നേമത്ത് ആവേശം കൊടുമുടിയില്‍; മുന്നണികള്‍ക്ക് അഭിമാനവും ചങ്കിടിപ്പും, ഹോട്ട്‌സീറ്റില്‍ ആര് ചിരിക്കും?

കേരള രാഷ്ട്രീയത്തില്‍ ഒരു ചൂണ്ടുപലക ആയേക്കാവുന്ന അതിശക്തമായ ത്രികോണ മത്സരത്തിനാണ് അനന്തപുരിയുടെ മണ്ണായ നേമം വേദിയാകുന്നത്. ബിജെപിയുടെ കേരളത്തിലെ ആദ്യത്തെ നിയമസഭാ സീറ്റെന്ന ചരിത്രമുള്ള നേമത്ത് ഇക്കുറി പോരാട്ടം പ്രവചനാതീതമാണ്. 2021-ല്‍ ബിജെപിയില്‍ നിന്നും മണ്ഡലം പിടിച്ചെടുത്തത് സിറ്റിംഗ് എംഎല്‍എയും മന്ത്രിയുമായ വി. ശിവന്‍കുട്ടിയാണ്. അദ്ദേഹം എല്‍ഡിഎഫിനായി കച്ചമുറുക്കുമ്പോള്‍, നഷ്ടപ്പെട്ട സിംഹാസനം തിരിച്ചുപിടിക്കാന്‍ ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറെ തന്നെ കളത്തിലിറക്കി. ഇതോടെ നേമം 'സ്റ്റാര്‍ മണ്ഡല'മായി മാറിക്കഴിഞ്ഞു. ഭരണവിരുദ്ധ വികാരവും യുവത്വത്തിന്റെ കരുത്തുമായി കെ.എസ്. ശബരീനാഥന്‍ യുഡിഎഫിനായി അണിനിരക്കുന്നതോടെ പോരാട്ടം തീപാറും.

മന്ത്രി വി. ശിവന്‍കുട്ടിയെ സംബന്ധിച്ചിടത്തോളം ഇത് വെറുമൊരു മത്സരമല്ല, മറിച്ച് തന്റെ വികസന പ്രവര്‍ത്തനങ്ങള്‍ക്കുള്ള അംഗീകാരം തേടലാണ്. 2021-ലെ വിജയം യാദൃശ്ചികമല്ലെന്ന് തെളിയിക്കുക എന്ന ദൗത്യംകൂടി എല്‍ഡിഎഫിനുണ്ട്. തലസ്ഥാന നഗരിയില്‍ ബിജെപിയുടെ വളര്‍ച്ചയ്ക്ക് തടയിടാന്‍ നേമം നിലനിര്‍ത്തേണ്ടത് ഇടത് മുന്നണിക്ക് അനിവാര്യമാണ്. ബിജെപിക്കെതിരായ രാഷ്ട്രീയ ആരോപണങ്ങളും സര്‍ക്കാരിന്റെ വികസന പദ്ധതികളും മുന്‍നിര്‍ത്തി മണ്ഡലം ഇളക്കിമറിച്ചുള്ള പ്രചാരണത്തിലാണ് ശിവന്‍കുട്ടിയും സംഘവും.

മറുഭാഗത്ത്, ബിജെപിയെ സംബന്ധിച്ച് നേമം അഭിമാനത്തിന്റെ പ്രതീകമാണ്. തദ്ദേശ സ്വയംഭരണ തിരഞ്ഞെടുപ്പില്‍ ചരിത്രത്തിലാദ്യമായി തിരുവനന്തപുരം കോര്‍പ്പറേഷന്‍ ഭരണം പിടിച്ചെടുത്ത ആത്മവിശ്വാസത്തിലാണ് എന്‍ഡിഎ ഇക്കുറി അങ്കത്തട്ടിലിറങ്ങുന്നത്. മുന്‍കേന്ദ്രമന്ത്രിയെന്ന നിലയിലും വികസന നായകനെന്ന നിലയിലുമുള്ള രാജീവ് ചന്ദ്രശേഖറുടെ പ്രതിച്ഛായ വോട്ടായി മാറുമെന്നാണ് ബിജെപിയുടെ കണക്കുകൂട്ടല്‍. നഗരമേഖലകളിലെ ബിജെപിയുടെ ശക്തമായ അടിത്തറയും കോര്‍പ്പറേഷന്‍ ഭരണത്തിലെ സ്വാധീനവും മണ്ഡലം തിരിച്ചുപിടിക്കാന്‍ സഹായിക്കുമെന്ന് പാര്‍ട്ടി ഉറച്ചു വിശ്വസിക്കുന്നു.

അതേസമയം, നിശബ്ദമായ അട്ടിമറി ലക്ഷ്യമിട്ടാണ് യുഡിഎഫ് നീക്കം. കെ.എസ്. ശബരീനാഥന്റെ സ്ഥാനാര്‍ത്ഥിത്വം മണ്ഡലത്തിലെ യുവ വോട്ടര്‍മാരെയും നിഷ്പക്ഷ വോട്ടര്‍മാരെയും സ്വാധീനിക്കുമെന്നാണ് കോണ്‍ഗ്രസ് കരുതുന്നത്. എല്‍ഡിഎഫിന്റെ ഭരണപരാജയങ്ങളും ബിജെപിയുടെ വര്‍ഗീയ രാഷ്ട്രീയവും ഒരുപോലെ ചര്‍ച്ചയാക്കി മണ്ഡലത്തില്‍ വീണ്ടും സ്വാധീനം ഉറപ്പിക്കാനാണ് യുഡിഎഫ് ശ്രമം. നഗരപ്രദേശങ്ങളില്‍ കോണ്‍ഗ്രസിനുള്ള പരമ്പരാഗത വോട്ടുകളും ന്യൂനപക്ഷ വോട്ടുകളും സമാഹരിക്കാന്‍ ശബരീനാഥന്റെ സാന്നിധ്യം സഹായിക്കുമെന്ന് മുന്നണി പ്രതീക്ഷിക്കുന്നു.

ഏകദേശം 30 ശതമാനത്തോളം വരുന്ന ന്യൂനപക്ഷ വോട്ടുകളും ഗണ്യമായ നഗര വോട്ടര്‍മാരുമാണ് നേമത്തെ വിധി തീരുമാനിക്കുക. ആശയപരമായ പോരാട്ടത്തിനപ്പുറം സമുദായ സമവാക്യങ്ങളും സംഘടനാ കരുത്തും ഇവിടെ നിര്‍ണ്ണായകമാകും. വോട്ടര്‍മാരുടെ മനസ്സ് എങ്ങോട്ടെന്ന് പ്രവചിക്കാനാവാത്ത വിധം മണ്ഡലം അസ്ഥിരത പ്രകടിപ്പിക്കുന്നതിനാല്‍, സംസ്ഥാനത്ത് ഏറ്റവും കൂടുതല്‍ ആകാംക്ഷ ഉണര്‍ത്തുന്ന പോരാട്ടമായി നേമം മാറിയിരിക്കുകയാണ്. തിരുവനന്തപുരം കോര്‍പ്പറേഷന്‍ ബിജെപി ഭരിക്കുമ്പോള്‍ നിയമസഭ ആര്‍ക്കൊപ്പം നില്‍ക്കുമെന്ന ചോദ്യത്തിനുള്ള ഉത്തരം തേടിയാണ് കേരളം കാത്തിരിക്കുന്നത്.