഞു.പ്രാദേശിക വിപണികള്‍ സംരക്ഷിക്കപ്പെടുന്നുണ്ടെന്ന് ഉറപ്പാക്കാന്‍ ജാഗ്രതയോടെയുള്ള സമീപനത്തിലൂടെയാണ് ഈ നീക്കത്തെ നയിക്കുകയെന്നും മന്ത്രി പറഞ്ഞു.

ആശങ്കയോടെ കർഷകർ

യുഎസില്‍ നിന്നുള്ള ആപ്പിളിന്റെയും പരുത്തിയുടെയും ഇറക്കുമതിയിലെ വര്‍ദ്ധനവ് ആഭ്യന്തര കര്‍ഷകരില്‍, പ്രത്യേകിച്ച് രണ്ട് വിഭാഗങ്ങളിലും ഉല്‍പാദനത്തില്‍ മുന്നില്‍ നില്‍ക്കുന്ന വടക്കന്‍ സംസ്ഥാനങ്ങളില്‍ ആശങ്കയുണ്ടാക്കിയിട്ടുണ്ട്. ഇന്ത്യയിലെ മൊത്തം ആപ്പിളിന്റെ 70 ശതമാനവും ജമ്മു & കശ്മീര്‍ ഉത്പാദിപ്പിക്കുന്നു, തുടര്‍ന്ന് ഹിമാചല്‍ പ്രദേശും ഉത്തരാഖണ്ഡും.

ഇന്ത്യയില്‍ ഏറ്റവും കൂടുതല്‍ പരുത്തി ഉത്പാദിപ്പിക്കുന്ന സംസ്ഥാനങ്ങള്‍ ഗുജറാത്ത്, മഹാരാഷ്ട്ര, തെലങ്കാന, ഹരിയാന, പഞ്ചാബ് എന്നിവയാണ്. രാജ്യത്തെ കര്‍ഷകരെ സംരക്ഷിക്കുന്നതിനായി, രണ്ട് ഉല്‍പ്പന്നങ്ങളും നിശ്ചിത മിനിമം ഇറക്കുമതി വിലയും തീരുവയും നല്‍കിയാണ് ഇറക്കുമതി ചെയ്യുന്നതെന്ന് മന്ത്രി പറഞ്ഞു.