യുദ്ധഭീതിക്കിടെ വമ്പന്‍ രക്ഷാദൗത്യം: ഒരാഴ്ചയ്ക്കുള്ളില്‍ നാട്ടിലെത്തിയത് 52,000 ഇന്ത്യക്കാര്‍

പശ്ചിമേഷ്യയില്‍ സംഘര്‍ഷം പുകയുന്നതിനിടെ ഗള്‍ഫ് മേഖലയില്‍ നിന്ന് പതിനായിരക്കണക്കിന് ഇന്ത്യന്‍ പൗരന്മാരെ മാതൃരാജ്യത്ത് തിരിച്ചെത്തിച്ച് കേന്ദ്ര സര്‍ക്കാര്‍. മാര്‍ച്ച് 1 മുതല്‍ മാര്‍ച്ച് 7 വരെയുള്ള വെറും ഏഴ് ദിവസത്തിനുള്ളില്‍ 52,000-ത്തിലധികം പ്രവാസികളാണ് സുരക്ഷിതമായി ഇന്ത്യന്‍ മണ്ണില്‍ ലാന്‍ഡ് ചെയ്തത്. ഇതില്‍ 32,107 പേര്‍ ഇന്ത്യന്‍ വിമാനക്കമ്പനികളെയാണ് ആശ്രയിച്ചത്. മറ്റുള്ളവര്‍ വിദേശ വിമാന സര്‍വീസുകള്‍ വഴി നാട്ടിലെത്തി. വ്യോമാതിര്‍ത്തികള്‍ ഭാഗികമായി തുറന്നത് പ്രയോജനപ്പെടുത്തിയാണ് ഈ അതിവേഗ ദൗത്യം സാധ്യമായതെന്ന് വിദേശകാര്യ മന്ത്രാലയ വക്താവ് രണ്‍ധീര്‍ ജയ്‌സ്വാള്‍ വ്യക്തമാക്കി.

നിലവില്‍ സന്ദര്‍ശക വിസയില്‍ എത്തിയവര്‍ക്കും ഹ്രസ്വകാല യാത്രക്കാര്‍ക്കുമാണ് മടക്കയാത്രയില്‍ മുന്‍ഗണന നല്‍കുന്നത്. മേഖലയിലെ സംഭവവികാസങ്ങള്‍ സര്‍ക്കാര്‍ അതീവ ജാഗ്രതയോടെയാണ് നിരീക്ഷിക്കുന്നത്. വരും ദിവസങ്ങളില്‍ കൂടുതല്‍ വിമാന സര്‍വീസുകള്‍ ആസൂത്രണം ചെയ്തിട്ടുണ്ടെന്നും, മടങ്ങാന്‍ കാത്തിരിക്കുന്ന ഓരോ ഇന്ത്യക്കാരന്റെയും സുരക്ഷ ഉറപ്പാക്കുമെന്നും വിദേശകാര്യ മന്ത്രാലയം ഉറപ്പുനല്‍കുന്നു. പ്രതിസന്ധി ഘട്ടത്തിലും പ്രവാസികളുടെ ക്ഷേമത്തിനാണ് രാജ്യം പരമപ്രധാന പരിഗണന നല്‍കുന്നത്.

പ്രവാസികളുടെ ആശങ്കകള്‍ പരിഹരിക്കുന്നതിനായി ഓരോ രാജ്യത്തെയും ഇന്ത്യന്‍ എംബസികളിലും കോണ്‍സുലേറ്റുകളിലും 24/7 ഹെല്‍പ്പ് ലൈന്‍ സംവിധാനങ്ങള്‍ നിലവില്‍ വന്നുകഴിഞ്ഞു. പ്രാദേശിക ഭരണകൂടങ്ങളുടെ നിര്‍ദ്ദേശങ്ങളും എംബസി നല്‍കുന്ന സുരക്ഷാ ഉപദേശങ്ങളും കര്‍ശനമായി പാലിക്കണമെന്ന് അധികൃതര്‍ നിര്‍ദ്ദേശിച്ചു. ദുരിതബാധിത പ്രദേശങ്ങളിലുള്ളവര്‍ക്കായി പ്രത്യേക ഗൈഡ്‌ലൈനുകളും മന്ത്രാലയം പുറത്തിറക്കിയിട്ടുണ്ട്.

വാണിജ്യ വിമാന സര്‍വീസുകള്‍ ലഭ്യമല്ലാത്തയിടങ്ങളില്‍ കുടുങ്ങിക്കിടക്കുന്നവര്‍ പരിഭ്രാന്തരാകേണ്ടതില്ലെന്ന് സര്‍ക്കാര്‍ അറിയിച്ചു. അത്തരത്തിലുള്ളവര്‍ക്ക് തൊട്ടടുത്തുള്ള വിമാന ഓപ്ഷനുകളെക്കുറിച്ചുള്ള വിവരങ്ങള്‍ക്കും സഹായത്തിനുമായി ബന്ധപ്പെട്ട എംബസിയെ നേരിട്ട് സമീപിക്കാവുന്നതാണ്. തടസ്സമില്ലാതെ ഇന്ത്യക്കാരെ നാട്ടിലെത്തിക്കാന്‍ ഏകോപിതമായ നീക്കങ്ങളാണ് ഇപ്പോള്‍ നടന്നു വരുന്നത്.