കര്‍ണാടക ടെക് സ്റ്റാര്‍ട്ടപ്പുകള്‍ക്ക് ഫണ്ടിംഗ് ശക്തം; സമാഹരിച്ചത് 4.6 ബില്യണ്‍ ഡോളര്‍

കര്‍ണാടകയിലെ ടെക് ലോകത്ത് വലിയവര്‍ക്ക് പണമഴ. 2026-ലെ ആദ്യ ഒമ്പത് മാസങ്ങളില്‍ കര്‍ണാടക ആസ്ഥാനമായുള്ള ടെക് കമ്പനികള്‍ സമാഹരിച്ചത് 4.6 ബില്യണ്‍ ഡോളര്‍. കഴിഞ്ഞ വര്‍ഷം ഇതേ കാലയളവില്‍ നേടിയത് 3.7 ബില്യണ്‍ ഡോളറായിരുന്നു. 26 ശതമാനം വര്‍ധനവ്. പക്ഷേ ഈ കണക്കിന് പിന്നില്‍ മറ്റൊരു സത്യമുണ്ട് - പണം കിട്ടിയത് വിരലില്‍ എണ്ണാവുന്ന വലിയ കമ്പനികള്‍ക്ക് മാത്രമാണ്.

ഫിന്‍ടെക് കമ്പനിയായ CRED തന്നെയാണ് ഈ കുതിപ്പിന് പിന്നിലെ വലിയ താരം. ജൂണില്‍ മാത്രം കമ്പനി നടത്തിയ 540 മില്യണ്‍ ഡോളര്‍ സീരീസ് എച്ച് ഫണ്ടിംഗ് റൗണ്ട് മൊത്തം ഫണ്ടിംഗിന്റെ 12 ശതമാനത്തോളം വരും. ഇത് കൂടാതെ റാപ്പിഡോയുടെ 240 മില്യണ്‍ ഡോളര്‍ സീരീസ് എഫ് ഉം ക്രെഡിറ്റ്ബീയുടെ 220 മില്യണ്‍ ഡോളര്‍ സീരീസ് ഇ യും കൂടി ചേര്‍ന്നതോടെ ഫണ്ടിംഗ് കുതിച്ചുയര്‍ന്നു. അവസാന ഘട്ട ഫണ്ടിംഗ് 32 ശതമാനം ഉയര്‍ന്ന് 2.7 ബില്യണ്‍ ഡോളറായി. പ്രാരംഭ ഘട്ട ഫണ്ടിംഗും 35 ശതമാനം വര്‍ദ്ധിച്ച് 1.7 ബില്യണ്‍ ഡോളറായി. ഫിന്‍ടെക്, എന്റര്‍പ്രൈസ് ആപ്ലിക്കേഷനുകള്‍ ഓരോന്നും 1.4 ബില്യണ്‍ ഡോളര്‍ വീതം സമാഹരിച്ചു. ഓട്ടോ ടെക് അഞ്ചിരട്ടിയിലേറെ വളര്‍ന്ന് 896 മില്യണ്‍ ഡോളറിലെത്തി.

എന്നാല്‍ പുതുമുഖങ്ങള്‍ക്ക് ഇത് നിരാശയുടെ കാലമാണ്. ആദ്യമായി ധനസഹായം ലഭിക്കുന്ന സ്റ്റാര്‍ട്ടപ്പുകളുടെ എണ്ണം കുത്തനെ കുറഞ്ഞു. 2026-ലെ ആദ്യ ഒമ്പത് മാസങ്ങളില്‍ 86 കമ്പനികള്‍ക്ക് മാത്രമാണ് ആദ്യ ഫണ്ടിംഗ് ലഭിച്ചത്, കഴിഞ്ഞ വര്‍ഷം ഇത് 155 ആയിരുന്നു. 45 ശതമാനം കുറവ്. മൊത്തം ഫണ്ടിംഗ് റൗണ്ടുകളുടെ എണ്ണവും 610-ല്‍ നിന്ന് 397 ആയി കുറഞ്ഞു. അതായത് നിക്ഷേപകര്‍ പണം കൊടുക്കുന്നുണ്ട്, പക്ഷേ സുരക്ഷിതരായ വലിയ കമ്പനികള്‍ക്ക് മാത്രം. പുതിയ ആശയങ്ങളുമായി വരുന്നവരെ അവര്‍ തിരിഞ്ഞ് നോക്കുന്നില്ല.

എന്നിരുന്നാലും ബെംഗളൂരു ഇപ്പോഴും ഇന്ത്യയുടെ സ്റ്റാര്‍ട്ടപ്പ് തലസ്ഥാനമായി തുടരുന്നു. സമാഹരിച്ച മിക്കവാറും എല്ലാ ഫണ്ടിംഗും ബെംഗളൂരുവില്‍ നിന്നാണ്. ഈ കാലയളവില്‍ എമര്‍ജന്റ്, സര്‍വം, ക്രെഡിറ്റ്ബീ എന്നീ മൂന്ന് സ്റ്റാര്‍ട്ടപ്പുകള്‍ യൂണികോണ്‍ ക്ലബ്ബില്‍ ചേര്‍ന്നു. സര്‍വം ജൂണില്‍ സീരീസ് ബി-യില്‍ 255 മില്യണ്‍ ഡോളറും ഓഗസ്റ്റില്‍ 90 മില്യണ്‍ ഡോളറും സമാഹരിച്ചു. പക്ഷേ ഏറ്റെടുക്കലുകളുടെ എണ്ണം പകുതിയായി കുറഞ്ഞ് 20 ആയി. അപ്ഗ്രാഡിന്റെ 222 മില്യണ്‍ ഡോളറിന്റെ അണ്‍അക്കാദമി ഏറ്റെടുക്കലായിരുന്നു ഏറ്റവും വലിയ ഇടപാട്.