Login 
പഠിക്കാം & സമ്പാദിക്കാം 
Home
3 Nov 2026 7:31 PM IST
Summary
കരസേന, നാവികസേന, വ്യോമസേന എന്നീ മൂന്ന് വിഭാഗങ്ങള്‍ തമ്മിലുള്ള ഏകോപനം വര്‍ധിപ്പിക്കുന്നത് പ്രധാനം.
ഇന്ത്യയുടെ പ്രതിരോധ മേഖലയെ കൂടുതല്‍ ശക്തിപ്പെടുത്താനും ആഗോള ആയുധ വിപണിയില്‍ രാജ്യത്തിന്റെ സാന്നിധ്യം വര്‍ധിപ്പിക്കാനും ലക്ഷ്യമിട്ട് കേന്ദ്രസര്‍ക്കാര്‍. 2029ഓടെ പ്രതിരോധ ഉല്‍പ്പാദനം മൂന്ന് ലക്ഷം കോടി രൂപയായും പ്രതിരോധ കയറ്റുമതി 50,000 കോടി രൂപയായും ഉയര്‍ത്തുകയാണ് ലക്ഷ്യമെന്ന് കേന്ദ്ര പ്രതിരോധ മന്ത്രി രാജ്നാഥ് സിങ് വ്യക്തമാക്കി. രാജസ്ഥാനിലെ ജയ്‌സാല്‍മീറില്‍ പ്രതിരോധ മന്ത്രാലയത്തിന്റെ പാര്‍ലമെന്ററി കണ്‍സള്‍ട്ടേറ്റീവ് കമ്മിറ്റി യോഗത്തില്‍ സംസാരിക്കുകയായിരുന്നു അദ്ദേഹം.
പ്രതിരോധ മേഖലയില്‍ സ്വയംപര്യാപ്തത കൈവരിക്കുന്നതിനൊപ്പം അത്യാധുനിക സാങ്കേതികവിദ്യകള്‍ സൈനിക മേഖലയില്‍ പ്രയോജനപ്പെടുത്തുകയും ആഭ്യന്തര പ്രതിരോധ വ്യവസായത്തെ ശക്തിപ്പെടുത്തുകയുമാണ് ലക്ഷ്യം. നിലവിലെ സുരക്ഷാ വെല്ലുവിളികളും ഭാവിയില്‍ ഉയര്‍ന്നുവന്നേക്കാവുന്ന ഭീഷണികളും നേരിടാന്‍ സാങ്കേതികമായി കരുത്തുറ്റ സൈനിക സംവിധാനം ഒരുക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.
പ്രതിരോധ ഉല്‍പ്പാദനത്തില്‍ വന്‍ വളര്‍ച്ച
ഇന്ത്യയുടെ പ്രതിരോധ ഉല്‍പ്പാദന മേഖല കഴിഞ്ഞ വര്‍ഷങ്ങളില്‍ വലിയ വളര്‍ച്ചയാണ് കൈവരിച്ചതെന്ന് രാജ്നാഥ് സിങ് പറഞ്ഞു. 2014-15 സാമ്പത്തിക വര്‍ഷത്തില്‍ 46,429 കോടി രൂപയായിരുന്ന ആഭ്യന്തര പ്രതിരോധ ഉല്‍പ്പാദനം 2025-26ല്‍ റെക്കോര്‍ഡ് 1.78 ലക്ഷം കോടി രൂപയായി ഉയര്‍ന്നു. പ്രതിരോധ കയറ്റുമതിയിലും ശ്രദ്ധേയമായ വളര്‍ച്ചയുണ്ടായി. 2014ല്‍ 2,000 കോടി രൂപയില്‍ താഴെയായിരുന്ന കയറ്റുമതി ഇപ്പോള്‍ ഏകദേശം 40,000 കോടി രൂപയിലെത്തി.
ഈ വളര്‍ച്ചയുടെ തുടര്‍ച്ചയായാണ് 2029ഓടെ മൂന്ന് ലക്ഷം കോടി രൂപയുടെ ഉല്‍പ്പാദനവും 50,000 കോടി രൂപയുടെ കയറ്റുമതിയും ലക്ഷ്യമിടുന്നത്. പ്രതിരോധ ഉല്‍പ്പാദനത്തില്‍ സ്വകാര്യ മേഖലയുടെയും ചെറുകിട, ഇടത്തരം സംരംഭങ്ങളുടെയും പങ്കാളിത്തം വര്‍ധിപ്പിക്കാനും സര്‍ക്കാര്‍ നടപടികള്‍ സ്വീകരിക്കുന്നുണ്ട്.
2026-27 സാമ്പത്തിക വര്‍ഷത്തില്‍ രാജ്യത്തിന്റെ പ്രതിരോധ ബജറ്റ് റെക്കോര്‍ഡ് 7.85 ലക്ഷം കോടി രൂപയായി ഉയര്‍ത്തിയതായും മന്ത്രി അറിയിച്ചു. ഇതില്‍ സൈനിക ആധുനികവത്ക്കരണത്തിനും പുതിയ ആയുധങ്ങളും ഉപകരണങ്ങളും വാങ്ങുന്നതിനുമായി 2.19 ലക്ഷം കോടി രൂപയുടെ മൂലധന വിഹിതവും ഉള്‍പ്പെടുന്നു. ആവശ്യമായ സാമ്പത്തിക വിഭവങ്ങള്‍ ഉറപ്പാക്കുന്നതിനൊപ്പം അവ കാര്യക്ഷമമായി വിനിയോഗിക്കുകയും സൈന്യത്തിന്റെ നിര്‍ണായക ആവശ്യങ്ങള്‍ക്ക് മുന്‍ഗണന നല്‍കുകയും വേണമെന്ന് അദ്ദേഹം പറഞ്ഞു.
ആധുനിക യുദ്ധ സാങ്കേതികവിദ്യകള്‍ക്ക് മുന്‍ഗണന
ആധുനിക യുദ്ധമേഖലയില്‍ നിര്‍മിതബുദ്ധി, സ്വയം പ്രവര്‍ത്തിക്കുന്ന സംവിധാനങ്ങള്‍, ആളില്ലാ വിമാനങ്ങള്‍ (UAV - Unmanned Aerial Vehicle), സൈബര്‍ സുരക്ഷ, ബഹിരാകാശ സാങ്കേതികവിദ്യ, ഇലക്ട്രോണിക് യുദ്ധ സംവിധാനങ്ങള്‍ എന്നിവയുടെ പ്രാധാന്യം വര്‍ധിച്ചുവരികയാണ്. ഈ മേഖലകളില്‍ കൂടുതല്‍ നിക്ഷേപം നടത്താനും അടുത്ത തലമുറ ആയുധങ്ങളും സൈനിക സംവിധാനങ്ങളും വേഗത്തില്‍ സൈന്യത്തിന്റെ ഭാഗമാക്കാനും യോഗത്തില്‍ നിര്‍ദേശമുയര്‍ന്നു.
പ്രതിരോധ ഗവേഷണ വികസന സംഘടനയായ ഡിആര്‍ഡിഒ വികസിപ്പിക്കുന്ന അത്യാധുനിക ആയുധങ്ങള്‍, മിസൈലുകള്‍, പ്രതിരോധ സംവിധാനങ്ങള്‍ എന്നിവയുടെ പ്രാധാന്യവും മന്ത്രി എടുത്തു പറഞ്ഞു. ഗവേഷണ സ്ഥാപനങ്ങള്‍, സൈനിക വിഭാഗങ്ങള്‍, സ്വകാര്യ കമ്പനികള്‍, സ്റ്റാര്‍ട്ടപ്പുകള്‍, വിദ്യാഭ്യാസ സ്ഥാപനങ്ങള്‍ എന്നിവ തമ്മിലുള്ള സഹകരണം ശക്തിപ്പെടുത്താനും ലക്ഷ്യമിടുന്നുണ്ട്.
സൈനിക ഏകോപനം
കരസേന, നാവികസേന, വ്യോമസേന എന്നീ മൂന്ന് വിഭാഗങ്ങള്‍ തമ്മിലുള്ള ഏകോപനം വര്‍ധിപ്പിക്കുന്നതിനും സംയുക്ത പ്രവര്‍ത്തന ആസൂത്രണം ശക്തമാക്കുന്നതിനും യോഗം പ്രാധാന്യം നല്‍കി. മാറിവരുന്ന യുദ്ധരീതികള്‍ക്കനുസരിച്ച് സൈനിക സംവിധാനങ്ങളും പ്രവര്‍ത്തനരീതികളും പരിഷ്‌കരിക്കേണ്ടതിന്റെ ആവശ്യകതയും ചര്‍ച്ചയായി.
സൈനികരുടെ പരിശീലനവും പ്രവര്‍ത്തനശേഷിയും ആധുനികവല്‍ക്കരണത്തിന്റെ പ്രധാന ഘടകങ്ങളാണെന്ന് രാജ്നാഥ് സിങ് വ്യക്തമാക്കി. സാങ്കേതികവിദ്യയും സാമ്പത്തിക ശേഷിയും മാത്രമല്ല, സൈനികരുടെ കഴിവും തയ്യാറെടുപ്പും രാജ്യത്തിന്റെ പ്രതിരോധശേഷി നിര്‍ണയിക്കുന്നതില്‍ പ്രധാനമാണെന്നും അദ്ദേഹം കൂട്ടിച്ചേര്‍ത്തു.
ആഭ്യന്തര പ്രതിരോധ ഉല്‍പ്പാദനം വര്‍ധിപ്പിച്ച് ഇറക്കുമതിയെ ആശ്രയിക്കുന്നത് കുറയ്ക്കുകയും ഇന്ത്യയെ ആഗോള പ്രതിരോധ കയറ്റുമതി രംഗത്തെ പ്രധാന ശക്തിയാക്കി മാറ്റുകയുമാണ് കേന്ദ്രസര്‍ക്കാരിന്റെ ലക്ഷ്യം.