ഭക്ഷ്യസുരക്ഷയില്‍ വീഴ്ച; ഡല്‍ഹിയിലെ ആഡംബര ഹോട്ടലിന്റെ ലൈസന്‍സ് സസ്‌പെന്‍ഡ് ചെയ്തു

ഡല്‍ഹിയിലെ രോഹിണിയില്‍ പ്രവര്‍ത്തിക്കുന്ന സെവന്‍ സീസ് ഹോസ്പിറ്റാലിറ്റിയുടെ ലൈസന്‍സ് ഭക്ഷ്യസുരക്ഷാ അതോറിറ്റി ഓഫ് ഇന്ത്യ (എഫ്എസ്എസ്എഐ) സസ്‌പെന്‍ഡ് ചെയ്തു. ആഡംബര വിരുന്നുകള്‍, കാറ്ററിംഗ് സേവനങ്ങള്‍ എന്നിവയില്‍ പ്രശസ്തമായ ഈ കമ്പനിയുടെ ഭക്ഷ്യശാലകളില്‍ നടത്തിയ പരിശോധനയില്‍ ഗുരുതരമായ നിയമലംഘനങ്ങളും ശുചിത്വക്കുറവുകളും കണ്ടെത്തിയതിനെ തുടര്‍ന്നാണ് നടപടി. സസ്‌പെന്‍ഷന്‍ കാലയളവില്‍ എല്ലാ ഭക്ഷ്യ ബിസിനസ് പ്രവര്‍ത്തനങ്ങളും നിര്‍ത്തിവയ്ക്കാന്‍ എഫ്എസ്എസ്എഐ നിര്‍ദേശം നല്‍കിയിട്ടുണ്ട്.

പരിശോധനയ്ക്കിടെ തക്കാളി, പപ്പായ, ശര്‍ക്കര, കശുവണ്ടി എന്നിവയില്‍ ഫംഗസ് വളര്‍ച്ച കണ്ടെത്തി. ചീഞ്ഞ കാപ്സിക്കം, കറുത്തതും ജീര്‍ണ്ണിച്ചതുമായ പാചക എണ്ണ, മാലിന്യം, വെള്ളം കെട്ടിനില്‍ക്കല്‍, ദുര്‍ഗന്ധം തുടങ്ങിയവയും റിപ്പോര്‍ട്ട് ചെയ്തു. ഭക്ഷണം തയ്യാറാക്കുന്ന സ്ഥലങ്ങളില്‍ അപര്യാപ്തമായ പരിപാലനവും ശുചിത്വക്കുറവും രേഖപ്പെടുത്തിയതായി എഫ്എസ്എസ്എഐ അറിയിച്ചു.

മാംസവും സസ്യാഹാരവും വേര്‍തിരിച്ച് സൂക്ഷിക്കുന്നതില്‍ ഗുരുതരമായ പോരായ്മകള്‍ കണ്ടെത്തി. കോള്‍ഡ് സ്റ്റോറേജ് യൂണിറ്റുകളില്‍ മാംസം ഒലിച്ചിറങ്ങുന്നതും ശരിയായി സംഭരിക്കാത്തതും കണ്ടെത്തി. റെഫ്രിജറേഷന്‍ ചോര്‍ച്ച, അമിതമായ ഐസ് അടിഞ്ഞുകൂടല്‍, പ്ലാസ്റ്റര്‍ അടര്‍ന്നുപോകല്‍, പാറ്റകളുടെയും ഈച്ചകളുടെയും സാന്നിധ്യം, മോശം വായുസഞ്ചാരം, വെളിച്ചക്കുറവ് തുടങ്ങിയ കീടനിയന്ത്രണ പിഴവുകളും റിപ്പോര്‍ട്ടില്‍ ചൂണ്ടിക്കാട്ടുന്നു.

പരിശോധനയില്‍ ഏകദേശം 74 കിലോഗ്രാം/ലിറ്റര്‍ ഭക്ഷ്യവസ്തുക്കള്‍ സ്ഥലത്ത് വെച്ച് തന്നെ നശിപ്പിച്ചു. ശുചിത്വം, റെക്കോര്‍ഡ് പരിപാലനം, ജല പരിശോധന തുടങ്ങിയ മേഖലകളിലും മാനദണ്ഡങ്ങള്‍ പാലിക്കുന്നില്ലെന്ന് കണ്ടെത്തി. കമ്പനിയുടെ കംപ്ലയന്‍സ് സ്‌കോര്‍ 30% മാത്രമാണ്, ഇത് 'നോണ്‍-കംപ്ലയന്‍സ്' വിഭാഗത്തില്‍പ്പെടുന്നു. നഗരങ്ങളിലുടനീളമുള്ള ഒന്നിലധികം ഹോട്ടലുകളുടെയും ഭക്ഷണശാലകളുടെയും ലൈസന്‍സുകള്‍ എഫ്എസ്എസ്എഐ ഇതിനകം സസ്‌പെന്‍ഡ് ചെയ്തിട്ടുണ്ട്. ആമസോണ്‍, സ്വിഗ്ഗി ഇന്സ്റ്റാമാര്‍ട്ട്, ബിഗ്ബാസ്‌ക്കറ്റ്, ഫ്‌ലിപ്കാര്‍ട്ട് ഇന്ത്യ, സെപ്‌റ്റോ തുടങ്ങിയ ഇ-കൊമേഴ്‌സ് പ്ലാറ്റ്‌ഫോമുകള്‍ക്കെതിരെയും എഫ്എസ്എസ്എഐ അടുത്തിടെ നടപടികള്‍ സ്വീകരിച്ചിരുന്നു.