Login 
പഠിക്കാം & സമ്പാദിക്കാം 
Home
2 Sept 2025 1:00 PM IST
Summary
മണിപ്പൂരില് വംശീയ അക്രമം പൊട്ടിപ്പുറപ്പെട്ടതിനുശേഷം പ്രധാനമന്ത്രിയുടെ ആദ്യ സന്ദര്ശനമാണിത്
പ്രധാനമന്ത്രി നരേന്ദ്ര മോദി ഈമാസം 13 ന് മിസോറാമും മണിപ്പൂരും സന്ദര്ശിക്കും. പുതിയ ബൈരാബി-സൈരാങ് റെയില്വേ ലൈന് ഉദ്ഘാടനം ചെയ്യുന്നതിനായി പ്രധാനമന്ത്രി മോദി ആദ്യം മിസോറാമില് എത്തും. അതിനുശേഷമാണ് അദ്ദേഹം കലാപ ബാധിതമായ മണിപ്പൂരിലെത്തുക.
2023 മെയ് മാസത്തില് സംസ്ഥാനത്ത് വംശീയ അക്രമം പൊട്ടിപ്പുറപ്പെട്ടതിനുശേഷം പ്രധാനമന്ത്രിയുടെ ആദ്യ സന്ദര്ശനമാണിത്. ഐസ്വാളില് നിന്ന് അദ്ദേഹം മണിപ്പൂരിലേക്ക് പറക്കുമെന്നും വിവരം ലഭിച്ചതായി മിസോറാം സര്ക്കാര് ഉദ്യോഗസ്ഥര് പറഞ്ഞു.
എന്നാല് പ്രധാനമന്ത്രിയുടെ സന്ദര്ശനത്തിന്റെ അന്തിമ യാത്രാ പരിപാടി ഇതുവരെ ലഭിച്ചിട്ടില്ലെന്ന് അവര് പറഞ്ഞു. ഇംഫാലിലെ ഉദ്യോഗസ്ഥര്ക്ക് സന്ദര്ശനം സ്ഥിരീകരിക്കാനും കഴിഞ്ഞിട്ടില്ല.
പ്രധാനമന്ത്രിയുടെ സന്ദര്ശനത്തിനായുള്ള ഒരുക്കങ്ങള് അവലോകനം ചെയ്യുന്നതിനായി മിസോറാം ചീഫ് സെക്രട്ടറി ഖില്ലി റാം മീണ തിങ്കളാഴ്ച വിവിധ വകുപ്പുകളുമായും നിയമ നിര്വ്വഹണ ഏജന്സികളുമായും ഒരു യോഗം വിളിച്ചുചേര്ത്തിരുന്നു.
സുരക്ഷാ നടപടികള്, ഗതാഗത നിയന്ത്രണം, സ്വീകരണം, തെരുവ് അലങ്കാരം എന്നിവയുള്പ്പെടെ വിവിധ വിഷയങ്ങള് യോഗം ചര്ച്ച ചെയ്തതായി ഒരു പ്രസ്താവനയില് പറയുന്നു.
ഐസ്വാളിലെ ലാമൗളില് നടക്കുന്ന ഉദ്ഘാടന ചടങ്ങില് സര്ക്കാര് ജീവനക്കാര്, കര്ഷകര്, വിവിധ സ്കൂളുകളില് നിന്നും കോളേജുകളില് നിന്നുമുള്ള വിദ്യാര്ത്ഥികള് എന്നിവരെ പങ്കെടുപ്പിക്കുന്നതിനുള്ള ക്രമീകരണങ്ങളെക്കുറിച്ചും യോഗം ചര്ച്ച ചെയ്തു.
51.38 കിലോമീറ്റര് നീളമുള്ള ഈ റെയില്വേ ലൈന്, വടക്കുകിഴക്കന് മേഖലയിലുടനീളം കണക്റ്റിവിറ്റിയും സാമ്പത്തിക സംയോജനവും വര്ദ്ധിപ്പിക്കുന്നതിന് ലക്ഷ്യമിടുന്ന കേന്ദ്രത്തിന്റെ ആക്ട് ഈസ്റ്റ് പോളിസിയുടെ ഭാഗമാണ്.
പുതിയ റെയില്വേ ലൈന് അസമിലെ സില്ചാര് പട്ടണം വഴി ഐസ്വാളിനെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കും.