പശ്ചിമേഷ്യന്‍ കനല്‍ പടരുന്നു; വിപണിയില്‍ കനത്ത ജാഗ്രത, രൂപയുടെ മൂല്യം റെക്കോര്‍ഡ് താഴ്ചയില്‍

പശ്ചിമേഷ്യന്‍ സംഘര്‍ഷം അഞ്ചാം ആഴ്ചയിലേക്ക് കടന്നതോടെ ആഗോള സാമ്പത്തിക രംഗത്തുണ്ടായ ആഘാതം മറികടക്കാന്‍ ഇന്ത്യ പ്രതിരോധ നടപടികള്‍ ശക്തമാക്കി. വര്‍ദ്ധിച്ചുവരുന്ന എണ്ണവിലയും കറന്‍സി വിപണിയിലെ സമ്മര്‍ദ്ദവും ഇന്ത്യന്‍ സമ്പദ് വ്യവസ്ഥയെ ബാധിക്കാതിരിക്കാന്‍ വേഗത്തിലുള്ള തിരുത്തല്‍ നടപടികള്‍ സ്വീകരിച്ചുവരികയാണെന്ന് സര്‍ക്കാര്‍ വ്യക്തമാക്കി. ആഗോളതലത്തിലെ അപ്രതീക്ഷിത സംഭവവികാസങ്ങള്‍ ഇന്ത്യയ്ക്ക് പുതിയ വെല്ലുവിളികള്‍ സൃഷ്ടിക്കുന്നുണ്ടെന്നും, ഇത് ചരക്ക് വില ഉയരുന്നതിനും വ്യാപാര രീതികളില്‍ മാറ്റമുണ്ടാകുന്നതിനും കാരണമാകുമെന്നും ധനകാര്യ സഹമന്ത്രി പങ്കജ് ചൗധരി പാര്‍ലമെന്റില്‍ അറിയിച്ചു.

ചരിത്രത്തിലെ ഏറ്റവും വലിയ തകര്‍ച്ചയാണ് ഇന്ത്യന്‍ കറന്‍സി നേരിട്ടുകൊണ്ടിരിക്കുന്നത്. അമേരിക്കന്‍ ഡോളറിനെതിരെ രൂപയുടെ മൂല്യം ആദ്യമായി 95 കടന്ന് 95.20 എന്ന റെക്കോര്‍ഡ് താഴ്ചയിലെത്തി. വിപണിയിലെ അസ്ഥിരത നിയന്ത്രിക്കാന്‍ റിസര്‍വ് ബാങ്ക് ഓഫ് ഇന്ത്യ ബാങ്കുകളുടെ വിദേശനാണ്യ വിനിമയത്തില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തിയിട്ടും രൂപയുടെ ഇടിവ് തുടരുകയാണ്. വിദേശ നിക്ഷേപം വന്‍തോതില്‍ പിന്‍വലിക്കപ്പെടുന്നതും ആഗോള രാഷ്ട്രീയ സാഹചര്യങ്ങളുമാണ് രൂപയെ സമ്മര്‍ദ്ദത്തിലാക്കുന്നത്. രൂപയുടെ മൂല്യം കുറയുന്നത് രാജ്യത്തിന്റെ ഇറക്കുമതി ചെലവ് വര്‍ദ്ധിപ്പിക്കുകയും കറന്റ് അക്കൗണ്ട് കമ്മി ഉയര്‍ത്തുകയും ചെയ്യുമെന്ന് മന്ത്രി മുന്നറിയിപ്പ് നല്‍കി.

ലോകത്തിലെ എണ്ണ വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന ഹോര്‍മുസ് കടലിടുക്കിലെ തടസ്സങ്ങളാണ് ഇന്ത്യയെ ഏറ്റവും കൂടുതല്‍ ആശങ്കപ്പെടുത്തുന്നത്. യുദ്ധം രൂക്ഷമായാല്‍ ഈ പ്രധാന പാതയിലൂടെയുള്ള എണ്ണനീക്കം തടസ്സപ്പെടാന്‍ സാധ്യതയുണ്ട്. നിലവില്‍ ഷിപ്പിംഗ് വൈകുന്നതും ഇന്‍ഷുറന്‍സ് ചെലവ് വര്‍ദ്ധിക്കുന്നതും എണ്ണവിലയെ സ്വാധീനിച്ചു തുടങ്ങിയിട്ടുണ്ട്. ആഗോള വിപണിയില്‍ എണ്ണ വിതരണം പരിമിതമായതിനാല്‍ ചെറിയ അനിശ്ചിതത്വങ്ങള്‍ പോലും പെട്ടെന്നുള്ള വിലക്കയറ്റത്തിന് കാരണമാകുന്നുണ്ട്. വിപണിയിലെ ഈ അസ്ഥിരത നിക്ഷേപകരുടെ ആത്മവിശ്വാസത്തെയും ബാധിച്ചിട്ടുണ്ട്.

നിലവിലെ സാഹചര്യം ഒരു ഹ്രസ്വകാല പ്രതിസന്ധിയായി കാണുന്നതിന് പകരം ദീര്‍ഘകാല അപകടസാധ്യതയായാണ് സാമ്പത്തിക വിദഗ്ധര്‍ വിലയിരുത്തുന്നത്. കൂടുതല്‍ രാജ്യങ്ങള്‍ സംഘര്‍ഷത്തില്‍ ഉള്‍പ്പെടുന്നത് വിപണിയെ കൂടുതല്‍ പ്രക്ഷുബ്ധമാക്കുന്നു. എണ്ണ വിതരണ ശൃംഖലയില്‍ ഉണ്ടാകുന്ന ഏത് വിള്ളലും ഇന്ത്യയെപ്പോലെയുള്ള വലിയ ഇറക്കുമതി രാജ്യങ്ങളെ നേരിട്ട് ബാധിക്കും. ഈ സാഹചര്യത്തില്‍ ആഭ്യന്തര വിപണിയിലെ പണപ്പെരുപ്പം നിയന്ത്രിക്കാനും വിദേശനാണ്യ ശേഖരം സുരക്ഷിതമാക്കാനുമുള്ള തീവ്ര ശ്രമത്തിലാണ് ധനമന്ത്രാലയവും റിസര്‍വ് ബാങ്കും.