കേരള സൈബര്‍ സുരക്ഷാ സമ്മിറ്റ്; ലോഗോ പ്രകാശനം ചെയ്തു

കേരളത്തിലെ ചെറുകിട, ഇടത്തരം സംരംഭങ്ങള്‍ക്കും സ്റ്റാര്‍ട്ടപ്പുകള്‍ക്കും സൈബര്‍ സുരക്ഷ ഉറപ്പാക്കാന്‍ ലക്ഷ്യമിട്ട് സംഘടിപ്പിക്കുന്ന 'കേരള സൈബര്‍ സുരക്ഷാ സമ്മിറ്റ് 2025'-ന്റെ ലോഗോ പ്രകാശനം ചെയ്തു. ഡി.ജി.പി.യും, വിജിലന്‍സ് ആന്‍ഡ് ആന്റി-കറപ്ഷന്‍ ബ്യൂറോ ഡയറക്ടറും ആയ മനോജ് എബ്രഹാം ഐ.പി.എസ് ആണ് പ്രകാശനകര്‍മം നിര്‍വഹിച്ചത്.

കൊച്ചിയില്‍ ഒക്ടോബര്‍ 11-ന് നടക്കുന്ന സമ്മിറ്റ് വ്യവസായ മന്ത്രി പി. രാജീവ് ഉദ്ഘാടനം ചെയ്യും. കേരള സ്റ്റാര്‍ട്ടപ്പ് മിഷന്‍ സി.ഇ.ഒ. അനൂപ് അംബിക വിശിഷ്ടാതിഥിയായും പങ്കെടുക്കും. വ്യവസായ സംഘടനകളായ സി.ഐ.ഐ, ടൈ-കേരള, കെ.എം.എ, കൊച്ചി ചേംബര്‍ എന്നിവയും സമ്മിറ്റിന്റെ ഭാഗമാകും.

ആറ് രാജ്യങ്ങളില്‍ പ്രവര്‍ത്തനങ്ങളുള്ള ഇന്‍ഫോടെക്, മള്‍ട്ടി-ക്ലൗഡ്, സൈബര്‍ സുരക്ഷാ രംഗങ്ങളില്‍ വിദഗ്ദ്ധരായ എഫ്9 ഇന്‍ഫോടെക്, കേരള സര്‍ക്കാരുമായും കേരള സ്റ്റാര്‍ട്ടപ്പ് മിഷനുമായും സഹകരിച്ചാണ് ഈ സമ്മിറ്റ് സംഘടിപ്പിക്കുന്നത്.

സമ്മിറ്റ് കേരളത്തിന്റെ സൈബര്‍ എക്കോസിസ്റ്റത്തെ കൂടുതല്‍ ശക്തിപ്പെടുത്തും. നവീകരണവും കൂട്ടായ്മയും വഴി കേരളത്തെ ഗ്ലോബല്‍ സൈബര്‍ സുരക്ഷയില്‍ കൂടുതല്‍ ശക്തമാക്കുമെന്നും സംഘാടകര്‍ അറിയിച്ചു.