ചൈനയില്‍ നിന്നുള്ള ഇന്ത്യയുടെ ഇറക്കുമതി ഇടിഞ്ഞു

ചൈനയില്‍ നിന്നുള്ള ഇന്ത്യയുടെ ഇറക്കുമതി കുറഞ്ഞു. വളം, രാസവസ്തുക്കള്‍, ഇരുമ്പ്, ഉരുക്ക്, എന്നിവയുടെ ഇറക്കുമതിയിലാണ് കുറവുണ്ടായിരിക്കുന്നത്.

രാജ്യസഭയില്‍ രേഖാമൂലം നല്‍കിയ മറുപടിയില്‍, മൊബൈല്‍ ഫോണ്‍ ഇറക്കുമതി 2014-15 ല്‍ 48,609 കോടിയില്‍ നിന്ന് 2024-25 ല്‍ 3,710 കോടിയായി കുറഞ്ഞുവെന്ന് വാണിജ്യ, വ്യവസായ സഹമന്ത്രി ജിതിന്‍ പ്രസാദ് പറഞ്ഞു. മൊബൈല്‍ ഫോണുകളുടെ കയറ്റുമതി 2014-15 ല്‍ 1,566 കോടിയില്‍ നിന്ന് 2024-25 ല്‍ 2,05,017 കോടിയില്‍ അധികമായി. 2024-25 ല്‍, മുന്‍ വര്‍ഷത്തെ അപേക്ഷിച്ച് നിരവധി മേഖലകളിലായി ചൈനയില്‍ നിന്നുള്ള ഇറക്കുമതിയില്‍ കുറവുണ്ടായി.

വളങ്ങളുടെ ഇറക്കുമതിയില്‍ 61.4 ശതമാനവും അവശിഷ്ട രാസവസ്തുക്കളുടെയും അനുബന്ധ ഉല്‍പ്പന്നങ്ങളുടെയും ഇറക്കുമതിയില്‍ 19.7 ശതമാനം, ഇരുമ്പ്, ഉരുക്ക് എന്നിവയുടെ ഇറക്കുമതി 10.3 ശതമാനവും ഇടിവുണ്ടായി അദ്ദേഹം പറഞ്ഞു.

ഇന്ത്യന്‍ ബിസിനസ് സ്ഥാപനങ്ങള്‍ ബദല്‍ വിതരണക്കാരെ കണ്ടെത്താനും, ഒരൊറ്റ വിതരണ സ്രോതസ്സുകളെ ആശ്രയിക്കുന്നത് കുറയ്ക്കുന്നതിന് അവരുടെ വിതരണ ശൃംഖലകള്‍ വൈവിധ്യവല്‍ക്കരിക്കാനും സര്‍ക്കാര്‍ പ്രോത്സാഹിപ്പിക്കുന്നുണ്ടെന്ന് അദ്ദേഹം കൂട്ടിച്ചേര്‍ത്തു.

ഇറക്കുമതിയിലെ കുതിച്ചുചാട്ടം സര്‍ക്കാര്‍ പതിവായി നിരീക്ഷിക്കുകയും ഉചിതമായ നടപടികള്‍ കൈക്കൊള്ളുകയും ചെയ്യുന്നുണ്ടെന്ന് മന്ത്രി കൂട്ടിച്ചേര്‍ത്തു.