ക്രിക്കറ്റിന് കൈകൊടുത്ത് ഹ്യുണ്ടായ്; ആറ് പ്രധാന ടൂര്‍ണമെന്റുകളില്‍ പങ്കാളിത്തം

ക്രിക്കറ്റ് കളിയിലേക്ക് ഹ്യുണ്ടായ് മോട്ടോര്‍ കമ്പനിയും. 2026 മുതല്‍ 2027 വരെയുള്ള ആറ് പ്രധാന ടൂര്‍ണമെന്റുകള്‍ക്കായി ഹ്യുണ്ടായി അന്താരാഷ്ട്ര ക്രിക്കറ്റ് കൗണ്‍സിലുമായി ആഗോള പങ്കാളിത്തം പ്രഖ്യാപിച്ചു.

ഒരു പ്രധാന പങ്കാളി എന്ന നിലയില്‍, ഹ്യുണ്ടായ് 2027 ലെ പുരുഷ ക്രിക്കറ്റ് ലോകകപ്പ് ഉള്‍പ്പെടെയുള്ള ഐസിസിയുടെ വരാനിരിക്കുന്ന അന്താരാഷ്ട്ര ക്രിക്കറ്റ് കലണ്ടറിനുള്ള എക്‌സ്‌ക്ലൂസീവ് അവകാശങ്ങളും അവസരങ്ങളും ഉറപ്പാക്കുന്നു.

നാണയം ടോസ് ചെയ്യല്‍, സ്റ്റേഡിയത്തിലെ പ്രമുഖ ബ്രാന്‍ഡിംഗ് ഉറപ്പാക്കല്‍, ഇഷ്ടാനുസൃത ആരാധക അനുഭവങ്ങള്‍ വാഗ്ദാനം ചെയ്യല്‍ , മാച്ച്‌ഡേ നിമിഷങ്ങളില്‍ പങ്കെടുക്കല്‍ എന്നിവയാണ് ഈ അവകാശങ്ങള്‍.

ലോകത്തിലെ ഏറ്റവും ജനപ്രിയമായ കായിക ഇനങ്ങളില്‍ ഒന്നാണ് ക്രിക്കറ്റ്. ഐസിസിയുടെ മാര്‍ക്വീ ഇവന്റുകളില്‍ പ്രത്യേകിച്ച് രണ്ട് ബില്യണിലധികം ആരാധകരുടെ അഭിനിവേശം പ്രകടമാണെന്ന് ഐസിസി ചെയര്‍മാന്‍ ജയ് ഷാ പറഞ്ഞു.

'ഒരു പ്രീമിയര്‍ പങ്കാളിയായി ഹ്യുണ്ടായിയെ ഞങ്ങള്‍ സ്വാഗതം ചെയ്യുന്നു, ഒപ്പം മികച്ച പരിപാടികള്‍ ഒരുമിച്ച് നടത്താന്‍ ഞങ്ങള്‍ ആഗ്രഹിക്കുന്നു,' ജയ് ഷാ പറഞ്ഞു.

ഇന്ത്യയോടുള്ള ഹ്യുണ്ടായിയുടെ പ്രതിബദ്ധതയും കമ്പനിയുടെ ആഗോള പ്രവര്‍ത്തനങ്ങളില്‍ ഇന്ത്യയുടെ വര്‍ദ്ധിച്ചുവരുന്ന പ്രാധാന്യവും ഈ പങ്കാളിത്തം പ്രതിഫലിപ്പിക്കുന്നുവെന്ന് ഹ്യുണ്ടായ് മോട്ടോര്‍ ഇന്ത്യ എംഡിയും സിഇഒയുമായ തരുണ്‍ ഗാര്‍ഗ് പറഞ്ഞു.