എല്‍ നിനോ ശക്തിപ്പെടുന്നു; മഴ 12ശതമാനം കുറഞ്ഞു, ദക്ഷിണേന്ത്യ കടുത്ത പ്രതിസന്ധിയില്‍

എല്‍ നിനോ പ്രതിഭാസം ശക്തിപ്പെട്ടതോടെ ഇന്ത്യയിലെ മണ്‍സൂണ്‍ മഴയെക്കുറിച്ചുള്ള ആശങ്ക വര്‍ധിച്ചു. ഐസിഐസിഐ ബാങ്കിന്റെ റിപ്പോര്‍ട്ട് അനുസരിച്ച് നിനോ 3.4 സൂചിക 2.72 ആയി ഉയര്‍ന്നു. ഇത് 2015 ലെ 2.14 നെക്കാള്‍ വളരെ കൂടുതലാണ്. സെപ്റ്റംബര്‍ 28 വരെ രാജ്യത്ത് ആകെ ലഭിച്ച മഴ 757 മില്ലിമീറ്റര്‍ മാത്രമാണ്, ഇത് സാധാരണയേക്കാള്‍ 12 ശതമാനം കുറവാണ്.

മഴക്കുറവില്‍ ഏറ്റവും കൂടുതല്‍ ബാധിച്ചത് കിഴക്കന്‍ ഇന്ത്യയെയാണ്, 25% കുറവ് രേഖപ്പെടുത്തി. തൊട്ടുപിന്നാലെ ദക്ഷിണേന്ത്യയില്‍ 24% മഴക്കുറവാണ് ഉണ്ടായത്. വടക്കുപടിഞ്ഞാറന്‍ ഇന്ത്യയിലും മധ്യ ഇന്ത്യയിലും യഥാക്രമം 6% ഉം 2% ഉം കുറവാണ്. 36 കാലാവസ്ഥാ ഉപവിഭാഗങ്ങളില്‍ 17 എണ്ണത്തിലും മഴ കുറവാണ്.

മഴക്കുറവ് കൃഷിയെയും ബാധിച്ചു. ഖാരിഫ് വിതയ്ക്കല്‍ കഴിഞ്ഞ വര്‍ഷത്തെ 112.1 ദശലക്ഷം ഹെക്ടറില്‍ നിന്ന് 110.8 ദശലക്ഷമായി കുറഞ്ഞു. നെല്‍കൃഷിയിലാണ് ഏറ്റവും വലിയ ഇടിവ്, 3.6% കുറവ്. അതേസമയം ഉഴുന്ന്, തുവര പരിപ്പ് കൃഷിയില്‍ വര്‍ധനവുണ്ട്. രാജ്യത്തെ 150 പ്രധാന ജലസംഭരണികളിലെ ജലനിരപ്പ് 71% മാത്രമാണ്.

എങ്കിലും ചെറിയ ആശ്വാസമുണ്ട്. ഇന്ത്യന്‍ മഹാസമുദ്ര ദ്വിധ്രുവം (ഐഒഡി) സൂചിക 0.76 ആയി പോസിറ്റീവ് സോണില്‍ എത്തി.( ഐഒഡി എന്നത് ഇന്ത്യന്‍ മഹാസമുദ്രത്തിലെ കടല്‍ ചൂടില്‍ ഉണ്ടാകുന്ന മാറ്റമാണ്.) ഇത് എല്‍ നിനോയുടെ ദോഷഫലം ഭാഗികമായി കുറയ്ക്കുമെന്നാണ് പ്രതീക്ഷ. സെപ്റ്റംബര്‍ ആദ്യം മുതല്‍ മഴയില്‍ ഉണ്ടായ പുരോഗതിയും മൊത്തത്തിലുള്ള കുറവ് കുറയ്ക്കാന്‍ സഹായിച്ചിട്ടുണ്ട്.