കുതിച്ചുയര്‍ന്ന് ഓഹരി വിപണി, കരുത്താര്‍ജ്ജിച്ച് രൂപ

ഡോളറിനെതിരെ രൂപയ്ക്കു നേട്ടം. രൂപയുടെ മൂല്യം 18 പൈസ ഉയർന്ന് 85.23 ൽ ക്ലോസ് ചെയ്തു. വിദേശ ഫണ്ടുകളുടെ വരവ്, ക്രൂഡ് ഓയിൽ വില കുറയൽ, ആഭ്യന്തര മാർക്കറ്റിലെ ബുള്ളിഷ് ട്രെൻഡ് എന്നിവയാണ് രൂപയുടെ മൂല്യം ഉയരാൻ കാരണമായത്. വെള്ളിയാഴ്ച, യുഎസ് ഡോളറിനെതിരെ രൂപയുടെ മൂല്യം 8 പൈസ കുറഞ്ഞ് 85.41 എന്ന നിലയിലാണ് ക്ലോസ് ചെയ്തത്.

അതേസമയം, ആറ് കറൻസികളുടെ ഒരു ബാസ്കറ്റിനെതിരെ ഗ്രീൻബാക്കിന്റെ ശക്തി അളക്കുന്ന ഡോളർ സൂചിക 0.13 ശതമാനം ഉയർന്ന് 99.60 എന്ന നിലയിലായിരുന്നു വ്യാപാരം. ആഗോള എണ്ണ മാനദണ്ഡമായ ബ്രെന്റ് ക്രൂഡിന്റെ വില ഫ്യൂച്ചേഴ്സ് വ്യാപാരത്തിൽ 0.46 ശതമാനം ഇടിഞ്ഞ് ബാരലിന് 66.56 യുഎസ് ഡോളറിലെത്തി.

ഓഹരി വിപണിയിൽ സെൻസെക്സ് 1,005.84 പോയിന്റ് അഥവാ 1.27 ശതമാനം ഉയർന്ന് 80,218.37 ലെത്തി, നിഫ്റ്റി 289.15 പോയിന്റ് അഥവാ 1.20 ശതമാനം ഉയർന്ന് 24,328.50 ലെത്തി.