Login 
പഠിക്കാം & സമ്പാദിക്കാം 
Home
8 Jan 2026 9:27 PM IST
Kerala Budget-കേരള ബജറ്റ് 2026,തെരഞ്ഞെടുപ്പ് അടുക്കുമ്പോൾ സംസ്ഥാനത്തിന്റെ സാമ്പത്തിക ദിശ എങ്ങോട്ട്?
Vidhya N k
Summary
നിയമസഭാ തിരഞ്ഞെടുപ്പിന് മുന്നോടിയായുള്ള സംസ്ഥാന ബജറ്റ് എത്തുന്നു. ബജറ്റ് അവതരണം ജനുവരി 29 ന്. പ്രധാന പ്രഖ്യാപനങ്ങൾ ഉറ്റുനോക്കി സംസ്ഥാനം
കേന്ദ്ര ബജറ്റിനെ കുറിച്ചുള്ള ചര്ച്ചകള് രാജ്യവ്യാപകമായി സജീവമാകുമ്പോള്, കേരളത്തിൻ്റെ സ്വന്തം സാമ്പത്തിക ഭാവി അടയാളപ്പെടുത്തുന്ന സംസ്ഥാന ബജറ്റും അവതരണത്തിന് ഒരുങ്ങുകയാണ്. 2026 ഫെബ്രുവരി 1-ന് കേന്ദ്ര ബജറ്റ് അവതരിപ്പിക്കുന്നതിന് മുന്പായി, ജനുവരി 29-ന് സംസ്ഥാന ധനമന്ത്രി കെ.എന്. ബാലഗോപാല് കേരള ബജറ്റ് നിയമസഭയില് അവതരിപ്പിക്കും. രണ്ടാം പിണറായി സര്ക്കാരിൻ്റെ കാലാവധി അവസാനിക്കാന് മാസങ്ങള് മാത്രം ബാക്കി നില്ക്കുന്ന ഈ ബജറ്റിന് രാഷ്ട്രീയമായും സാമ്പത്തികമായും വലിയ പ്രാധാന്യമുണ്ട്.
നിയമസഭാ സമ്മേളനത്തിൻ്റെ തുടക്കം
15-ാം കേരള നിയമസഭയുടെ പതിനാറാമത് സമ്മേളനം ജനുവരി 20-ന് ഗവര്ണറുടെ നയപ്രഖ്യാപന പ്രസംഗത്തോടെയാണ് ആരംഭിക്കുക. തുടര്ന്ന് അന്തരിച്ച പ്രമുഖര്ക്കും മുന് നിയമസഭാംഗങ്ങള്ക്കുമുള്ള ചരമോപചാരങ്ങളും നയപ്രഖ്യാപനത്തിന്മേലുള്ള നന്ദിപ്രമേയ ചര്ച്ചകളും നടക്കും. ഈ നടപടിക്രമങ്ങള്ക്ക് ശേഷമാണ് ജനുവരി 29-ന് ധനമന്ത്രി തൻ്റെ ആറാമത്തെ ബജറ്റ് അവതരിപ്പിക്കുക.
തെരഞ്ഞെടുപ്പ് വര്ഷ ബജറ്റിലെ പ്രത്യേകതകള്
സര്ക്കാരിൻ്റെ കാലാവധി അവസാനിക്കാന് പോകുന്ന സാഹചര്യത്തില് നിയമസഭാ തിരഞ്ഞെടുപ്പ് മുന്നില് കണ്ട് ജനങ്ങളെ ആകര്ഷിക്കുന്ന പ്രഖ്യാപനങ്ങള് ബജറ്റില് ഇടംപിടിക്കുമെന്നാണ് പൊതുവായ വിലയിരുത്തല്. എന്നാല് കടുത്ത സാമ്പത്തിക നിയന്ത്രണങ്ങള് നിലനില്ക്കുന്നതിനാല് ചെലവുകളില് സൂക്ഷ്മത പാലിക്കേണ്ടതും സര്ക്കാരിന് അനിവാര്യമാണ്. ജനപ്രിയ പ്രഖ്യാപനങ്ങളും ഉത്തരവാദിത്വമുള്ള ധനനയവും തമ്മിലുള്ള സന്തുലനം ഈ ബജറ്റില് നിര്ണായകമാകും.
‘വോട്ട് ഓണ് അക്കൗണ്ട്’ സാധ്യത
സാധാരണയായി ബജറ്റ് അവതരിപ്പിച്ചതിന് ശേഷം വിശദമായ ചര്ച്ചകളും പാസാക്കലുമാണ് നിയമസഭയില് നടക്കാറുള്ളത്. എന്നാല് ഇത്തവണ, ബജറ്റ് പൂര്ണമായി പാസാക്കുന്നതിന് മുന്പ് തന്നെ നിയമസഭാ തിരഞ്ഞെടുപ്പ് വിജ്ഞാപനം വന്നേക്കുമെന്ന സാധ്യതയുണ്ട്. അങ്ങനെയെങ്കില് ആദ്യ നാല് മുതല് ആറു മാസം വരെയുള്ള ചെലവുകള്ക്കായി ‘വോട്ട് ഓണ് അക്കൗണ്ട്’ പാസാക്കി സഭ പിരിയാനാണ് സാധ്യത.
2021ലെ അനുഭവം
2021-ലും സമാനമായ സാഹചര്യമാണ് ഉണ്ടായത്. അന്ന് ഫെബ്രുവരി അവസാനം തിരഞ്ഞെടുപ്പ് പ്രഖ്യാപിക്കുകയും, ഏപ്രിലില് വോട്ടെടുപ്പ് നടക്കുകയും, മെയ് മാസത്തില് ഫലപ്രഖ്യാപനം നടത്തുകയും ചെയ്തു. ഇത്തവണയും സമാനമായ സമയക്രമം തന്നെയാകും പിന്തുടരുക. മൂന്നാം തവണയും പിണറായി സര്ക്കാര് അധികാരത്തിലെത്തിയാല് പിന്നീട് പൂര്ണ ബജറ്റ് നടപ്പാക്കാനാകും.
ബജറ്റിലെ പ്രതീക്ഷകള്
സംസ്ഥാനം നേരിടുന്ന സാമ്പത്തിക പ്രതിസന്ധികള്ക്കിടയിലും ക്ഷേമ പെന്ഷനുകള്, കാര്ഷിക മേഖലക്കുള്ള സഹായങ്ങള്, റോഡുകള്, അടിസ്ഥാന സൗകര്യ വികസനം എന്നിവയ്ക്ക് ഈ ബജറ്റില് മുന്ഗണന ലഭിക്കുമെന്നാണ് സൂചന. അതേസമയം, കേന്ദ്ര വിഹിതം കുറയുന്നതും കടമെടുപ്പ് പരിധിയിലെ നിയന്ത്രണങ്ങളും സംസ്ഥാനത്തിന് വലിയ വെല്ലുവിളിയാണ്. ഇതിനെ മറികടക്കാന് ആഭ്യന്തര വരുമാനം വര്ധിപ്പിക്കാനുള്ള നിര്ദേശങ്ങളും ബജറ്റില് ഉള്പ്പെടാന് സാധ്യതയുണ്ട്.
സംസ്ഥാനത്തിന് മുന്നിലുള്ള വെല്ലുവിളി
കഴിഞ്ഞ വര്ഷത്തെ കേന്ദ്ര ബജറ്റില് കേരളത്തിന് കാര്യമായ നേട്ടങ്ങള് ലഭിക്കാത്ത സാഹചര്യത്തില്, ഇത്തവണയും സമാന അവസ്ഥ ആവര്ത്തിക്കുമോയെന്ന ആശങ്ക നിലനില്ക്കുന്നു. സാമ്പത്തിക വളര്ച്ച നിലനിര്ത്താനും വിലക്കയറ്റം നിയന്ത്രിക്കാനും ആവശ്യമായ നടപടികള് ബജറ്റില് ഉള്പ്പെടുത്തേണ്ടത് അനിവാര്യമാണ്.
നിര്ണായകമായ ബജറ്റ്
തെരഞ്ഞെടുപ്പ് വര്ഷത്തില് അവതരിപ്പിക്കുന്ന ബജറ്റ് എന്ന നിലയില് ജനങ്ങളുടെ പ്രതീക്ഷകളും സംസ്ഥാനത്തിന്റെ സാമ്പത്തിക യാഥാര്ഥ്യങ്ങളും തമ്മില് തുലനം കണ്ടെത്തുകയാണ് സര്ക്കാരിന് മുന്നിലുള്ള പ്രധാന വെല്ലുവിളി. കേരള ബജറ്റ് 2026, സംസ്ഥാനത്തിൻ്റെ വരാനിരിക്കുന്ന സാമ്പത്തികവും രാഷ്ട്രീയവുമായ ദിശ അടയാളപ്പെടുത്തുന്നതിൽ നിർണായകമാകും.